مۇخبىرنىڭ يېقىندا دۆلەت مۇداپىئە پەن – تېخنىكا سانائىتى ئىدارىسىدىن ئىگىلىشىچە، ئېلىمىزنىڭ ‹‹ئاي پەرىسى – 2›› ناملىق ئاي شارىنى تەكشۈرۈش سۈنئىي ھەمراھى 1 مىليون 720 مىڭ كىلومېتىر يىراقلىقتىكى ئالەم بوشلۇقىدىن تۇنجى تۈركۈمدىكى ئىلمىي تەكشۈرۈش سانلىق مەلۇماتلىرىنى مۇۋەپپەقىيەتلىك يەتكۈزگەن. ھازىر ‹‹ئاي پەرىسى – 2›› ناملىق سۈنئىي ھەمراھنىڭ ئەھۋالى ياخشى، تۈرلۈك ئۇچۇش – كونترول ۋەزىپىلىرىنى ئىجرا قىلىشى نورمال ئىكەن.

    بۇ سانلىق مەلۇماتلار ‹‹ئاي پەرىسى – 2›› ناملىق سۈنئىي ھەمراھنىڭ ئاي شارىدىن لاگرانژې L2 نۇقتىسىغا ئۇچۇش جەريانىدا، قۇياش شامىلى ئىيونلۇق سېنزورى، قۇياش يۇقىرى ئېنېرگىيەلىك ئىيونلۇق سېنزورى، γ (گامما) نۇرى سپېكترومېتىرى قاتارلىق ئۈچ خىل ئۈنۈملۈك يۈك ئېچىلغاندا ئېرىشىلگەن بوشلۇق مۇھىتىنى تەكشۈرۈش سانلىق مەلۇماتلىرى. قۇرۇلۇشنىڭ ئومۇمىي ئورۇنلاشتۇرۇشىغا ئاساسەن، يېقىندا مۇۋاپىق پەيتتە يەنە بىر قىسىم ئۈنۈملۈك يۈك ئېچىلىپ، ئىلمىي تەكشۈرۈش ۋەزىپىسىنى ئىجرا قىلىدۇ.

    ئىگىلىنىشىچە، ‹‹ئاي پەرىسى – 2›› ناملىق سۈنئىي ھەمراھنىڭ L2 نۇقتىسىنى ئايلىنىپ كېلەر يىلىنىڭ ئاخىرىغىچە ئۇچۇشى مۆلچەرلەنگەن بولۇپ، ئېلىمىزنىڭ قۇرۇش ئالدىدا تۇرۇۋاتقان ئالەم بوشلۇقىنى تەكشۈرۈش پونكىتىنى بوشلۇق سىنىقى ۋە تەكشۈرۈش نىشانى بىلەن تەمىنلەپ، ئېلىمىزنىڭ يىراق ئارىلىقلىق ئۆلچەش – تىزگىنلەش ئىقتىدارىنى يەنىمۇ ئىلگىرىلىگەن ھالدا دەلىللەيدىكەن.

    15 – سېنتەبىر سائەت 9دىن 25 مىنۇت ئۆتكەندىن باشلاپ ‹‹ئاي پەرىسى – 2›› ناملىق سۈنئىي ھەمراھ سېكۇنتىغا 750 كىلوبىت سۈرئەتتە يۇقىرىدا ئېيتىلغان ئۈچ خىل ئۈنۈملۈك يۈك توپلىغان سانلىق مەلۇماتنىڭ ھەممىسىنى يەر شارىغا يەتكۈزۈپ، ئۈچ سائەتتىن ئارتۇق ۋاقىتتا جەمئىي يەتتە كىلومېگابىت سانلىق مەلۇمات يەتكۈزدى.

    25 – ئاۋغۇست سائەت 23تىن 27 مىنۇت ئۆتكەندە، ‹‹ئاي پەرىسى – 2›› ناملىق سۈنئىي ھەمراھ 77 كۈن ئۇچۇش ئارقىلىق، دۇنيا بويىچە تۇنجى قېتىم ئاي شارى ئوربىتىسىدىن چىقىپ، تىزگىنلەش ئارقىلىق لاگرانژې L2 نۇقتىسىنى ئايلىنىش ئوربىتىسىغا دەل كىردى. 20 – سېنتەبىرگىچە، ‹‹ئاي پەرىسى – 2›› ناملىق سۈنئىي ھەمراھ L2 نۇقتىسىنى 26 كۈن مۇقىم ئايلاندى.

    شىنخۇا ئاگېنتلىقى