|
مۇدىر ئويلىشىپ بېقىڭ(3)(دانىش)
مۇدىر ، سىز مۇدىر بولغان دەسلەپكى يىلىدىكى بەزى ئىشلىرىڭىز ھازىرمۇ يادىمدا . ئۇ چاغلاردا سىزنىڭ قولىڭىزغا تۇرۇپلا ئوقۇغۇچىلارنىڭ تاپشۇرۇق دەپتەرلىرى چىقىپ قالاتتى . ئۇ تاپشۇرۇق دەپتەرلەرنى كۆرۈۋېتىپ ، شۇ تاپشۇرۇق دەپتەردىكى تاپشۇرۇقنى بەرگۈچى بەزى مۇئەللىملەرگە << مۇئەللىم ، ماۋۇ تاپشۇرۇق بۇ ئوقۇغۇچىغا ئاسان كېلىپ قاپتۇمۇ – نېمە ؟ >> دېسىڭىز يەنە بەزى تاپشۇرۇقلارنى كۆرسىتىپ : << ماۋۇ تاپشۇرۇق بۇ ئوقۇغۇچىغا قېيىن كېلىپ قاپتۇ ، ئىشلىيەلمەپتۇ >> دەپ قوياتتىڭىز ۋە بەزىدە ھەتتا بەزى تاپشۇرۇق دەپتەرلەرنىڭ ئىگىسى بولغان ئوقۇغۇچىلار بىلەن كۆرۈشۈپ : << بۇ تاپشۇرۇقنى نېمە ئۈچۈن ئىشلىيەلمىدىڭىز ؟ >> دەپ سوراپ قوياتتىڭىز . شۇنىڭ بىلەن بىز ھەممە ئوقۇغۇچىنى بىر تاياقتا ھەيدىمەي ، ئوقۇغۇچىلارنىڭ ئەمەلىي ئەھۋالىنى كۆزدە تۇتقان ھالدا تاپشۇرۇق بېرەتتۇق . ئوقۇغۇچىلارمۇ << تاپشۇرۇقىمىزنى مۇدىرمۇ كۆرۈپ قويىدىكەن >> دەپ ، بەك ئەستائىدىل ئىشلەيتتى .
بەزىدە سىز خەنزۇ مەكتىپىدە باشلانغۇچنى پۈتتۈرۈپ ، مەكتىپىمىزگە چىققان ئوقۇغۇچىلار بىلەن سۆھبەتلىشىپ ، ئۇلارغا خەت يازدۇرۇپ كۆرەتتىڭىز ۋە << پاھ ، بۇ ئوقۇغۇچىلارنىڭ ساۋادىنى ناھايىتى تېزلا چىقىرىپ بوپسىز مۇئەللىم ، جاپا تارتقانسىز – ھە ؟ >> دەپ قوياتتىڭىز . بۇ سۆزىڭىز بىلەن ،شۇ ئوقۇغۇچىلارنىڭ ساۋادىنى چىقىرىشتا تارتقان شۇنچە كۆپ جاپالىرىمىز ئۇنتۇلۇپ ، ناھايىتى كاتتا مۇكاپات ئالغاندەك ، تېخىمۇ ياخشى ئىشلەش ئىرادىسىگە كېلىپ كېتەتتۇق .
بەزىدە دەرسخانىنىڭ دەرىزىسىدىن ئەلەڭڭىدە قاراپ قويغاندەك ئۆتۈپ كېتىپ ، ئىشخانىمىزدا ساقلاپ تۇراتتىڭىزدە ، بىز چىققاندا ، << بۇ سائەتتىكى دەرسنى ئاجايىپ يېڭىچە ئۇسۇلدا ئۆتتىڭىز جۇمۇ مۇئەللىم . بالىلارنى شۇنداق جەلپ قىلىۋاپسىز >> دەپ قوياتتىڭىز ھەم شۇ دەرسكە ئائىت بەزى مەسىلىلەرنى سوراپ كۆرەتتىڭىز . يەنە << بۇ دەرسنى سىز شۇنداق ئوبدان ئۆتتىڭىز . پالان مۇئەللىم قانداق ئۆتەر بىر ئاڭلاپ باقايلى ، يۈرۈڭ >> دەپ ، ئوخشاش دەرس ئۆتىدىغان مۇئەللىملەرنى يەنى شۇ خىل دەرسنى ئۆتىدىغان بىر مۇئەللىم دەرس ئۆتىدىغان سىنىپقا باشلاپ ماڭاتتىڭىز .
