ھىندىستان مەتبۇئات تىرىستىنىڭ 20 – ئاپرېلدىكى خەۋىرىگە قارىغاندا، ھىندىستان مىللىي مەجلىس پارتىيەسىدىن بولغان پارلامېنت ئەزاسى ۋە بۇ پارتىيەنىڭ ئاخبارات باياناتچىسى مانىشى تېۋارى يېقىندا ھۆكۈمەتتىن 1962 – يىلىدىكى ھىندىستان–جۇڭگو چېگرا توقۇنۇشىنى تەكشۈرۈش مەزمۇنى قىلغان ‹‹خېندېرسون برۇكېس دوكلاتى››نى ئېلان قىلىشنى تەلەپ قىلغان. بۇ تەلەپ 19 – ئاپرېل ھىندىستان دۆلەت مۇداپىئە مىنىستىرى ئانتونىنىڭ رەت قىلىشىغا ئۇچرىغان.
ئانتونى: 1962 – يىلىدىكى ھىندىستان – جۇڭگو چېگرا توقۇنۇشىدا ھىندىستاننىڭ مەغلۇپ بولۇش سەۋەبى تەكشۈرۈش مەزمۇنى قىلىنغان ‹‹خېندېرسون برۇكېس دوكلاتى›› مەخپىيەت دەرىجىسى ئەڭ يۇقىرى ھۆججەت، دەپ يازما جاۋاپ قايتۇردى. ئاشكارىلاشقا مۇۋاپىق كەلمەسلىكنىڭ سەۋەبى ھەققىدە: بۇ تەكشۈرۈش ھىندىستان ئارمىيەسىنىڭ ئىچكى قىسىمىدا ئېلىپ بېرىلغان، مەزمۇنى ئىنتايىن سەزگۈر مەسىلىلەرگە چېتىلىدۇ، ئۇنىڭ ئۇستىگە ھېلىمۇ ئەمەلىي پايدىلىنىش قىممىتى بار، سىرتقا ئاشكارىلاشقا مۇۋاپىق كەلمەيدۇ، دېدى.
‹‹ھىندىستان ۋاقتى›› گېزىتىنىڭ خەۋىرىدە ئېيتىلىشىچە، نەچچە يىلنىڭ ئالدىدا، ھىندىستاندىكى مەلۇم مۇستەقىل كومىتېت ھۆكۈمەتتىن ھىندىستان خەلقىگە ھەقىقىي ئەھۋالنى چۈشەندۈرۈش ئۈچۈن، ھىندىستان قاتناشقان ئۇرۇشلارنىڭ تارىخىنى جامائەتچىلىككە ئاشكارىلاشنى كۈچلۈك تەلەپ قىلغان. بۇنىڭدىن باشقا، ھىندىستاندىكى بەزى تارىخشۇناس ۋە تەتقىقاتچىلارمۇ ‹‹ھىندىستانغا شۇ چاغدا نېمە بولغان›› لىقىنى تەتقىق قىلىش ئۈچۈن، مۇشۇنىڭغا ئوخشاش تەلەپنى ئوتتۇرىغا قويغان. بىراق ھىندىستان دۆلەت مۇداپىئە مىنىستىرلىقى ھازىرغىچە پەقەت 1948 – يىلىدىكى كەشمىر ۋە چاممۇ ھەربىي ھەركىتىنىڭ تارىخىنىلا ئاشكارىلىغان. 1962 – يىلى، 1965 – يىلى، 1971 – يىلىدىكى ھىندىستان قاتناشقان بىر قىسىم ئۇرۇشلارنى ئۆز ئىچىگە ئالغان نۇرغۇن ۋەقەلەرنىڭ 30 يىللىق مەخپىيەتلىك ساقلاش مۇددىتى توشقان بولسىمۇ، ھىندىستان ھەربىي تەرەپ يەنىلا جامائەتچىلىككە ئاشكارىلاشنى رەت قىلغان. ھىندىستان ‹‹تېلېگراف خەۋەرلىرى›› گېزىتىنىڭ ‹‹1962 – يىلىدىكى ئىشلارنىڭ يەنىلا يوشۇرۇن تۇتۇلۇۋاتقانلىقى كىشىنى ئۆكۈندۈرىدۇ›› ماۋزۇلۇق خەۋىرىدە ئېيتىلىشىچە، بۇرۇن ئەنگلىيە مۇخبىرى بولغان نېۋىل ماكىسۋېل بۇ دوكلاتنىڭ مەزمۇنىدىن خەۋەردار بولغانلىقىنى ئېيتقان. ئۇ مۇنداق دېگەن: ھىندىستاننىڭ ئەينى چاغدىكى سىياسىي ۋە ھەربىي رەھبەرلىك قاتلىمى جۇڭگو بىلەن بولغان چېگرا توقۇنۇشىنى پەيدا قىلغۇچىلاردۇر، ئۇلار بۇ ئىشقا مەسئۇل بولۇشى كېرەك.
‹‹ھىندىستان ۋاقتى›› گېزىتىنىڭ تەھلىلىدە مۇنداق دېيىلدى: بۇ دوكلاتتا ئەينى چاغدىكى ھىندىستان ھۆكۈمىتى ۋە ھەربىي تەرەپ قاتتىق تەنقىدلەنگەن مەزمۇنلارنىڭ بولغانلىقى ھىندىستان ھەربىي تەرەپنىڭ دوكلاتنى ئاشكارىلاشنى رەت قىلىشىدىكى قىسمەن سەۋەب.
‹‹يەر شارى ۋاقىت گېزىتى›› دىن