|
مۇدىر ئويلىشىپ بېقىڭ (2 ) (دانىش )
مۇدىر ، سىز يېڭى مۇدىر بولغان چاغلاردا ئوقۇتقۇچىلار قۇرۇلتىيى دەيدىغان بىر يىغىنىمىز بار ئىدى . بۇ يىغىن ئارقىلىق مەكتەپ تۈزۈملىرى تېخىمۇ مۇكەممەلىشەتتى ، ئومۇمدىن چۈشكەن پىكىرلەر مۇزاكىرە قىلىناتتى ، پىكىرلەرنىڭ مۇۋاپىقلىرىنى ھەل قىلىش توغرىسىدا چارە –تەدبىرلەر ئوتتۇرىغا قويۇلاتتى . ئىش قىلىپ مەكتەپنىڭ نۇرغۇن ئىشلىرىنى قانداق بىر تەرەپ قىلىش شۇ يىغىندا قارارلاشتۇرىلاتتى .
بەلكىم سىز << ئوقۇتقۇچىلار قۇرۇلتىيىدىن ئىبارەت بۇ يىغىننى ئېچىش ئاۋارىچىلىق ، مەكتەپكە تۈزۈم ۋە چارە- تەدبىر لازىم بولسا ، بىرەر مەكتەپكە تەجىربە ئالماشتۇرۇشقا بېرىپ ، شۇ مەكتەپنىڭ تۈزۈم ۋە چارە – تەدبىرلىرىنى ئەكەلسەكلا بولىدىكەنغۇ >> دەپ ئويلىغان بولسىڭىز كېرەك . ئوقۇتقۇچىلار قۇرۇلتىيىدىن ئىبارەت بۇ يىغىننى خېلى ۋاقلار بولدى ئاچماس بولۇپ ، بەزى مەكتەپلەرنىڭ ئاجايىپ تۈزۈملىرىنى يولغا قويۇشقا باشلىدىڭىز . بولۇپمۇ يوقلىما تۈزۈمىنى يولغا قويۇش جەھەتتە ئاجايىپ زور تىرىشچانلىق كۆرسەتتىڭىز :
ئەسلى يىللىق مەسئۇلى تەرىپىدىن ھەر كۈنى ئەتىگەنلىكى خىزمەتكە چۈشكەندە بىر قېتىم قىلىنىدىغان يوقلىما سىز مۇدىر بولۇپ ئىككىنچى يىلى ھەر كۈنى تۆت قېتىم ( ئەتىسى ئەتىگەندە ، چۈشلۈك دەم ئېلىشقا چىققاندا ، چۈشتىن كېيىن خىزمەتكە چۈشكەندە ، چۈشتىن كېيىن خىزمەتتىن چۈشكەندە )يوقلىما قىلىشقا ئۆزگەردى . يىللىق مەسئۇلى يېقىنلىرىنىڭ كېچىككەن ، بالدۇر قايتقانلىرىنى خاتىرلىمەي قالارمىكىن دېگەن ئەندىشە بىلەن ، بەزىدە بەزىلەرنىڭ بار يوقلىقىنى ئېنىقلاش ئۈچۈن تېلىفوندا چاقىرىپمۇ باقتىڭىز . يەنىلا گۇمانىڭىز تۈگىمەي ، ئاجايىپ ئەقلىڭىزنى بىر ئىشلەتتىڭىز – دە ، يۈز قارىمايدىغانغا يەنىلا ھېسىياتسىز ماشىنا – ئۈسكىنە ياخشى دېگەن ئەقىلگە كېلىپ ، خېلى پۇل خەجلەپ ، كا سۈركەپ يوقلىمىدىن ئۆتىدىغان ئۈسكىنە ئورناتتىڭىز . سىز ھەقىقەتەن ئەقىللىق ئىدىڭىز ، لېكىن ، كۆپنىڭ ئەقلى يەنىلا سىزدىن ئارتۇق كەلدى . بەزىلەر كېچىكىپ قالماقچى ياكى بالدۇر قايتماقچى بولسا ، كاسىنى يېقىن ئۆتىدىغان بىرەرىگە بېرىپ قويىدىغان ، ئۇ كىشىنىڭ يېقىنى ئۆزىنىڭ كاسىنى يوقلىما ئۈسكىنىسىگە سۈركىگەندە ھېلىقى ھاۋالە قىلغۇچىنىڭ كاسىنىمۇ باشقىلارغا تۇيغۇزماي سۈركەپ قويىدىغان بولىۋالدى . سىز بۇنى ئوڭشاشقا يەنى بىر ئەقىل ئىشلىتىپ ، بارماق تەككۈزۈپ يوقلىمىدىن ئۆتىدىغان ئۈسكىنىنى ئورناتتىڭىز . بۇ ناھايىتى بولىدىغان ئەقىل بولۇپ ، كانى << سۈركەپ قوي >> دەپ يېقىنلىرىمىزغا بېرىپ قويغىلى بولغان بىلەن ، بارماقنى << سۈركەپ قوي >> دەپ بېرىپ قويغىلى بولمايدىكەن . بۇ ئەقلىڭىز بىر مەزگىل كارغا كەلگەندىن كېيىن ، يوقلىمىغا نارازى بولغانلارنىڭ بارمىقىنى ھېلىقى ئۈسكىنىگە تازا كۈچەپ بېسىشىدىن بولسا كېرەك ھېلىقى ئۈسكىنە بىر ئايدىن كېيىنلا كاردىن چىقتى . سىز يەنى بىر << ئەساقپىرلا >> دېدىڭىز – دە ، پۇل خەجلەشتە يەنى بىر غەيرەت قىلىپ ، كۈزىتىش ئۈسكىنىسى ئورناتتىڭىز . بۇ خېلى رولى بار ئۈسكىنە بولسىمۇ ، ئوقۇتقۇچىلارنى شۇ <<كۈزۈتۈش كۆزنىكىگە قاراپ ماڭ !>> دەپلا تۇرغىلى بولمىغاندىكىن ، بەزى كېچىكىپ قالغان ، بالدۇر قايتقانلارنى تازا ئېنىق بىلگىلى بولماي قالدى .
