|
پەرق
قۇرداش ئىككى ياش بىرلا ۋاقىتتا بىر دۇكانغا ئىشقا كىرىپتۇ ھەمدە ئوخشاش مائاش ئاپتۇ. ئەمما، ئانود دېگەن يىگىتنىڭ مەرتىۋىسى بىردىنلا يۇقىرىلاپ كېتىپتۇ، برونو دېگىنى بولسا ئۆز ئورنىدا تۇرۇۋېرىپتۇ. ئۇ خوجايىننىