|
ساۋادى يوق چۈجىلەر ئۈچۈن
1
سەۋرىسىنى تاشلاپ كۈتۈشلەر ،
مۇزلىماقتا ئەسىر دوقمىشى.
ئېغىر نەمدە كەتمەكتە چىرىپ،
ئېتىقادنىڭ يىرتىق پوسمىسى.
ساۋادى يوق چۈجىلەر ئۈچۈن ،
كاتەك ياسار جىمجىت رادىكال .
ئاچا يولنى مەست قىلىش ئۈچۈن ،
يالغان ۋاقىت قويىدۇ ساقال .
ھاردۇقىمنى سىقىمداپ تۇرۇپ ،
تارىخىنى ئاچتىم بۇۋامنىڭ .
يېرىلماقتا ساختا ئاپتاپتا ،
ھەسرەت سۈيى تۆكۈلگەن جامنىڭ .
2
كاتىكىمگە بەرمەي مۇھەببەت ،
32 چۈجەم ئاچ قالدى .
مائارىپىم مەشۇت قۇسالماي ،
مۇنبەرلەدە داڭگال ، تاش قالدى .
تاغنىڭ چېچى _ قارىغاي قولىدۇر ،
قىتئەلەرنىڭ كۆزى دېڭىزدۇر .
رىئاللىقتا مىجىلغان ئەۋلاد،
خەق چاينىغان پوقتۇر، سېغىزدۇر.
كۆيگەن كىتاب _ يوقالغان تارىخ ،
تاشقا چۈشكەن ئاياق پاكىتكەن .
رەنجىشلەرنىڭ زوكام دورىسى ،
تەسۋېي ساناپ تۇرغان سۈكۈتكەن .
ساقىلىغىنى پۈتۈنلىكىمنى ،
پەگادىكى يىرتىق كىگىزكەن .
ئاپئاق ئازاپ سىڭگىنى بىلەن ،
خەقنىڭ تىلى دىلغا بىگىزگەن .
تەسسەللىيدۇر تېرەك ياغىچىم ،
شور ئازاپتا ياسىدىم ئۇۋا .
قانداق يۈتتى كىرۇرەنلىرىم ،
كۆل پاقىسى بۇنىڭغا گۇۋاھ .
چارچىماقتا تەكلىماكانلار ،
چۈشلىرىدە كۆرۈپ يېشىللىق .
قۇمۇچاقلار ياشايدۇ قانداق ؟
گۈلدۈرماما كەلمىسە سىلىق .
3
مىڭ ئۆيدىكى قۇرغاق ھەربلەر ،
چاك -چېكىدىن رەنجىدى بىزدىن .
تۇختاپ قالغان مەرىپەت سۈيى ،
ئاشمايدىكەن نىمىشقا تىزدىن ？
تەر پۇرىغان دوپپا ئىچىدە ،
قاغجىرىغان سۈكۈت تاقاقلىق .
ئېچىلمىغان سىم -سىم غارلىرى،
تىرناقتىكى كىردە ساقلاقلىق .
تاغار ئەمەس مىللەت سۈلكىتى ،
ئۇ دېڭىزنىڭ سۈيىدۇر بىلسەك .
قۇچاقلىسۇن ساقلىغان يىلتىز ،
تەڭ سىڭەيلى بىللە تۆكۈلسەك .
ۋىجدانىمىز بولسا گەز -ماتا ،
خەق پۇتىغا قىلىدۇ < گۆجەي > .
خەق تاشلىغان شاپاق يالىغان ،
قاقاس دىلدا ئانا تىل ئۆگەي.
ئاپتۇرى : ئا. مۇھەممەت باغۋەن
|
