مۇھەببەت يامغۇرى

alma · ۋاقتى: 2017-4-27 07:30:41

مۇھەببەت يامغۇرى

تۆكۈلۈپ كەلدى ئۈستۈمدىن.

قىزىل،
يېشىل،
سېرىق،
بىنەپشە،
ئاپئاق.

بىر تامچىسى - كۈلكىسى ئىكەن دادامنىڭ،
خۇمارلىق كۆزلىرىدىن بالقىغان.

يەنە بىرى - ئاۋازى ئىكەن ئاپامنىڭ،
جەننەتنىڭ باغلىرىدىن تارقىغان.

يەنە بىر تامچىسى - كۆيۈمى ئىكەن سىڭلىمنىڭ،
ئۆچمەس گۈلخانلاردىن ئەنداز ئالغان.

بىر دانىسى - كۆكرەپ كېرىپ چىقىشى ئىكەن ئۇكامنىڭ،
پالۋانلارغا تەڭداش بولغان.

يەنە ياغقىنى - تىلەكلىرى ئىكەن سىڭلىمنىڭ،
سۈپسۈزۈك ياقۇتلاردەك چاقنىغان.

مۇھەببەت يامغۇرى،
ياغماقتا سىمىلداپ،
تاراسلاپ،
ئۇچۇڭ دېگەنلەرنىڭ قاناتلىرىنى يوللاپ،
قۇچۇڭ دېگەنلەرنىڭ ئۈمىدلىرىنى ئاقلاپ.

دىلىم،
رەڭلەندى كۆزلىرىدە،
يۈزلىرىدە،
يۈرەكلىرىدە سۆيگەنلەرنىڭ
سۇلـماس سۆيگۈ گۈللىرىدىن.

ئىپاردەك خۇشبۇي،
ئاسماندەك كەڭرى،
مۇھەببەتكە تويۇنغان يۈرەك ...

ـ فاتىمە سەيياھ

		ساقلاش	پارول قايتۇرىۋېلىش
پارول			تىزىملىتىڭ