شىنخۇا ئاگېنتلىقى، بېيجىڭ، 7 – ئىيۇل تېلېگراممىسى. جۇڭگو ھۆكۈمەت تورىنىڭ 7 – ئىيۇل ئېلان قىلغان ‹‹گوۋۇيۈەننىڭ ئۇنىۋېرسال دوختۇرلۇق تۈزۈمى توغرىسىدىكى يېتەكچى پىكرى››گە ئاساسلانغاندا، 2020 – يىلى دۆلىتىمىزدە ئۇنىۋېرسال دوختۇرلۇق تۈزۈمى يولغا قويۇلۇپ، شەھەر، يېزىلاردىكى ھەر 10 مىڭ ئاھالىگە ئاساسەن ئىككىدىن ئۈچكىچە لاياقەتلىك ئۇنىۋېرسال دوختۇر توغرا كەلتۈرۈلۈپ، خەلقنىڭ ئاساسىي داۋالىنىش، سەھىيە مۇلازىمەت ئېھتىياجىغا ئاساسىي جەھەتتىن ماسلاشتۇرۇلىدىكەن.

    ‹‹يېتەكچى پىكىر››دە، ئۇنىۋېرسال دوختۇر بىلەن ئاھالىلەرنىڭ توختاملىق مۇلازىمەت مۇناسىۋىتى ئورنىتىشىنى ئىلگىرى سۈرۈش تەلەپ قىلىندى. ئاساسىي قاتلامدىكى داۋالاش، سەھىيە ئاپپاراتلىرى ياكى ئۇنىۋېرسال دوختۇرلار ئاھالىلەر بىلەن بەلگىلىك مۇددەتلىك مۇلازىمەت كېلىشىمى ئىمزالاپ، نىسبەتەن مۇقىم توختام مۇلازىمەت مۇناسىۋىتى ئورنىتىدۇ، مۇلازىمەت مەسئۇلىيىتى ئۇنىۋېرسال دوختۇرغا ئەمەلىيلەشتۈرۈلىدۇ. سۇغۇرتىلانغۇچىلار ئۆز ناھىيە (شەھەر، رايون) سىدىكى داۋالىنىش سۇغۇرتىسى بويىچە بېكىتىلگەن مۇلازىمەت ئاپپاراتى ياكى ئۇنىۋېرسال دوختۇرلار ئىچىدىن ئۆز ئالدىغا تاللاپ توختام تۈزسە، توختام مۇددىتى توشقاندىن كېيىن توختامنى داۋاملىق ئۇزارتسا ياكى باشقا دوختۇر تاللاپ توختام تۈزسە بولىدۇ.

    ‹‹يېتەكچى پىكىر››دە مۇنداق دېيىلدى: ئۇنىۋېرسال دوختۇرلۇق تۈزۈمىنىڭ مۇكەممەللەشتۈرۈلۈشىگە ئەگىشىپ، ھەر بىر ئۇنىۋېرسال دوختۇرنىڭ توختاملىق مۇلازىمەت نىشانى 2000 كىشى ئەتراپىدا تىزگىنلىنىدۇ، بۇنىڭ ئىچىدە، ياشانغانلار، ئاستا خاراكتېرلىك كېسىلى بارلار، مېيىپ قاتارلىق ئالاھىدە كىشىلەر بەلگىلىك نىسبەتنى ئىگىلەيدۇ.

