مىھىر-مۇھەببەت ئىنسانغا قانات

uyghur · ۋاقتى: 2016-11-13 21:44:23

مىھىر-مۇھەببەت ئىنسانغا قانات

مۇختەر بۇغرا

يېغىپلا تۇرسا سۆيگۈ يامغۇرى،
يۈرىكى كىمنىڭ ئاڭا چىلاشماس.
ئىنسانى سۆيگۈدە ئىنساننى سۆيسەك،
قايسى بىر يۈرەك ئىشىكنى ئاچماس.
سۆيگۈدۇر زىننەت، سۆيگۈدۇر سۇبات،
مېھىر-مۇھەببەت ئىنسانغا قانات.

ئىنساننىڭ ئۆزى ئۇلۇغدۇر ئەسەر،
شەپقەت يەتكۈزۈش دېمەك مۇندەرجە.
قىسمەتكە تولغان پىشانىمىزدا،
ئىلاھىي شۇئار سۈزۈكتۇر شۇنچە.
ئانا سۈتىدىن باشلىنار قۇتاد،
مېھىر-مۇھەببەت ئىنسانغا قانات.

ئانا مېھرىدىن كۆز ئاچتۇق تولۇق،
باراۋەرلىكتىن ئالەم يوپيۇرۇق.
يېتىم رىسقىغا چاڭ سالساق ئەگەر،
بولۇپ كەتمەمدۇق دوزاخقا تۇترۇق.
تەڭ باراۋەرغۇ ئەسلى ئادىمىزات،
مېھىر-مۇھەببەت ئىنسانغا قانات.

ئېرىقتا سۇنى بىللە ئىچىدۇ،
بىللە تىكىلگەن سۇۋادان تېرەك.
ئەلگە بېرىمىز شۇندىلا شەربەت،
قاتارى تۇرساق ئانار دانىسىدەك.
ئىناقلىق بىلەن گۈزەل كائىنات،
مېھىر-مۇھەببەت ئىنسانغا قانات.

ساخاۋەت دېگەن مال-دۇنيا ئەمەس،
ئىككى كەلىمە تەسەللىي-سەۋېر.
ئۆزگۈگە داننى ئۆتكۈزۈپ بېرىپ،
ئۆزىگە تاشنى قالدۇرار غەلۋىر.
ھارام مال-دۇنيا ئىمانغا داغ-دات،
مېھىر-مۇھەببەت ئىنسانغا قانات.

يىلغا باھانە كۆرسەتسەك بىكار،
ئۇنتۇلۇپ كېتەر كۆڭۈلدىكى داغ.
ئۇنتۇلار ھەممە، ئۇنتۇلماس پەقەت،
ساۋاب، ياخشىلىق بىنا قىلغان باغ.
بىردەملىك ئىكەن نالە يۇ پەرياد،
مېھىر-مۇھەببەت ئىنسانغا قانات.

نەغمە بولسىلا ئېچىلماس كىشى،
توقلۇق بولمىسا مېھىر-شەپقەتتىن.
تەغدىر شۇنداق دەپ ئۆتمەيلى دوستلار،
دىللار سۇ ئىچسۇن چىن مۇھەببەتتىن.
نەپرەت، شەپقەتكە تولغان بۇ ھايات،
مېھىر-مۇھەببەت ئىنسانغا قانات.

ئۇز تەبىئەتنىڭ كاجلىقى تۇتسا،
شاختىلا نابۇت بولار گۈل-چېچەك.
مەسخىرە قىلىپ تۇرسىمۇ دۇنيا،
چىن دەيدۇ ھەتتا ئۆزىنى چۆچەك.
نادانلارغىلا ئەرمەك ياغاچ-ئات،
مېھىر-مۇھەببەت ئىنسانغا قانات.

كۆكتە قۇشلاردەك قىلىدۇ پەرۋاز،
مېھىر-مۇھەببەت ئىنسانغا قانات.
بىر كۈن ھەمراھقا قىرىق كۈن سالام،
بۇ ئەجدادلاردىن قالغان بىر ساۋات.
بۇ ئەۋلادلارغا قالغان بىر ساۋات،
مېھىر-مۇھەببەت ئىنسانغا قانات.

		ساقلاش	پارول قايتۇرىۋېلىش
پارول			تىزىملىتىڭ