|
مۇئەللىم ئويلاپ بېقىڭ (2 ) (دانىش)
مۇئەللىم ، مەكتەپ دەرۋازىسىدىن كىردىڭىز ، ھەممە نەرسە سىزگە تەبەسسۈمدا بېقىۋاتقاندەك تۇيۇلدى . ئوماقلارنىڭ" سالام مۇئەللىم !" دېگەن سۆزىنى ئاڭلىغىنىڭىزدا ، ئۇلارغا بولغان سۆيگۈڭىز ، ئۇلارغا بولغان مېھرى – مۇھەببىتىڭىز ئۇرغۇپ تاشتى . بىر يىل ، ئىككى يىل ئاجايىپ ئېسىل ئىشلىدىڭىز . مۇئەللىملەر سىزنىڭ كېچە – كۈندۈز دېمەي ، ئوقۇتقۇچىلىق كەسپىگە ئۆزىڭىزنى بېغىشلاپ ، ئۆزىڭىزنى ئۇنتۇغان ھالدا ئىشلىگىنىڭىزگە ھەيران قالدى ، ئوقۇتقۇچىلىرىڭىز سىزدىن سۆيۈندى ۋە پەخىرلەندى !
شۇ چاغلاردا قاياقتىندۇر سىم – سىم يامغۇرنى ئەسلىتىدىغان ، بىر خىل شۇنداق يېقىملىق سەلكىن شامال كېلىپ يۈزىڭىزنى سۆيۈپ ئۆتۈپ ، دىلىڭىزدىكى بىر خىل ئوتنى يالقۇنجاتتى . سىز شۇندىن باشلاپ ئىككى ئوتتۇرىدا قالدىڭىز : بىر تەرەپتە سىزنىڭ بىلىمگە تەشنا ئوماقلىرىڭىز ، يەنى بىر تەرەپتە سۆيگۈگە تەشنا ئامرىقىڭىز . سىزنىڭ ھېچقايسىدىن كەچكىڭىز كەلمىدى ، ئەلىۋەتتە . كۈندۈزى ئوماقلىرىڭىزنىڭ ھاجىتىدىن چىقسىڭىز ، كەچلىكى ئامرىقىڭىزنىمۇ خۇش ئەتتىڭىز . بىر مەزگىللەردىن كېيىن ئۇيقىڭىز قانمىغاندەك ، چارچىغاندەك ھېس قىلىشقا باشلىدىڭىز . بەزى ئىشلار خۇشياقمىسا ، بەزى ئىشلارغا ئۈلگۈرۈپ بولالمىدىڭىز . شۇنىڭ بىلەن " مائارىپقا يەنى ئوقۇ – ئوقۇتۇشقا ساختىلىق قىلىشقا بولمايدۇ " دەيدىغان قەتئىي مەيدانىڭىزدا ئۆزگۈرۈش بولۇشقا باشلىدى . مەكتەپ چۈشۈرۈپ بەرگەن تاپشۇرۇقنىڭ قېتىم سانىنى توشقۇزۇش ئۈچۈن ، تاپشۇرۇقنى جىق بەردىڭىز . ئەمما ئۇنى تەكشۈرۈشكە كېتىدىغان ۋاقىتنىڭ يېرىمىسىنى شېرىن سۆيگۈ تارتىۋالغانلىقتىن ، تاپشۇرۇق تەكشۈرۈشتە تازا ئەستائىدىل بولالماي ، بەزىدە بىر خىل سۇئالغا بېرىلگەن << ئا >> جاۋاپقىمۇ ، << ب>> جاۋاپقىمۇ توغرا بەلگىسىنى ئۇرۇپ قويدىڭىز . ئوقۇغۇچىلىرىڭىز " مۇئەللىم ، بۇ جاۋاپلاردىن قايسى توغرا ؟ " دەپ سورىغاندىلا ، چۈچۈپ ئويغانغاندەك بولدىڭىز . مۇئەللىم ، سىز ئاخىرى ئامرىقىڭىزغا " بىز ھازىر مۇھەببەتكە بەك بېرىلىپ كەتسەك بولمىغىدەك " دېيىشكە مەجىبۇر بولدىڭىز. ئامرىقىڭىزمۇ بۇنى توغرا چۈشەندى . لېكىن ، مەلۇم مەزگىلدىن كېيىن ئامرىقىڭىز " سىز ئوقۇۋاتقان چاغدىمۇ شۇنداق دېگەن ، ئەمدى خىزمەتكە چىققاندىن كېيىنمۇ شۇنداق دەۋاتىسىز . قېنى ئېيتىڭا ، سىز زادى نېكەمگىچە مۇشۇنداق دەپلا تۇرىسىز ؟ 30 يىل ئىشلەپ پېنسىيىگە چىققىچىما ؟" دېدى . سىز ئويلىنىپ قالدىڭىز . مۇئەللىم كەسپ بىلەن مۇھەببەتنى تەڭ ئېلىپ ماڭماق تەسمىكەن ؟
توي قىلدىڭىز ، بالىلىق بولدىڭىز . ئەمدى سىزگە تەشنا بولىدىغانلار تېخىمۇ كۆپەيدى : ئوقۇغۇچىلىرىڭىز سىزدىن بىلىم بېرىشنى كۈتمەكتە ، ئامرىقىڭىز سىزدىن سۆيگۈ كۈتمەكتە ، بالىڭىز سىزدىن مېھىر كۈتمەكتە ، ئىككى جۈپ ئاتا –ئانىڭىز سىزدىن ۋاپادارلىق كۈتمەكتە ، يېتىشەلمەيلا قالدىڭىز . بۇنى ئاز دېگەندەك ، مال باھاسىنىڭ ئۆرلەپ ، مائاشىڭىزنىڭ ئۆسمىگىنى تېخىمۇ يامان بولدى سىزگە . بۇنىڭ بىلەن سىزدىكى قىزغىنلىقنىڭ ئورنىنى ئاغرىنىش ئېلىشقا باشلاپ ، سىزدە خىزمەتكە كېچىكىش ، خىزمەت ۋەزىپىلىرىڭىزنى سان – سۈپەتكە يەتكۈزەلمەسلىك ئەھۋالى كۆرۈلۈپ ، "ئۆلمەكنىڭ ئۈستىگە تەپمەك " دېگەندەك ھۆكۈمەت بەرگەن ئازغىنە مائاشىڭىزنى مەكتەپمۇ خوراتقىلى تۇردى .
مۇئەللىم ئويلىنىپ بېقىڭا ، سىز ئارزۇ قىلغان ئوقۇتقۇچىلىق كەسپى بىلەن سىز قىلىۋاتقان ئوقۇتقۇچىلىق كەسپى ئوخشاشمىكەن ؟
|