ھەر نېمە دېگەن بىلەن مۇشۇنداق تىرىشچانلىق كۆرسىتىشىڭىز نەتىجىسىدە ئوقۇتقۇچىلارنىڭ << خىزمەت سىجىللىقى >> ناھايىتى ياخشى بولدى . لېكىن ، ئەۋەللەردە ئائىلىسىگە قايتىشقا ئالدىرىماي ، ئوقۇغۇچىلىرى بىلەن شەخسىي سۆبەتلەرنى قىلىۋالىدىغان ، ئارقىدا قالغان ئوقۇغۇچىلىرىغا دەرس تەكرارلاپ بېرىدىغان ، ئوقۇغۇچىلارنى كەشپىيات ، ئىجادىيەتلەرگە يېتەكلەپ ، ئۇلارنىڭ كەشپىيات ، ئىجادىيەت ئەسەرلىرىنى تۈزىتىشىگە ياردەم بېرىپ ، كۈنلەر ئولتۇرۇپ كەتكەنلەردە ئائىلىسىگە قايتىدىغان ئوقۇتقۇچىلار خىزمەتتىن چۈشۈشكە << كېچىكىپ قالماسلىق >> ئۈچۈن يۇقارقى ئىشلىرىنى تاشلاپ ، كۈزۈتۈش ئۈسكىنىسىنىڭ يېنىغا يۈگرەيدىغان بولدى . سىزنىڭ ئەسلى ئەڭ ئۆچ كۆرىدىغىنىڭىز يوقلىما ئىدى . سىز مۇئاۋىن مۇدىر بولۇشتىن ئىلگىرىلا << مېنى كېچىكتى دېسەڭلار دەڭلار . مەن يوقلىمىنى دەپ مۇھىم ئىشلىرىمنى تاشلاپ قويالمايمەن >> دېگەنتىڭىز ھەم يوقلىما بىلەن پەرۋايىڭىز پەلەك يۈرگەنتىڭىز . مۇئاۋىن مۇدىر بولغاندىن كېيىن يوقلىمىغىمۇ خېلى تولۇق قاتنىشىدىغان بولدىڭىز . مۇدىر بولۇپ ئىككىنچى يىلىغا كەلگەندە << پېرىڭ بولغان ئېرىڭ بولۇر >> دېگەندەك ، سىز ئەڭ ئۆچ كۆرىدىغان يوقلىما قىلىش ئىشى سىز ئەڭ مۇھىم دەپ بىلىدىغان ئىشقا ئايلاندى .
ئەسلى ئوقۇغۇچىلارنىڭ تولۇقلىنىش نىسبىتى يۇقۇرى بولۇپ كېلىۋاتقان مەكتەپتە ، ئوقۇتقۇچىلارنىڭ دەرستىن چۈشكەندىن كېيىن ئوقۇغۇچىلار بىلەن ئىش كۆرىدىغان سائەت – سائەت ۋاقىتلىرى يوقلىمىدىن ئۆتۈشنى ساقلاشقا سەرپ قىلىنغانلىقتىن بولسا كېرەك ئەمدىلىكتە مەكتەپتىن چۈشۈپ قالغان ئوقۇغۇچى كۆپ بولۇش ئەھۋالى كۆرۈلدى .
