دىپلوماتىيە مىنىستىرلىقىمىزنىڭ باياناتچىسى مۇنداق دېدى:

    دالاي بۆلگۈنچىلىك تەشەببۇسىدىن ۋاز كېچىپ، بۆلگۈنچىلىك ھەرىكەتلىرىنى توختىتىشى كېرەك

    شىنخۇا ئاگېنتلىقى، بېيجىڭ، 11 – مارت تېلېگراممىسى. دىپلوماتىيە مىنىستىرلىقىمىزنىڭ باياناتچىسى چىن گاڭ يېقىندا بەزى دۆلەتلەردە يۈز بەرگەن ‹‹شىزاڭ مۇستەقىللىقى›› بۆلگۈنچىلىرىنىڭ جۇڭگونىڭ چەت ئەلدىكى ئاپپاراتلىرىغا بۆسۈپ كىرمەكچى بولغانلىقىغا قارىتا 11 – مارت مۇنداق دېدى: چەت ئەلدىكى ‹‹شىزاڭ مۇستەقىللىقى›› بۆلگۈنچىلىرىنىڭ جۇڭگونى پارچىلاش سۇيىقەستى ئىشقا ئاشمىدى، ھازىرمۇ ئىشقا ئاشمايدۇ، بۇنىڭدىن كېيىنمۇ ئىشقا ئاشمايدۇ.

    10 – مارتنىڭ ئالدى – كەينىدە، ھىندىستان قاتارلىق بىر قىسىم دۆلەتلەردە چەت ئەلدىكى ‹‹شىزاڭ مۇستەقىللىقى›› بۆلگۈنچىلىرىنىڭ جۇڭگونىڭ ئالاقىدار دۆلەتلەردىكى دىپلوماتىيە ئاپپاراتلىرىغا بۆسۈپ كىرىشكە ئۇرۇنۇش ئەھۋاللىرى يۈز بەردى. چىن گاڭ مۇخبىرلارنى كۈتۈۋېلىش قەرەللىك يىغىنىدا ئالاقىدار سوئالغا جاۋاب بەرگەندە: بۇ، ‹‹شىزاڭ مۇستەقىللىقى›› كۈچلىرىنىڭ بۆلگۈنچىلىك ماھىيىتى ۋە زوراۋانلىق خاھىشىنى يەنە بىر قېتىم ئىسپاتلاپ بەردى ھەم ئاشكارىلىدى، دېدى.

    شىنخۇا ئاگېنتلىقى، بېيجىڭ، 11 – مارت تېلېگراممىسى. دىپلوماتىيە مىنىستىرلىقىمىزنىڭ باياناتچىسى چىن گاڭ 11 – مارت دالاينى بۆلگۈنچىلىك تەشەببۇسىدىن ۋاز كېچىپ، بۆلگۈنچىلىك ھەرىكەتلىرىنى توختىتىپ، مەركىزىي ھۆكۈمەت بىلەن ئۇچرىشىپ، سۆھبەتلىشىشكە شارائىت ھازىرلاشقا دەۋەت قىلدى.

    چىن گاڭ مۇخبىرلارنى كۈتۈۋېلىش قەرەللىك يىغىنىدا دالاينىڭ بايانات ئېلان قىلغانلىقىغا ئالاقىدار سوئاللارغا جاۋاب بەرگەندە يۇقىرىقى سۆزلەرنى قىلدى. چىن گاڭ: دالاي 10 – مارت يەنە ئاتالمىش بايانات ئېلان قىلدى، بۇنىڭ ھەيران قالغۇچىلىقى يوق، دېدى.

    ئۇ: بۇ بىر قانچە يىلدىن بۇيان، دالاي بۇنىڭدەك باياناتلارنى ھەر يىلى دېگۈدەك ئېلان قىلىپ، شىزاڭنىڭ ئەينەن ئەھۋالىنى بۇرمىلاپ، مەركىزىي ھۆكۈمەتنىڭ شىزاڭدىكى سىياسەتلىرىگە قەستەن ھۇجۇم قىلىپ ۋە قارا چاپلاپ، ‹‹مۇستەقىللىق››، ‹‹يېرىم مۇستەقىللىق››نى ئۆز ئىچىگە ئالغان بۆلگۈنچىلىك تەشەببۇسىنى تەرغىب قىلىپ كەلدى، ئۇنىڭ باياناتىدا ھېچقانداق يېڭى مەزمۇن يوق، دېدى.