شىنخۇا ئاگېنتلىقى، شاڭخەي، 18 – ماي تېلېگراممىسى. جۇڭگو سۈنئىي ھەمراھ ئارقىلىق يول باشلاش سىستېمىسى مەخسۇس تۈر باشقۇرۇش بۆلۈمىنىڭ مۇدىرى رەن چېڭچى 18 – ماي شاڭخەيدە ئۆتكۈزۈلگەن 2 – نۆۋەتلىك جۇڭگو سۈنئىي ھەمراھ ئارقىلىق يول باشلاش سىستېمىسى ئىلمىي مۇھاكىمە يىللىق يىغىنىدا مۇنداق دېدى: ئېلىمىز تۈرلۈك سىياسەت، تەدبىرلەرنى پائال يولغا قويۇپ، ‹‹چۆمۈچ يۇلتۇز›› يول باشلاش سىستېمىسى قۇرۇلۇشىنى ھەم ياخشى، ھەم تېز ئىلگىرى سۈرىدۇ.

    ئىگىلىنىشىچە، ئېلىمىز ‹‹ئۈچ قەدەمدە مېڭىش›› ئىستراتېگىيەسىدە چىڭ تۇرۇپ، ‹‹چۆمۈچ يۇلتۇز›› يول باشلاش سىستېمىسى پىلانىنى ئىشقا ئاشۇرۇۋېتىپتۇ. بىرىنچى قەدەمدە، 2003 – يىلى ئۈچ سۈنئىي ھەمراھتىن تەركىب تاپقان ‹‹چۆمۈچ يۇلتۇز›› سۈنئىي ھەمراھ ئارقىلىق يول باشلاش تەجرىبە سىستېمىسى بەرپا قىلىنىپتۇ. ئىككىنچى قەدەمدە، 2012 – يىلى ئەتراپىدا، ئون نەچچە سۈنئىي ھەمراھتىن تەركىب تاپقان ‹‹چۆمۈچ يۇلتۇز›› رايون سۈنئىي ھەمراھ ئارقىلىق يول باشلاش سىستېمىسى بەرپا قىلىنىدىكەن. ئۇچىنچى قەدەمدە، 2020 – يىلى 30 نەچچە سۈنئىي ھەمراھتىن تەركىب تاپقان ‹‹چۆمۈچ يۇلتۇز›› يەر شارى سۈنئىي ھەمراھ ئارقىلىق يول باشلاش سىستېمىسى بەرپا قىلىنىدىكەن.