| شەبنەم |
2013-07-01 16:25 |
ئازاپتىن چاچقۇلار چېچىلغان يوللار،
سايرىماس بىچارە ناۋاكەش بۇلبۇل .
قىزىل گۈل رەڭگىدە چۈشەر كۆز يېشىم ،
يۈرەكنى موجىيدۇ رھىمسىز بىر قول.
يىغلايدۇ ياستۇقۇم مۇڭ باسقان ھوجرا ،
يىغلايدۇ باغلاردا سەن تەرگەن رەيھان .
گۈل بولۇپ ئۈنۈپتۇ ئاياق ئىزلىرىڭ ،
پۇرايمەن ھېدىڭنى باغلاردا پىنھان ،
قەلبىمدە قوياشىم يىرتىلىپ كەتتى ،
يوقالدى نۇر-زىيا ،يوقالدى ئاپتاپ .
باغلاردا شىۋىرغان قاچار كېپىنەك ،
كۆز يېشىم مۇز بولۇپ قېتىپتۇ شۇتاپ .
مەجنۇنتال تولغىنىپ شېخى ھەم سۇندى ،
يۇلتۇزمۇ ،ئايلارمۇ يوقالدى تامام.
زۇلمەتلىك كېچىدە قانايدۇ باغرىم ،
باغىرىمدا تۇنەيدۇ ئانىسىز بالام .
كېچىدە بۇلاقتىن كەلدى ئاۋازىڭ ،
سىمايىڭ كۆرۈندى بىر جۈپ قىزىمدىن.
تۇيغۇممۇ شۇتاپتا كۆتىرەر ئېسىيان ،
سەن ھايات ،كەتمىدىڭ مېنىڭ يېنىمدىن .
قەبرىگە تۆكۈلگەن كۆز ياشلىرىمنى ،
ئۇسۇزلۇق قىلىپتۇ ئۈنگەن قىزىل گۈل .
سەن كەتتىڭ ،مەن قالدىم ،كەتمىدى روھىڭ ،
تاتلىغىم سىنىڭسىز جەننەت ماڭا چۆل.
نە چارە تۇيغۇممۇ ئالداپتۇ مېنى ،
قەبىرىگە دۈملەنگەن قوياشتەك جىسمىڭ .
تەنھالىق دېڭىزىغا مەن بولدۇم غەرىق ،
كېتىپتۇ چىۋەر قول، كېتىپتۇ مېھرىڭ .
كېتىپتۇ يېنىمدىن ئۇماق پەرىشتەم ،
كېتىپتۇ خوشاللىق ،كېتىپتۇ بارىم .
ۋە لىكىن روھىمدا ياشايسەن جېنىم ،
روھىڭغا چىرماشقان مېنىڭمۇ روھىم .
|  | | |
|
|
