خەلق گېزىتىنىڭ 27-سېنتەبىر بېيجىڭدىن بەرگەن تېلېگراممىسى: 27-چېسلا گوۋۇيۈەن مەملىكەتلىك ئېنېرگىيە تېجەش، بۇلغىما ئازايتىش خىزمىتى سىن يىغىنى چاقىرىپ، 12-بەش يىللىق پىلان مەزگىلىدىكى ئېنېرگىيە تېجەش، بۇلغىما ئازايتىش خىزمىتىنى ئومۇميۈزلۈك سەپەرۋەر قىلدى ۋە ئورۇنلاشتۇردى. گوۋۇيۈەن زۇڭلىسى ۋېن جياباۋ مۇھىم سۆز قىلىپ مۇنۇلارنى تەكىتلىدى: ئېنېرگىيە تېجەش، بۇلغىما ئازايتىشنىڭ مۇھىم ئەھمىيىتىنى ئىستراتېگىيە ۋە ئومۇمىيەت يۈكسەكلىدىن تونۇپ، ئېنېرگىيە تېجەش، بۇلغىما ئازايتىشنىڭ ئۇنىۋېرسال خىزمەت لايىھەسىنى ئومۇميۈزلۈك ئەمەلىيلەشتۈرۈپ، تېخىمۇ زور ئىرادە بىلەن تېخىمۇ زور كۈچ سەرپ قىلىپ، ئېنېرگىيە تېجەش، بۇلغىما ئازايتىش بويىچە سوزۇلما ئۇرۇش ۋە قىيىن ئۇرۇشتا غەلىبە قىلىپ، بايلىق تېجەر، مۇھىت سۆيەر جەمئىيەت بەرپا قىلىشىمىز كېرەك.

    يىغىنغا گوۋۇيۈەننىڭ مۇئاۋىن زۇڭلىسى لى كېچياڭ رىياسەتچىلىك قىلدى.

    ۋېن جياباۋ بەش تەلەپنى ئوتتۇرىغا قويدى: (1) كەسىپ قۇرۇلمىسىنى كۈچەپ تەڭشەپ ۋە ئەلالاشتۇرۇپ، ئېنېرگىيە تېجەش، بۇلغىما ئازايتىشنى ئىلگىرى سۈرۈش كېرەك. جۇڭگوچە سوتسىيالىستىك يېڭىچە سانائەتلىشىش يولىدا مېڭىشتا چىڭ تۇرۇش لازىم. (2) پەن-تېخنىكىدا يېڭىلىق يارىتىش ۋە تېخنىكا تەرەققىياتى ئارقىلىق ئېنېرگىيە تېجەش، بۇلغىما ئازايتىشنى ئىلگىرى سۈرۈش كېرەك. (3) ئېنېرگىيە تېجەش، بۇلغىما ئازايتىشنىڭ ئۇزاق ئۈنۈملۈك مېخانىزمىنى مۇكەممەللەشتۈرۈش كېرەك. (4) ئېنېرگىيە تېجەش، بۇلغىما ئازايتىش ئىقتىدارى قۇرۇلۇشىنى كۈچەيتىش لازىم. (5) نۇقتىلىق ساھەلەردىكى ئېنېرگىيە تېجەش، بۇلغىما ئازايتىشنى ئىلگىرى سۈرۈش كېرەك.

    ۋېن جياباۋ مۇنۇلارنى تەكىتلىدى، ھەر دەرىجىلىك پارتكوم ۋە ھۆكۈمەتلەر ئېنېرگىيە تېجەش، بۇلغىما ئازايتىشنى ئىلمىي تەرەققىياتنى ئىلگىرى سۈرۈشتىكى چىڭ ۋەزىپە، ئىقتىسادىي تەرەققىيات ئۇسۇلىنى ئۆزگەرتىشتىكى كۈچلۈك تەدبىر، ھەر دەرىجىلىك كادىرلارنى تەكشۈرۈپ باھالاشتىكى قاتتىق كۆرسەتكۈچ قىلىشى كېرەك.