شىنخۇا ئاگېنتلىقى، بېيجىڭ، 26 – سېنتەبىر تېلېگراممىسى. ج ك پ مەركىزىي كومىتېتى سىياسىي بىيۇروسى دائىمىي كومىتېتىنىڭ ئەزاسى، گوۋۇيۈەن زۇڭلىسى ۋېن جياباۋ 26 – سېنتەبىر خەلق سارىيىدا چاۋشيەن ئەمگەكچىلەر پارتىيەسى مەركىزىي كومىتېتى سىياسىي بىيۇروسى دائىمىي كومىتېتىنىڭ ئەزاسى، ئىچكى كابىنېت زۇڭلىسى سۈي يۇڭلىن بىلەن سۆھبەتلەشتى.

    ۋېن جياباۋ مۇنداق دېدى: مۇرەككەپ رايون ۋە خەلقئارا ۋەزىيەت ئالدىدا، جۇڭگو – چاۋشيەن پارتىيەلىرى، ھۆكۈمىتى ۋە خەلقلىرى ‹‹ئەنئەنىگە ۋارىسلىق قىلىش، كەلگۈسىگە يۈزلىنىش، قوشنىلار ئارا ئىناق ئۆتۈش، ھەمكارلىقنى كۈچەيتىش›› روھى بويىچە، ئورتاق تىرىشىپ، ئىككى تەرەپ مۇناسىۋىتىنى ئۈزلۈكسىز راۋاجلاندۇرماقتا. جۇڭگو چاۋشيەن بىلەن يۇقىرى قاتلامدىكىلەر ئۆزئارا زىيارەتتە بولۇش ۋەزىيىتىنى ساقلاپ، ئىستراتېگىيەلىك ئالاقىنى چوڭقۇرلاشتۇرۇپ، ئورتاق مەنپەئەتنى قوغداپ، جۇڭگو – چاۋشيەن دوستلۇقى ۋە ھەمكارلىقىدا تېخىمۇ كۆپ نەتىجىنى قولغا كەلتۈرۈشنى خالايدۇ.

    ۋېن جياباۋ مۇنداق دېدى: چاۋشيەن پارتىيەسى ۋە ھۆكۈمىتىنىڭ رەھبەرلىكىدە، چاۋشيەن خەلقى قىيىنچىلىقلارنى يېڭىپ، ئىقتىسادنى راۋاجلاندۇرۇش، خەلق تۇرمۇشىنى ياخشىلاشقا پائال كۈچەپ، خۇشاللىنارلىق ئىلگىرىلەشلەرنى قولغا كەلتۈردى. جۇڭگو چاۋشيەن بىلەن دۆلەتنى ئىدارە قىلىش، ھاكىمىيەت يۈرگۈزۈش، ئىقتىسادىي قۇرۇلۇش جەھەتلەردىكى ئالاقىنى كۈچەيتىپ، چاۋشيەننىڭ ئۆز ئەھۋالىغا ماس كېلىدىغان تەرەققىيات يولى ئۈستىدە ئىزدىنىشىنى قوللاشنى ھەم چاۋشيەنگە قولىدىن كېلىشىچە ياردەم بېرىشنى خالايدۇ. ئىككى تەرەپ ‹‹ھۆكۈمەت يېتەكچىلىك قىلىش، كارخانىنى ئاساس قىلىش، بازار ھەرىكىتى، ئۆز ئارا مەنپەئەت يەتكۈزۈپ ئورتاق پايدا ئېلىش›› پىرىنسىپىغا ئاساسەن، سودا، مەبلەغ سېلىش، ئۇل مۇئەسسەسە قۇرۇلۇشى، بايلىق ئېچىش، بايلىقتىن پايدىلىنىش، يېزا ئىگىلىكى قاتارلىق ساھەلەردىكى ئەمەلىي ھەمكارلىقنى يەنىمۇ چوڭقۇرلاشتۇرۇپ، ئىككى دۆلەت خەلقىگە بەخت يارىتىشى كېرەك.

    ۋېن جياباۋ چاۋشيەن يېرىم ئارىلى ۋەزىيىتى توغرىسىدا مۇنداق دېدى: جۇڭگو ئالاقىدار تەرەپلەرنىڭ ئۇچرىشىش، سۆزلىشىشنى ساقلاپ، مۇناسىۋەتنى ياخشىلاپ، ئالتە تەرەپ سۆھبىتىنى تېزدىن قايتا باشلىشىنى ئۈمىد قىلىدۇ، بۇ، يېرىم ئارالنىڭ تىنچ – مۇقىملىقى ۋە شەرقىي شىمالىي ئاسىيانىڭ ئۇزاق ئەمىنلىكىگە پايدىلىق.

    سۈي يۇڭلىن مۇنداق دېدى: يېقىنقى يىللاردىن بۇيان، چاۋشيەن – جۇڭگو يۇقىرى قاتلىمىدىكىلەرنىڭ ئۆزئارا زىيارىتى كۆپەيدى، ئىككى دۆلەت بىر – بىرىنى باشتىن – ئاخىر قوللاپ، ئۆزئارا ياردەم قىلدى، ئەنئەنىۋى دوستلۇقنى جارى قىلدۇرۇپ، جۇڭگو بىلەن بولغان ئىتتىپاقلىق، ھەمكارلىقنى يەنىمۇ كۈچەيتىپ، چاۋشيەن – جۇڭگو مۇناسىۋىتىدە تېخىمۇ چوڭ تەرەققىياتلارنى قولغا كەلتۈرۈش چاۋشيەن پارتىيەسى ۋە ھۆكۈمىتىنىڭ تەۋرەنمەس مەيدانى. چاۋشيەن جۇڭگو بىلەن ھەمكارلىقنى كۈچەيتىپ، ئىقتىساد – سودا، ئۇل مۇئەسسەسە قۇرۇلۇشى قاتارلىق ساھەلەردىكى ئەمەلىي ھەمكارلىقنى چوڭقۇرلاشتۇرۇشنى خالايدۇ. جۇڭگو كارخانىچىلىرىنىڭ چاۋشيەنگە كېلىپ مەبلەغ سېلىپ ئىگىلىك تىكلىشىنى قارشى ئالىدۇ، چاۋشيەن ئۇلارنى قولاي شارائىت بىلەن تەمىنلەيدۇ. چاۋشيەن جۇڭگونىڭ ئۇزاقتىن بۇيان ئۆزلىرىگە قىلغان ياردىمى ۋە مەدىتىگە رەھمەت ئېيتىدۇ. يېرىم ئارالنى يادروسىزلاشتۇرۇشنى سۆھبەتلىشىش – كېڭىشىش ئارقىلىق ئىشقا ئاشۇرۇشتا چىڭ تۇرىدۇ، ئالتە تەرەپ سۆھبىتىنى شەرتسىز قايتا باشلاشنى تەشەببۇس قىلىدۇ، جۇڭگو بىلەن ئالاقە، ھەمكارلىقنى ساقلاشنى خالايدۇ.