ئامېرىكىنىڭ يېڭىدىن ۋەزىپىگە تەيىنلەنگەن دۆلەت ئىشلىرى كاتىپى ھىلارى كىلىنتون 20 – فېۋرال كەچتە مەخسۇس ئايروپىلان بىلەن بېيجىڭغا يېتىپ كېلىپ ، جۇڭگودىكى دۆلەت ئىشلىرى زىيارىتىنى باشلىدى . جۇڭگو دىپلوماتىيە مىنىستىرى ياردەمچىسى ليۇ جيې كۈتۈۋېلىشقا چىقتى . جۇڭگو ھىلارىنىڭ بۇ قېتىم ئاسىيادا قىلغان زىيارىتىنىڭ ئەڭ ئاخىرقى بېكىتى ھېسابلىنىدىكەن .

جۇڭگولۇق ئوقۇغۇچىلار ھىلارىغا گۈل سوۋغا قىلماقتا  

     ھىلارى كىلنتون جۇڭگوغا يات ئەمەس ، ئۇ 1995 – يىلى ئۆمەك باشلاپ جۇڭگوغا كېلىپ ، 4 – نۆۋەتلىك خەلقئارا ئاياللار يىغىنىغا قاتناشقان ، 1998 – يىلى ، ئامېرىكىنىڭ 1 – خانىمى بولۇش سۈپىتى بىلەن ئامېرىكىنىڭ سابىق زۇڭتۇڭى كىلىنتونغا ھەمراھ بولۇپ ، جۇڭگوغا زىيارەتكە كەلگەن .

    ھىلارى كىلىنتون ئايرودرومدىن ئۇدۇل بۇلتۇر ئولىمپىك تەنھەرىكەت مۇسابىقىسىدا ئامېرىكىنىڭ سابىق زۇڭتۇڭى بۇش چۈشكەن مېھماساراي — ۋېسدىڭ مېھمانسارىيىغا قاراپ يۈرۈپ كەتتى . مېھمانساراينىڭ خىزمەتچى خادىملىرىنىڭ ئاشكارلىشىچە ، ئۇنىڭ بۇ مېھمانسارايغا چۈشۈشى ئادەتتىكى مېھمانلارغا ئوخشاش بولۇپ ، مېھمانساراي بۇ مەزگىلدە ھېچقانداق تەسىرگە ئۇچرىمايدىكەن .

    ھىلارى 21 – فېۋرال ، جۇڭگونىڭ دۆلەت رەئىسى خۇجىنتاۋ ، جۇڭگو گوۋۇيۈەنىنىڭ زۇڭلىسى ۋېن جياباۋ ، دۆلەت ئىشلىرى كومىسسارى دەي بىڭگولار بىلەن كۆرۈشتى ، يەنە جۇڭگو دىپلوماتىيە  مىنىستىرى ياڭ جيېچى بىلەن سۆھبەت ئېلىپ باردى . بۇنىڭدىن باشقا ، ئۇ 22 – فېۋرال چۈشتىن بۇرۇن ، بېيجىڭ خەيدىيەن چىركاۋىغا بېرىپ ، ئىبادەت قىلدى ھەمدە ئامېرىكىنىڭ جۇڭگودا تۇرۇشلۇق ئەلچىخانىسىدىكى خادىملار ۋە جۇڭگونىڭ ئاياللار ساھەسىدىكى ئەربابلىرى بىلەن كۆرۈشتى .

    ئاخبارات ۋاستىلىرىنىڭ ئاشكارلىشىچە ، ھىلارى كىلىنتون بۇ قېتىمقى زىيارىتىدە ، جۇڭگو تەرەپ بىلەن خەلقئارا پۇل – مۇئامىلە كىرىزىسى ، كىلىمات ئۆزگىرىشى ، ئېنېرگىيە قاتارلىق مەسىلىلەر ۋە بۇش زۇڭتۇڭ ۋاقتىدىكى جۇڭگو – ئامېرىكا ئىستىراتېگىيىلىك ئىقتىسادىي سۆھبەت رامكىسىنى تېخىمۇ كېڭەيتىش قاتارلىق مەسىلىلەر ئۈستىدە مۇزاكىرە ئېلىپ بارىدىكەن .