لى جىنسۇڭ، لياڭ فاڭ، چېن شياۋدەن خەۋىرى : ئۈرۈمچى تاموژنىسىنىڭ ئىستاتىستىكىسىغا قارىغاندا، بۇ يىل 1 – ئايدىن 4 – ئايغىچە شىنجاڭدىكى پورتلار ئارقىلىق ئېكسپورت قىلىنغان ئاپتوموبىل 3213كە، قىممىتى 127 مىليون دوللارغا يېتىپ، بۇلتۇرقى شۇ مەزگىلدىكىدىن %93 ۋە %76 ئاشقان.

    قورغاس پورتى ھازىر شىنجاڭدىكى ئەڭ چوڭ ئاپتوموبىل ئېكسپورت پورتىغا ئايلانغان. بۇ يىل 1 – ئايدىن 4 – ئايغىچە قورغاس پورتى ئارقىلىق ئېكسپورت قىلىنغان ئاپتوموبىل 2305كە، قىممىتى 93 مىليون دوللارغا يېتىپ، بۇلتۇرقى شۇ مەزگىلدىكىدىن ئايرىم – ئايرىم %73ۋە %63 ئاشقان، شۇنىڭدەك سانى، تۈرى، زاۋۇتى كۆپ بولۇشتەك ‹‹ئۈچ كۆپ›› بولۇش ئالاھىدىلىكىنى شەكىللەندۈرگەن.

    ئۈرۈمچى تاموژنىسىنىڭ ئىستاتىستىكىسىغا قارىغاندا، دۆلىتىمىزدە ئىشلەنگەن ئاپتوموبىللارنىڭ ئوتتۇرا ئاسىيا دۆلەتلىرىگە كىرىش سۈرئىتى تېزلىگەن، بۇنىڭ ئاساسىي سەۋەبى: يېقىنقى يىللاردىن بۇيان، دۆلىتىمىزدە ئاپتوموبىل سانائىتىنىڭ تەرەققىياتى تېز بولۇپ، كەسىپ تەرەققىياتى تەدرىجىي پىشىپ يېتىلگەن، ئاپتوموبىل ئىشلەپچىقىرىش مىقدارى تېز ئېشىپ، ئېكسپورت كۆلىمى سىجىل كېڭەيگەن. قازاقىستان، قىرغىزىستان قاتارلىق قوشنا دۆلەتلەر ئىقتىسادىنىڭ ياخشىلىنىشىغا ئەگىشىپ، ئاپتوموبىل ئىستېمال ئېھتىياجى كۈنسېرى ئېشىپ، دۆلىتىمىزدە ئىشلەنگەن ئاپتوموبىللارنى ئېكسپورت قىلىش ئۈچۈن ياخشى سودا پۇرسىتى ياراتقان.