شىنخۇا ئاگېنتلىقى، بېيجىڭ، 27 – ئىيۇل تېلېگراممىسى. ج ك پ مەركىزىي كومىتېتى، گوۋۇيۈەن يېقىندا ‹‹مەركىزىي كومىتېت تەشۋىقات بۆلۈمى، ئەدلىيە مىنىستىرلىقىنىڭ پۇقرالار ئارىسىدا قانۇن – تۈزۈم تەشۋىق – تەربىيەسىنى قانات يايدۇرۇشنىڭ 6 – بەش يىللىق يىرىك پىلانى››نى تارقاتتى ھەم ئۇقتۇرۇش چىقىرىپ، جايلار، تارماقلاردىن ئەستايىدىل ئىزچىللاشتۇرۇش ۋە يولغا قويۇشنى تەلەپ قىلدى.

    ئۇقتۇرۇشتا مۇنۇلار تەلەپ قىلىندى: ھەر دەرىجىلىك پارتكوم ۋە ھۆكۈمەتلەر قانۇن – تۈزۈم تەشۋىق – تەربىيەسىنى ھازىرقى ئىقتىسادىي، ئىجتىمائىي تەرەققىيات پىلانىغا، پارتكوم ۋە ھۆكۈمەتنىڭ نىشانلىق باشقۇرۇش دائىرىسىگە كىرگۈزۈپ، پارتكوم رەھبەرلىك قىلىدىغان، خەلق قۇرۇلتىيى دائىمىي كومېتىتى نازارەتچىلىك قىلىدىغان، ھۆكۈمەت يولغا قويىدىغان رەھبەرلىك تۈزۈلمىسىنى يەنىمۇ مۇكەممەللەشتۈرۈپ، 6 – بەش يىللىق قانۇن ساۋاتلىرىنى ئومۇملاشتۇرۇش يىرىك پىلانىنىڭ نىشان، ۋەزىپىلىرىنى ھەقىقىي ئەمەلىيلەشتۈرۈشكە كاپالەتلىك قىلىشى كېرەك. ھەر دەرىجىلىك رەھبىرىي كادىرلار قانۇننى ئۆگىنىش، قانۇنغا بويسۇنۇش، قانۇننى تەتبىقلاشتا باشلامچى بولۇپ، قانۇن بويىچە ھاكىمىيەت يۈرگۈزۈش، قانۇن بويىچە مەمۇرىيەت يۈرگۈزۈش، قانۇن بويىچە تەدبىر بەلگىلەش ئىدىيەسى ۋە ئىقتىدارىنى يەنىمۇ ئۆستۈرۈشى كېرەك؛ مەمۇرلار مەسئۇلىيىتىنى ئادا قىلىشقا ئائىت مەخسۇس قانۇن بىلىملىرىنى ئۆگىنىشنى ھەقىقىي كۈچەيتىپ، مەسىلىلەرنى قانۇن ۋاسىتىسى بىلەن ھەل قىلىش ئىقتىدارىنى ئۈزلۈكسىز ئۆستۈرۈشى كېرەك. ياشلار، ئۆسمۈرلەرگە بولغان قانۇن – تۈزۈم تەشۋىق – تەربىيەسىنى قاراتمىلىق قانات يايدۇرۇپ، ياشلار، ئۆسمۈرلەرنى قانۇن ئىدارە قىلىش ئېڭىنى ئۆستۈرۈشكە، قانۇن – ئىنتىزامغا رىئايە قىلىش ئاڭلىقلىقىنى يېتىلدۈرۈشكە يېتەكلەش كېرەك. قانۇن – تۈزۈم تەشۋىق – تەربىيەسى بىلەن قانۇن ئىدارە قىلىش ئەمەلىيىتىنى بىرلەشتۈرۈپ، قانۇن ئىدارە قىلىشنى چوڭقۇر ئىلگىرى سۈرۈپ، پۈتكۈل جەمئىيەتنىڭ قانۇن ئىدارە قىلىش بويىچە باشقۇرۇش سەۋىيەسىنى ئومۇميۈزلۈك ئۆستۈرۈش كېرەك. قانۇن – تۈزۈم تەشۋىق – تەربىيەسىنى چوڭقۇر قانات يايدۇرۇش ئارقىلىق، قانۇن ساۋاتلىرىنى ئومۇملاشتۇرۇپ، قانۇن ئىدارە قىلىش روھىنى ئەۋج ئالدۇرۇش، سوتسىيالىستىك قانۇن ئىدارە قىلىش ئىدىيەسىنى تۇرغۇزۇپ، سوتسىيالىستىك قانۇن ئىدارە قىلىش مەدەنىيىتىنى يېتىلدۈرۈپ، قانۇننى ئاڭلىق ئۆگىنىدىغان، قانۇنغا ئاڭلىق بويسۇنىدىغان، قانۇننى ئاڭلىق تەدبىقلايدىغان ئىجتىمائىي كەيپىياتنى شەكىللەندۈرۈپ، دۆلەتنى قانۇن ئىدارە قىلىش قەدىمىنى تېزلىتىش، ئىقتىسادىي، ئىجتىمائىي ئىشلارنى ھەم ياخشى، ھەم تېز راۋاجلاندۇرۇش ئۈچۈن ياخشى قانۇن ئىدارە قىلىش مۇھىتى يارىتىش كېرەك.