|
ئىشەنچ بۇلىڭى
سەھەرنى سۈزمەكتە كۆڭۈل چويلىسى ،
ۋەدىمىز دۇغىدىن ۋاز كەچسۇن ئەمدى .
ئىشەنچ بۇلۇڭى چىقىرىپ بارماق ،
شېفىرلىق گۇماننى بىر يەشسۇن ئەمدى .
شاھ، دىدىڭ، پېچكىدا بىر رەت چېكىندىم ،
يۈكۈڭنى كۆتەردى كۆڭۈل ئاتلىرىم .
قىسمەتلەر چۆمكىلىپ ئېيتماقتا رامىزان ،
قايناقسۇ ئىچمەكتە ئارغىماق دىلىم .
چەشلەرنى يىغماقتا تۇرمۇش خامىنى ،
يىلتىزغا ئايلانسۇن ھالال تەر غولى .
قۇۋۋەتتىن ئايرىلسا يالتىراق ئازاب،
ئۈچ پەدە چالىدۇ ھايات مەرغۇلى .
تۇشقان كالپۇكلۇق ھەسەتلىرىمىز ،
ئاچ قالغان چىشىدا كەتسۇن قارىداپ .
سۇ باشلاپ كېلەي مەن سۇمبۇل چېچىڭغا ،
ساداقەت بېغىمدا تۇرغىن سايىداپ .
قوشگېزەك تۇغقاچقا گۈزەللىكىمىز ،
بېزەلدى ئۈچ چاقلىق خاتىرجەم تۇرمۇش .
توپلاشقان يىلتىزنىڭ مەزمۇنى باشقا ،
مۈمكىنمۇ ، دىگىنى بىر خاتا تونۇش .
تاتلىغان يارىلار ئالغاندا ئېغىز ،
ھەسەتنى غىدىقلاپ ئۆتمەيلى ئەمدى .
رەڭگارەڭ بويالغان شېكەر سۆزلەرنىڭ ،
تەمىنى تېتىماي يۈتمەيلى ئەمدى .
پۈۋلىگەن قانائەت كۆپكىنى بىلەن ،
مۈجىزە تۇغالماس مىليۇن كەيپىيات .
زەھەرلىك گازمىكىن دىسەك ئازابنى ،
چىن سۆيگۈ بولالماس ھەرگىز كەشپىيات .
ئاپتۇرى : ئا. مۇھەممەت باغۋەن
|
