| ablatmuhamma |
2013-08-05 15:53 |
ساۋاقداش
ساۋاقداشلار يىغىلىشغا ئاتاپ يازغان ئىدىم ، تەنقىدىي پىكىرلەرنى بېرىشىڭلارنى ئۈمۈد قىلىمەن
بىر تال كۆچەت باراقسان ئۆسۈپ مانا بولدى چوڭ ،
سەبىي بۇۋاق تەمتىلەپ ئەقىل تاپتى ، بولدى ئوڭ .
سۆيگۈ بېرىپ پەسىللەر ، ھەممە بەرسە بولدى تەل ،
بۇ ئايەملىك يىغىلىش ،دىدار پەيتى ، بولدى كەل .
غۇلىچىڭنى كەڭ يايغىن ،كۆرىشەيلى ساۋاقداش .
ئون نەچچە يىل مۇقەددەم ،يىغىلغانتۇق بۇ يەرگە ،
ئالىي ئۈمۈد ،ئارزۇنى پۈكۈپ دىلغا ، سەپەرگە ،
ياتاقلاردا قاينايتتۇق چۈشۈپ ساما . لەپەرگە ،
بىر مۇھەببەت سىڭەتتى دىئالىكىتىك گەپلەرگە ،
خۇشاللىقتا بوزلىنىپ ، مۆرىشەيلى ساۋاقداش .
بەش يىل ئاپئاق نۇر ئەمدۇق ،ئالىي مەكتەپ بېغىدا ،
كۆز قاراشلار مايلاندى ، ئىدىيەنىڭ يېغىدا ،
كۆچەت تىكتۇق ، گۈل تەردۇق مەرىپەتنىڭ تېغىدا ،
داخىل قىلدى بىر ۋوجۇت ، بۇ دەستۇرخان چېيىغا ،
ئەسلىمىلەر ئەسلىشىپ ، ئۇلىشايلى ساۋاقداش .
كۆز قىساتتى يىراقتىن دائىم بىزگە ئاشخانا ،
ئەجەپ ئىدى شاماللىق ناۋايخانا ، چايخانا.
ئەمما نىسى بەرمەيتتى نەرسە – كېرەك مەيخانە ،
بارىمىزنى چىقارساق رەنجىمەيتتى سۇخانە .
ھېدىمىزنى قايتىدىن پۇرىشايلى ساۋاقداش .
ئاي ئاخىرى ئوروقلار ئانچە – مۇنچە تېنىمىز ،
توڭلاتقونى سېغىنىپ قېتىپ قالار نېنىمىز ،
دوستلار كەلسە تۇيۇقسىز ، بويۇن قىسار يېنىمىز ،
تەۋەككۈلنى تاللايدۇ ، قايناپ تۇرغان قېنىمىز !
ئۆتمۈشتىكى نىسىنى بېرىشەيلى ساۋاقداش .
قىزلار ياتقان ياتاقنى ، تېتانىكقا ئوخشاتتۇق ،
سەبىرى قىلىپ تىكەنلىك گۈل بەرگىنى يۇمشاتتۇق ،
ئويۇنلارغا بېرىلىپ ، دەرۋازىدىن تاقلايتتۇق ،
خاتالىقنى يۇشۇرۇپ ، تىرناق تاتىلاپ ئاقلايتتۇق ،
بۈگۈن ئۇستاز ئالدىدا ئېڭىشەيلى ساۋاقداش .
يىرتىلمىدى كىر بولۇپ ، قىزلىرىمىز ئەخلاقى ،
غۇرۇرىنى ساقلىدى ئانا بولغۇچە تاكى ،
تۈنجىسىنى رەت قىلىپ كەلدى ئۇلار ھەتتاكى ،
بىلەيلى ھەقىقەتنى، بۇ ھايات ئەمەس باقىي ،
بولغان چاغدا ئۈچ پۇتلۇق ، يۆلىشەيلى ساۋاقداش .
قەددىمىزنى دەس قىلدى ، تەربىيەنىڭ قامچىسى ،
بولدۇق مانا ئاخىرى مائارىپنىڭ تامچىسى ،
ئارىمىزدىن يۇمدى كۆز مۇنبەرلەردە قانچىسى ؟
ھالال تەردە ياشايدۇ بىزگە ئوخشاش ئاز كىشى ،
ئەجىرىمىزدىن قاھقاھلاپ كۈلىشەيلى ساۋاقداش .
30 ئىدۇق 100 بولدۇق بۇ تەخمىنەن مۆلچەر سان ،
روھى چاڭقاق ئېتىزدا داتلاشمىسۇن بۇ ساپان ،
ئىش ھەققىمىز يامغۇردىن ساقلايدىغان بىر چاپان ،
رەنجىمەيلى تەقدىردىن ،جەڭگاھىمىز بىر خامان .
پاكىز ئېلىپ تىرناقنى ، تىرىشايلى ساۋاقداش !
خاتىمە ئورنىدا
ئوقوتقۇچى _ تىراكتۇر، دىسەم ماڭا ئىشىنىڭ ،
ئۇستازلىرىم ياشاندى ، كۈچى بارمۇ چىشىنىڭ ؟
تېرىسىدە كۆكلىدۇق ، باھار ، يازنىڭ ، قىشىنىڭ ،
يىراقلاردىن كەلدىڭلار ، ئەركىن بولۇڭ ، يېشىنىڭ ،
<ئايرىلىش > نى قايتىدىن توۋلىشايلى ساۋاقداش !
ئاپتۇرى : ئا. مۇھەممەت باغۋەن
|
|