ئامان بولسۇن ئاتا بولغان يىگىتلەر *** مۇھەممەد مەسئۇد ھەبىبى

alma_2 · ۋاقتى: 2015-6-24 23:05:27

ئامان بولسۇن ئاتا بولغان يىگىتلەر
***
مۇھەممەد مەسئۇد ھەبىبى
***
پەرۋازىغا يامان نەزەر تەگمىسۇن،
ئەل قوينىدا قاناتلانسۇن بۈركۈتلەر.
باغلىرىدا مۇراد گۈلى ئېچىلسۇن،
ئامان بولسۇن ئاتا بولغان يىگىتلەر.
***
مۇھەببەتتىن قۇرۇپ تاجۇ تەختىنى،
ئىزگۈلىكتىن ئىزلەپ ئارزۇ-بەختىنى،
ۋاپا بىلەن ئاقلاپ ھالال ئەھدىنى،
ئامان بولسۇن ئاتا بولغان يىگىتلەر.
***
پەرزەنت كۈلسە يۈرەكلەر كۈلەر ئىكەن،
گەر يىغلىسا سانجىلىپ گويا تىكەن،
ئاتا بولۇپ ئاتا قەدرىگە يەتكەن،
ئامان بولسۇن ئاتا بولغان يىگىتلەر.
***
پەرزەنت دېگەن شۇنچە شېرىن غەزەلدۇر،
بىر كۈلكىسى مىڭ ناخشىدىن ئەۋزەلدۇر،
ئاتا بولماق، ئاھ نەقەدەر گۈزەلدۇر،
ئامان بولسۇن ئاتا بولغان يىگىتلەر.
***
ئەركىلىسە ئۇنتىلىدۇ مىڭ قايغۇ،
قەغىش قىلسا تۈنلەر بىدار يوق ئۇيقۇ،
"دادا"دېسە يانار مۇقەددەس تۇيغۇ،
ئامان بولسۇن ئاتا بولغان يىگىتلەر.
***
بالام دەيدۇ، خالاپ كۆيىدۇ ھامان،
تەييار تۇرار ئاڭا بولغىلى سامان،
ئۇنتۇپ كېتەر ھەتتا ئۆزىنى تامام،
ئامان بولسۇن ئاتا بولغان يىگىتلەر.
***
سەزدۈرمەيدۇ بولسا قانچە دەردىنى،
بىلەر دىلدىن ئاتا- ئانا ئەجرىنى،
ھەر مۈشكۈلگە ئاتاپ قويار سەبرىنى،
ئامان بولسۇن ئاتا بولغان يىگىتلەر.
***
دەردى يالغۇز جان ۋە يا پەرزەنت ئەمەس،
ئارمانى ھەم غايىسى بار مۇقەددەس،
تۇرمۇش غېمى ئەيلىمىسۇن خارۇ-خەس،
ئامان بولسۇن ئاتا بولغان يىگىتلەر.
***
ئاتىلارنىڭ باسقان ئىزى نۇر بولسۇن،
ئانىلارنىڭ تۆككەن تەرى دۇر بولسۇن،
شادلىقىغا پەرزەنتلىرى جۆر بولسۇن،
ئامان بۇلسۇن ئاتا بولغان يىگىتلەر.
***
ئاتا بولدۇق ئەمدى ئەمەسمىز سەبى،
ھەق يولىدا تىك تۇرايلى تاغ كەبى،
ئەزىزلەرگە دۇئا قىلار ھەبىبى،
ئامان بولسۇن ئاتا بولغان يىگىتلەر.

		ساقلاش	پارول قايتۇرىۋېلىش
پارول			تىزىملىتىڭ