تاھىر تالىپ: سۆي دېدى بىر جانان قاراپ قويماي، مەن ئۈچۈن چېچىنى بىر تاراپ قويماي. سۆي دېدى ئۆزى ئېگىز راۋاق ئۈزرە، بىر چۈشۈپ ئاشىقىغا قاراپ قويماي.
روزى سايىت: راۋاققا چىقىۋېلىپ ماراپ قويماي، نازىدا قاش ئېتىپ، چاچ تاراپ قويماي، «سۆي»دېسە، مەشۇق ئەمەس، ئالۋاستى ئۇ، كەتكۈلۈك پەشنى قېقىپ قاراپ قويماي.
تاھىر تالىپ: سۆي دېدى قولىنىمۇ بىر ئۇزاتماي، سۆي دېدى گۈللىرىدىن بىر پۇراتماي. سۆيدۈرمەك بوپتۇ مېنى پەملىشىمچە، ھەتتاكى يېنىغىمۇ بىر يولاتماي.
روزى سايىت: يېنىغا تارتمىسا يا كەتكۈزمىسە، «سۆي!» دېسە، گۈلىدىن شاخ ئەگكۈزمىسە، ئېغىزى پۇرامدىكەن كاساپەتنىڭ، سۆيگەندە لەۋلىرىگە لەۋ تەگكۈزسە.
تاھىر تالىپ: سۆي دېدى جانان تەڭلەپ تاپىنىنى، تاشلىماي سۈرلۈك بۆرە چاپىنىنى. مۈرەممۇ، يۈرىكىممۇ بولدى يېغىر، كۆپ سۆرەپ تەڭقىسلىقنىڭ ساپىنىنى.
روزى سايىت: «تاپانغا سۆي!» دېگىنى ساراڭلىق ئۇ، زاتىغا ئىبلىس چاپقان ھاراملىق ئۇ. ھىدلاشمۇ ئازاب، نومۇس، سۆيۈش تۈگۈل، نىجاسەت دەسسەپ يۈرگەن داۋاملىق ئۇ.
تاھىر تالىپ: سۆيمىسەم سەكرەپ چۈشۈپ چەيلىمەكچى، تېرەمنى تەتۈر سويۇپ ئەيلىمەكچى. «سۆيمىدىڭ تاپىنىمنى، ۋاپاسىز» دەپ، دوزىخى قاتارىغا ھەيدىمەكچى.
روزى سايىت: سۆيمىسەڭ چەيلەمدىكەن پەسكە چۈشۈپ، تېرەڭنى ئەيلەمدىكەن قەستكە چۈشۈپ؟ قورقمىغىن، تىترەيدۇ ئۇ راۋىقىدا، ئورنىشىپ ئولتۇرۇشمۇ تەسكە چۈشۈپ.
تاھىر تالىپ: مەيلىدى پەستە تۇرسا ئاز بولسىمۇ، سۆيەتتىم يانمۇ يان بوپ تاز بولسىمۇ. (بوينىنى ئۇنداق ئېگىز تۇتمىسىكەن، دەپ قالدىم مەشۇق، ھەتتا غاز بولسىمۇ.) | 
|Archiver|يانفون|قاماقخانا|تىلىمىز ئۇيغۇر مېدىيەسى
( 京ICP备14003962号-4 ) 
ۋاقتى: 2017-3-1 09:42:52
ساقلاش
ھەمبەھر
微信