ئۆمەر مۇھەممەتئىمىن كروران

قىرىق ياش ئەرلەرنىڭ ئەڭ قىران چېغى،
تۈمەن خىل مەدەنگە پەۋەستۇر تېغى،
تىلىڭغا سۇ يىغار مىۋىلىك بېغى،
تامىدۇ مىڭ يەردىن ئەركەكلىك يېغى،
قىرىق ياش ئەرلەرنىڭ ئەڭ قىران چېغى.

دەسسىسەڭ تىترەيدۇ يەر قوۋۇرغىسى،
يۈرىكىڭ سۆيگىنىڭ ئالتۇن ئۇۋىسى،
كۆزۈڭگە كىرەلمەس غاپىللىق ئىسى ،
ئەقلىڭدە سۇنىدۇ توپاننىڭ بىسى،
قىرىق ياش ئەرلەرنىڭ ئەڭ قىران چېغى.

ئالدىڭدا بىر سەھەر قاراپ تۇرىدۇ،
ئارمانلار ئىزىڭنى ساناپ تۇرىدۇ،
دوستلارغا ھەر ئىشىڭ ياراپ تۇرىدۇ،
بەزىدە بورنىڭمۇ قاناپ تۇرىدۇ،
قىرىق ياش ئەرلەرنىڭ ئەڭ قىران چېغى.

يول ماڭساڭ يېنىڭدا جانانىڭ كېلەر،
ئىز بىسىپ پەرىشتەڭ ، پالۋانىڭ كېلەر،
كۈز ئەمەس ھەر پەسىل خامانىڭ كېلەر،
شان قۇچۇپ ھەر ياندىن كارۋانىڭ كىلەر،
قىرىق ياش ئەرلەرنىڭ ئەڭ قىران چېغى.

ياغسىمۇ چىكەڭگە قارلار دەممۇ- دەم،
لەپىلدەر چۇققىدا سەن تىككەن ئەلەم،
يۇرت تەۋرەر، ئەل تەۋرەر،تەۋرەتسەڭ قەلەم،
سېھرىڭدە خىزىرنىڭ كارامىتى جەم،
قىرىق ياش ئەرلەرنىڭ ئەڭ قىران چېغى.

دېمىگىن« كىچىكتىم، ھالقىدىم داۋان،
بۇ بىر يول سەپەرنى تۈگەتسەم ئامان..»
ئىشىتكەنمۇ ،دىيىشەر:«ھاۋاشلار يامان...»
گۈھەرگە ئايلىنار سەن تەزگەن سامان،
قىرىق ياش ئەرلەرنىڭ ئەڭ قىران چېغى.

مەن دەيمەن : قىرىقتا تۇختىسا يېشىڭ،
كۈنۈ_ تۈن شەمشادتەك تىك تۇرسا بېشىڭ،
يىنىڭدا بولسىلا ئەڭ ئەزىز كىشىڭ،
مەيلىغۇ ئۇماچ بوپ قالسىمۇ ئىشىڭ،
قىرىق ياش ئەرلەرنىڭ ئەڭ قىران چېغى.