    ئۇنىۋېرسال دوختۇر ئۇنىۋېرسال ئىقتىدارى بىر قەدەر يۇقىرى تېببىي ئىختىساسلىقلار ھېسابلىنىدۇ، ئۇلار، ئاساسلىقى ئاساسىي قاتلامدا ئالدىنى ئېلىش – ساقلىقنى ساقلاش، كۆپ ھەم دائىم كۆرۈلىدىغان كېسەللەرنى داۋالاش ۋە باشقا دوختۇرخانىغا يۆتكەپ بېرىش، ئاغرىقلارنىڭ سالامەتلىكىنى ئەسلىگە كەلتۈرۈش ۋە ئاستا خاراكتېرلىك كېسىلى بار ئاغرىقلارنى باشقۇرۇش، ساغلاملىقنى باشقۇرۇش بىر گەۋدە قىلىنغان مۇلازىمەتلەرنى ئۈستىگە ئالغان بولۇپ، ئاھالىلەرنىڭ سالامەتلىكىنى ‹‹قوغدىغۇچىلار›› دەپ تەرىپلەنمەكتە. ‹‹يېتەكچى پىكىر››دە: ئۇنىۋېرسال دوختۇرلۇق تۈزۈمىنى ئورنىتىپ، ئۇنىۋېرسال دوختۇرلارنىڭ رولىنى ياخشى جارى قىلدۇرۇش، ئالدىنى ئېلىش ئاساسىي فاڭجېنىنى تولۇق ئەمەلىيلەشتۈرۈپ، خەلققە تېخىمۇ ياخشى مۇلازىمەت قىلىشقا پايدىلىق، دەپ كۆرسىتىلدى.

    شىنخۇا ئاگېنتلىقى، بېيجىڭ، 7 – ئىيۇل تېلېگراممىسى. 7 – ئىيۇل ئېلان قىلىنغان ‹‹گوۋۇيۈەننىڭ ئۇنىۋېرسال دوختۇرلۇق تۈزۈمى توغرىسىدىكى يېتەكچى پىكرى››دە مۇنداق دېيىلدى: ئۇنىۋېرسال دوختۇرلار بىلەن ئاھالىلەرنىڭ توختاملىق مۇلازىمەت مۇناسىۋىتى ئورنىتىشىنى يولغا قويۇش كېرەك. بۇ، دۆلىتىمىز ئاھالىلىرىنىڭ بۇنىڭدىن كېيىن ئۆزلىرىنىڭ ‹‹مەخسۇس ئۇنىۋېرسال دوختۇرى›› بولىدىغانلىقىدىن ھەم ‹‹ساغلاملىق قوغدىغۇچىلىرى››نى ئۆز ئالدىغا تاللىيالايدىغانلىقىدىن دېرەك بېرىدۇ.

    يېتەكچى پىكىردە مۇنداق دېيىلدى: ئاساسىي قاتلام سەھىيە ئاپپاراتلىرى ياكى ئۇنىۋېرسال دوختۇرلار ئاھالىلەر بىلەن بەلگىلىك مۇددەتلىك مۇلازىمەت كېلىشىمى ئىمزالاپ، نىسبەتەن مۇقىم توختاملىق مۇلازىمەت مۇناسىۋىتى ئورنىتىدۇ، مۇلازىمەت مەسئۇلىيىتى ئۇنىۋېرسال دوختۇرغا ئەمەلىيلەشتۈرۈلىدۇ. سۇغۇرتىلانغۇچىلار ئۆز ناھىيە (شەھەر، رايون)سىدىكى داۋالىنىش سۇغۇرتىسى بويىچە بېكىتىلگەن مۇلازىمەت ئاپپاراتى ياكى ئۇنىۋېرسال دوختۇرلار ئىچىدىن ئۆز ئالدىغا تاللاپ توختام تۈزسە، مۇددەت توشقاندىن كېيىن توختامنى ئۇزارتسا ياكى باشقا دوختۇر تاللاپ توختام تۈزسە بولىدۇ. سەھىيە مەمۇرىي ئورۇنلىرى ۋە داۋالىنىش سۇغۇرتىسىنى بېجىرىش ئاپپاراتلىرى سۇغۇرتىلانغۇچىلارنىڭ تاللىشىغا ئاساسەن، بېكىتىلگەن مۇلازىمەت ئاپپاراتى ياكى دوختۇرلار بىلەن كېلىشىم ئىمزالاپ، ئۇنىۋېرسال دوختۇرلار بىلەن ئاھالىلەرنىڭ مۇلازىمەت كېلىشىمىنىڭ ئەمەلىيلىشىشىگە كاپالەتلىك قىلىشى كېرەك.