ئۇ چاغلاردا شۇ ئىشلارغا قانداقمۇ ۋاقىت ئاجراتقان بولغىيتىڭىز –ھە ، ھازىر ئىشلىرىڭىز بەك كۆپ ، ئۇنداق ئىشلارغا ۋاقتىڭىز يەتمەيدۇ .
يىغىپ ئېيتقاندا شۇ چاغلاردىكى شۇ ئىشلىرىڭىز ھەقىيقى سىناپ تەكشۈرۈش ئىدى . ھازىر بولسا ساناپ تەكشۈرۈشنى يولغا قويۇپ قويدىڭىز : يەنى ھەپتىلىك دەرس تەييارلىقى مۇنچە سائەت بولۇش، ھەپتىلىك تاپشۇرۇق قېتىم سانى مۇنچە قېتىم بولۇش ، ھەپتىلىك دەرس ئاڭلاش مۇنچە سائەت بولۇش ... مۇشۇنداق بولۇشلار ناھايىتى كۆپ بولۇپ ، بۇلاردا دەپتەر ۋە خاتىرىدىكىنى ساناپ ئۆتكۈزىۋالىدۇ . دەرسنى كونا دەرس تەييارلىقىدىن كۆچەردىمۇ ياكى يېڭىچە ئۇسۇلدا تەييارلىدىمۇ ، ئوقۇغۇچىلارنىڭ ئەمەلىي ئەھۋالىغا قاراپ تاپشۇرۇق بەردىمۇ ياكى قېتىم سانىنى توشقۇزۇش ئۈچۈنلا تاپشۇرۇپ بەردىمۇ ، دەرسنى بىرەر مەنئەت ئالاي ياكى دەرس ئۆتكۈچىگە بىرەر ئوبدان تەكلىپ بېرەي دەپ ئاڭلىدىمۇ ياكى دەرس ئاڭلاش قېتىم سانىنى توشقۇزۇش ئۈچۈنلا ئاڭلىدىمۇ ۋە ياكى دەرسخانىغا كىرمەي ، ئىشخانىدا ئولتۇرۇپلا بىرەر مۇئەللىمدىن << بۈگۈن قايسى دەرسنى ئۆتتىڭىز >> دەپ سوراپلا ، دەرس ئاڭلىغان بولىۋالدىمۇ ؟ بۇلار بىلەن تەكشۈرگۈچىلەرنىڭ پەرۋايى پەلەك . ئۇلار پەقەت دەرس تەييارلىق دەپتىرىدىكى تەييارلانغان دەرسنىڭ سائەت سانىنى ، دەرس ئاڭلاش خاتىرىسىگە يېزىلغان دەرس ئاڭلاش خاتىرىسىنى ، تاپشۇرۇق نومۇرىنى خاتىرلەش خاتىرىسىدىكى نومۇر يېزىلغان كاتەكچىلەرنى بىر ، ئىككى ، ئۈچ ... دەپ ساناپ بەلگىلەنگەن ساننى توشقۇزغان – توشقۇزمىغانلىقىنى ئېنىقلىسىلا بولدى .
مۇدىر ، سىزنىڭچە خاتىرە مۇھىممۇ ياكى ئوقۇغۇچىلارمۇ ؟ بۇنى بىر ئويلىشىپ بېقىڭ .
|