تىل دېسەڭ چىقاردىم قىزىل تىلىمنى--ئاسىمجان ئوبۇلقاسىم

alma · ۋاقتى: 2015-5-18 19:22:10

تىل دېسەڭ چىقاردىم قىزىل تىلىمنى

ئاسىمجان ئوبۇلقاسىم

كۆڭلۈم قۇشلارغا بولغاچقا خۇشتار،

تۈن بەھرىگە يېيىلدىم نۇردەك.

جىمجىت تېڭشىدىم ئۈنسىز ئۈنۈڭنى،

تاڭ نۇرىغا ئۈزدۈم ياپراقتەك.

كۈزدىكى سارغايغان ئوتلار مىسالى

باھار ئاپتىپىغا ئۇلاشتىم ئاخىر.

سېنىڭ بارمىقىڭنى سۆيگەن يېشىللىق،

مېنىڭ لەۋلىرىمدۇر لەززەتتە ئۈنسىز.

سەن مەستانە بولدۇڭ ئاقىۋەت،

سېنى كۆيدۈرگەن قۇياش ئۇ نېمە؟

سەن ئاڭسىز،بەلەن،ئىشقىۋاز مەخلۇق،

ھەيرانمەن يىراققا كۆزۈڭ تىكىلسە.

ئەي،سۆيۈملۇك ئىلى تورغىيى،

ئۇركىمەي قولۇمغا قونۇپ تۇر بىر پەس.

ياپيېشىل شاخ بولسۇن كەپسىز پۇتلىرىم،

تەڭرىم دەرەخ قىلغىن كۆركەم ،زەبەردەست.

تىل دېسەڭ چىقاردىم قىزىل تىلىمنى،

مەن زەھەر ئەمەس شەربەت بېرىمەن.

سەنمۇ تاتلىق سۆزلەرنى ئۆگەنگىن دوستۇم،

مەن نۇردەك قوينۇڭغا ئۈچۈپ كىرىمەن.

پۇتكۇل غېرىبلىقنى سىغدۇرالايمەن،

تېنىمىز-رىئاللىق،تامدا ،كارۋاتتا.

ۋۇجۇدۇم ئۆركەشلەر قاراڭغۇلۇقتا،

دالىدا قۇش ئۇچار غەمكىن بىناۋا.

دەل-دەرەخلەرنىڭ ياپيېشىل تېنى،

تاڭ قىيامىغا چۆمۈپ بىر لەھزە.

شاتلانغان چىغىدىكى ئەسەبىيلىكنى،

كۆردۈم سېنىڭ كۆزلىرىڭدە.

		ساقلاش	پارول قايتۇرىۋېلىش
پارول			تىزىملىتىڭ