مەكتەپتە كۈزۈتۈش ئۈسكىنىسىدىن ئۆتۈشتىن باشقا ، يىللىق مەسئۇلىنىڭ يوقلىمىسى ، پەن گۇرۇپپا مەسئۇلىنىڭ يوقلىمىسى ، بايراق چىقىرىش يوقلىمىسى ، سىياسى ئۆگىش يوقلىمىسى ، ئىككى گىمناستىكا يوقلىمىسى ، ئاپتاپ تەنتەربىيىسى يوقلىمىسى ، پائاليەتلەردىن كېيىنكى يوقلىما ، سىنىپ باشلىقىنىڭ يوقلىمىسى ... قاتارلىق يوقلىمىلار يولغا قويۇلغان بولۇپ ، بۇلارنىڭ ئىچىدىكى سىياسى ئۆگىنىش يوقلىمىسى دەھشەت مۇھىم يوقلىما ھېساپلىنىدۇ . سىياسى ئۆگىنىش يوقلىمىسىدىكى بىر قارا چېكىت سىزنىڭ پۈتۈن بىر مەۋسۈملۈك خىزمىتىڭىزنى بىر تىيىنغا تەڭ قىلىۋىتەلەيدۇ . شۇڭا سىياسى ئۆگىنىش يوقلىمىسىغا مەۋسۈم بېشىدا بىر قارا چېكىت چېكىلىپ قالغان ئوقۇتقۇچى << مەن ئەمدى تۈگەشتىم >> دەپ قاراپ ، ئاكىتىپلىقىنى يوقىتىدۇ . قالغان يۇقلىمىلار گەرچە سىياسى ئۆگىنىش يوقلىمىسىغا يەتمىسىمۇ ، نەچچە يۈز تۈشۈكتىن قىسىلىپ تارتىپ ئۆتۈش جەريانىدا خوراپ ، قولىڭىزغا ئاران كەلگەن مائاشىڭىزنى يەنىمۇ خورىتالايدۇ . بۇ يوقلىمىلار << بار >> دېگەن ئوقۇتقۇچىنىڭ جىسمىنىڭ بارلىقىغا ئىسپات بولالايدۇ ، ئەمما شۇ << بار >> دېگەن ئوقۇتقۇچىنىڭ روھىنىڭ بارلىقىنى بىر نەرسە دېمەك قېيىن . ئەۋەللەردە بىرەر ئوقۇغۇچىمىز ئەتىگەنلىك مۇزاكىرىگە كېلەلمىگەن بولسا ، شۇ ھامانلا شۇ ئوقۇغۇچىمىزنىڭ ئۆيىگە بېرىپ ، ئۇ ئوقۇغۇچىمىزنى بىر ئاماللارنى قىلىپ دەرسكە ئۈلگۈرۈتىپ ئەكىلىۋالاتتۇق . ھازىر ئۇنداق قىلىشقا ماڭىدىغان بولساق ، كۈزۈتۈش كۆزنىكى بىزنى خىزمەتتىن بالدۇر قايتتى دەپ خاتىرلىۋالىدۇ . شۇڭا ئوقۇتقۇچىلار ئوقۇغۇچىسىنىڭ كېلىشىنى ساقلاشقا مەجىبۇر بولىدىغان ، تولا بولمىغاندا تېلىفون قىلىدىغان ، تېلىفونى ئېلىنماي قالسا ، << ۋاي بولدىلا >> دەپ ، دەرستىن چۈشكەندە شۇ ئوقۇغۇچىنىڭ خوشنىسى بولغان بىرەر ئوقۇغۇچىسىغا ئەتە شۇ ئوقۇغۇچىسىنى ئالغاچ كېلىشنى تاپشۇرىدىغان بولۇپ قالدى.
مۇدىر ، سىز مۇدىر بولغان دەسلەپكى يىلى خىزمەتتە كېچىكىش ئەھۋالى كۆرۈلگەن بەزى ئوقۇتقۇچىلار بىلەن ئايرىم ، دوستانە ، قىسقا سۆھبەتلىشىش ئارقىلىقلا ، ئۇلاردىكى كېچىكىشنى سەللىمازا تۈگىتىۋەتكەن ئىدىڭىز . سىز بىلىسىز مەكتىپىمىزدە خىزمەتكە كېچىكىدىغان ، بالدۇر قايتىدىغان بىر قانچىلا ئوقۇتقۇچى بار ، سىز بۇرۇنقى چارىڭىز بىلەن ئۇلارنى تامامەن ئوڭشاپ كېتالايسىز . ئەگەر شۇنداق قىلغان بولسىڭىز ، كۆپ سانلىق ئوقۇتقۇچىلارغا دەرستىن سىرتقى ۋاقىتلاردا ئوقۇغۇچىلار بىلەن ئىش كۆرۈۋىلىش پۇرسىتى چىقاتتى . مۇدىر ، سىزنىڭ بۇرۇنقى يوقلىمىغا ئۆچ خاراكتىرىڭىزنى سېغىنىپ قالدۇق . يوقلىمىنىڭ ئورنىغا بۇرۇنقى ئۈنىملىك چارە – تەدبىرلىرىڭىزنى ئالماشتۇرۇشنى ئويلىشىپ باقسىڭىز .
|
