شىنخۇا ئاگېنتلىقى، بېيجىڭ، 5 – ئىيۇل تېلېگراممىسى. دۆلەت ئاپەتنىڭ زىيىنىنى يېنىكلىتىش كومىتېتى ئىشخانىسى 5 – ئىيۇل ئېلان قىلغان ئاپەت ئەھۋالى توغرىسىدىكى خەۋەردە 1 – ئىيۇلدىن بۇيان 16 ئۆلكىدىكى 2 مىليوندىن ئارتۇق كىشىنىڭ قارا يامغۇر، كەلكۈن، مۆلدۈر ئاپىتىنىڭ زىيىنىغا ئۇچرىغانلىقى ئېيتىلدى.

    1 – ئىيۇلدىن بۇيان، غەربىي شىمال رايونىنىڭ شەرقى، شىمالىي جۇڭگو ۋە خۇاڭخې، خۇەيخې دەرياسى ھەۋزىسى، شەرقىي شىمال، غەربىي جەنۇب قاتارلىق جايلاردا كەڭ دائىرىلىك قارا يامغۇر ياغدى، قىسمەن جايلاردا گۈلدۈرمامىلىق يامغۇر ۋە بورانلىق ھاۋارايى كۆرۈلدى. خېبېي، سەنشى، جىلىن، خېيلۇڭجياڭ، ئەنخۇي، شەندۇڭ، خېنەن، خۇبېي، سىچۈەن، يۈننەن، شىزاڭ، شەنشى، گەنسۇ، چىڭخەي، نىڭشيا، شىنجاڭ قاتارلىق 16 ئۆلكە(ئاپتونوم رايون)، 68 شەھەر(ئاپتونوم ئوبلاست)، 161 ناھىيە(شەھەر، رايون) ۋە شىنجاڭ ئىشلەپچىقىرىش – قۇرۇلۇش بىڭتۈەنىنىڭ قىسمەن تۈەن – مەيدانلىرى كەلكۈن، تاغ گۈمۈرۈلۈش، لاتقا – شېغىللىق ئېقىن ۋە مۆلدۈر ئاپىتىنىڭ زىيىنىغا ئۇچرىدى.

    دۆلەت ئاپەتنىڭ زىيىنىنى يېنىكلىتىش كومىتېتى ئىشخانىسىنىڭ ئىستاتىستىكىسىغا قارىغاندا، 5 – ئىيۇل سائەت 15كىچە، 2 مىليون 14 مىڭ كىشى بۇ قېتىمقى قارا يامغۇر، كەلكۈن، مۆلدۈر ئاپىتىنىڭ زىيىنىغا ئۇچرىغان، 15 كىشى قازا قىلغان، ئالتە كىشىنىڭ ئىز – دېرىكى بولمىغان، 28 مىڭ كىشى جىددىي يۆتكەپ ئورۇنلاشتۇرۇلغان، بىۋاسىتە ئىقتىسادىي زىيان 2 مىليارد 20 مىليون يۈەنگە يەتكەن.