دۆلەت تەرەققىيات – ئىسلاھات كومىتېتىنىڭ ئاشكارىلىشىچە، بېيجىڭ، تيەنجىن، جىلىن، جياڭسۇ قاتارلىق 18 ئۆلكە، شەھەر، ئاپتونوم رايون ئىجتىمائىي پاناھلاندۇرۇش ۋە كاپالەتلەندۈرۈش ئۆلچىمىنى مال باھاسىنىڭ ئۆرلىشى بىلەن ماسلاشتۇرۇش مېخانىزمى ئورناتقان؛ خېبېي، سەنشى، لياۋنىڭ، گۇاڭشى، يۈننەن قاتارلىق بەش ئۆلكە، ئاپتونوم رايون بىلەن شىنجاڭ ئىشلەپچىقىرىش – قۇرۇلۇش بىڭتۈەنى 8 – ئاينىڭ ئاخىرىدىن ئىلگىرى مۇشۇنداق مېخانىزم ئورنىتىدىكەن، قالغان سەككىز ئۆلكە، شەھەر يىل ئاخىرىغىچە ئورنىتىدىكەن.

    ئۆتكەن يىلى يىل ئاخىرىدا، مال باھاسى ئۆرلەپ كېتىشىنىڭ تۆۋەن كىرىملىك ئائىلىلەرگە ئېلىپ كەلگەن تەسىرىنى يېنىكلىتىش ئۈچۈن، دۆلەت تەرەققىيات – ئىسلاھات كومىتېتى قاتارلىق بەش مىنىستىرلىق ۋە كومىتېت بىرلىكتە تۆۋەن كىرىملىك ئائىلىلەرنى ئىجتىمائىي پاناھلاندۇرۇش ۋە كاپالەتلەندۈرۈش ئۆلچىمىنى مال باھاسى بىلەن ماسلاشتۇرۇش مېخانىزمى ئورنىتىش ھەققىدە ئۇقتۇرۇش چىقاردى. ماسلاشتۇرۇش مېخانىزمى تۈزۈمىدە بەلگىلىنىشىچە، مال باھاسى قىسقا مۇددەت ئۆرلىگەندە، ھۆكۈمەت قىيىنچىلىقى بار ئاممىغا ۋاقتىنچە باھا تولۇقلىمىسى تارقىتىپ بېرىدىكەن؛ مال باھاسى ئۈزلۈكسىز ئۆرلىسە، ھۆكۈمەت ئىجتىمائىي پاناھلاندۇرۇش ۋە پاراۋانلىق ئۆلچىمىنى ئۆستۈرىدىكەن.

    ئىگىلىنىشىچە، ماسلاشتۇرۇش مېخانىزمى ئورناتقان 18 ئۆلكىدە نەپىقە بېرىش ئوبيېكتى، شەھەر، يېزىلاردىكى ئەڭ تۆۋەن تۇرمۇش كاپالىتى ئوبيېكتى، يېزىلاردىكى بەشتە كاپالەتلىك بېقىلىش ئوبيېكتى ۋە ئىشسىزلىق سۇغۇرتىسى ئالىدىغانلار ماسلاشتۇرۇش مېخانىزمى دائىرىسىگە كىرگۈزۈلگەن، جياڭسۇ، جېجياڭ، خەينەن، سىچۈەن، شەنشى، گەنسۇ، تيەنجىن قاتارلىق جايلار ئۆز يېرىنىڭ ئەھۋالىغا ئاساسەن كاپالەتلەندۈرۈش دائىرىسىنى كېڭەيتكەن.

    ماسلاشتۇرۇش مېخانىزمىنى يولغا قويۇش شەرتىدە، فۇجيەن، جياڭشى، خۇنەن، گۇاڭدۇڭ، گۈيجۇ قاتارلىق ئالتە ئۆلكىدە شەھەر، بازار ئاھالىلىرى ئاساسىي تۇرمۇش خىراجىتىنىڭ باھا كۆرسەتكۈچى (ياكى ئاھالىلەرنىڭ ئىستېمال باھا كۆرسەتكۈچى) ئوخشاش مەزگىلدىكىگە سېلىشتۇرغاندا ئۇدا ئۈچ ئاي %3كە يەتكەن ياكى ئېشىپ كېتىش ئەھۋالى ماسلاشتۇرۇش مېخانىزمىنىڭ يولغا قويۇلۇش شەرتى قىلىنغان، قالغان ئۆلكىلەردە مۇناسىۋەتلىك باھا كۆرسەتكۈچىدىن %4 ياكى %5تىن ئاشقان ئەھۋالدا يولغا قويۇش شەرت قىلىنغان.

    جايلارنىڭ ۋاقىتلىق تولۇقلىما بېرىش ئۆلچىمى ئوخشىمايدىغان بولۇپ، جىلىن، خۇبېي، فۇجيەن، جياڭشىدە بىر ئادەمنىڭ ھەر ئايدىكى تولۇقلىما پۇلى ئون يۈەندىن، جېجياڭدا 30 يۈەندىن ئاز بولماسلىقى بەلگىلەنگەن؛ تيەنجىن، خەينەن باھا كۆرسەتكۈچىنىڭ ئۆرلىشىگە ئاساسەن تولۇقلىما ئۆلچىمىنى بېكىتكەن، تيەنجىندە كۆرسەتكۈچ ئوخشاش مەزگىلدىكىدىن ئۆرلەپ %3 ياكى %5كە يەتكەندە ھەر بىر ئادەمگە ھەر ئايدا 20 يۈەن تولۇقلىما بېرىش، %5تىن %7كىچە بولغاندا 30 يۈەن تولۇقلىما بېرىش ئۆلچىمى بېكىتىلگەن؛ جياڭسۇ ۋاقىتلىق تولۇقلىما ئۆلچىمىنى يەرلىكنىڭ شۇ پەسىلنىڭ ئاخىرىدىكى ئەڭ تۆۋەن تۇرمۇش كاپالىتى ئۆلچىمىنىڭ %25ى قىلىپ بېكىتكەن.

    ‹‹جۇڭگو تەرمىلەر گېزىتى››دىن