شىنخۇا ئاگېنتلىقى، بېيجىڭ، 18 – ماي تېلېگراممىسى. گوۋۇيۈەن زۇڭلىسى ۋېن جياباۋنىڭ رىياسەتچىلىكىدە 18 – ماي گوۋۇيۈەننىڭ دائىمىي يىغىنى ئېچىلىپ، ‹‹سەنشيا قۇرۇلۇشىنىڭ كېيىنكى باسقۇچلۇق خىزمەت پىلانى›› ۋە ‹‹چاڭجياڭ دەرياسىنىڭ ئوتتۇرا، تۆۋەن ئېقىنى ھەۋزىسىدىكى سۇنىڭ بۇلغىنىشىنىڭ ئالدىنى ئېلىش ۋە ئۇنى تۈزەش يىرىك پىلانى›› مۇزاكىرە قىلىنىپ ماقۇللاندى.

    يىغىندا مۇنداق تەكىتلەندى: ‹‹سەنشيا قۇرۇلۇشىنىڭ كېيىنكى باسقۇچلۇق خىزمەت پىلانى››نىڭ ئاساسىي نىشانىغا يېتىش ئۈچۈن، بىرىنچى، سۇ ئامبىرى رايونىنىڭ ئىقتىسادىي، ئىجتىمائىي تەرەققىياتىنى ئىلگىرى سۈرۈپ، كۆچمەنلەرنى مۇقىم ئولتۇراقلاشتۇرۇپ بېيىتىش كېرەك. ئىككىنچى، سۇ ئامبىرى رايونىنىڭ ئېكولوگىيەلىك مۇھىت قۇرۇلۇشىنى كۈچەيتىش ۋە ئۇنى قوغداش كېرەك. ئۈچىنچى، سۇ ئامبىرى رايونىدا گېئو ئاپەتلەرنىڭ ئالدىنى ئېلىش ۋە ئۇنى تۈزەشنى كۈچەيتىش كېرەك. تۆتىنچى، سەنشيا قۇرۇلۇشىدا سۇ ساقلانغاندىن كېيىن، ئۇنىڭ چاڭجياڭ دەرياسىنىڭ ئوتتۇرا، تۆۋەن ئېقىنىغا ناچار تەسىر كۆرسىتىشىنى مۇۋاپىق بىر تەرەپ قىلىش كېرەك. بەشىنچى، سەنشيا قۇرۇلۇشىنى ھەر تەرەپلىمە باشقۇرۇش ئىقتىدارىنى ئۆستۈرۈش كېرەك. ئالتىنچى، كەلكۈننى بايلىق مەنبەسىگە ئايلاندۇرۇش، سۇ ئامبىرىنى سەرخىللاشتۇرۇپ تەڭشەش، سۇ بىلەن تەمىنلەش ئۈنۈمىنى كېڭەيتىشنى ئاساسىي نىشان قىلىپ، سەنشيا قۇرۇلۇشىنىڭ كەلكۈننىڭ ئالدىنى ئېلىش، توك تارقىتىش، سۇ تىرانسپورتى، ئېكولوگىيە ۋە سۇ بايلىقىنى تەقسىملەش قاتارلىق ئۇنىۋېرسال ئۈنۈمىنى زورايتىپ، ئۇنىڭ دۆلەتنىڭ سۇ بىخەتەرلىكى ۋە ئېلېكتىر تورىنى ئايلاندۇرۇش بىخەتەرلىكى جەھەتلەردىكى ئىستراتېگىيەلىك كاپالەت ئىقتىدارىنى ئۆستۈرۈش كېرەك.

    يىغىندا يەنە ‹‹جۇڭخۇا خەلق جۇمھۇرىيىتىنىڭ ھەربىي خىزمەت ئۆتەش قانۇنى››نى تۈزىتىش لايىھەسى مۇزاكىرە قىلىنىپ، پىرىنسىپ جەھەتتىن ماقۇللاندى ھەم يەنىمۇ تۈزەتكەندىن كېيىن، گوۋۇيۈەن، مەركىزىي ھەربىي كومىتېت نامىدىن مەملىكەتلىك خەلق قۇرۇلتىيىنىڭ قاراپ چىقىشىغا سۇنۇش قارار قىلىندى.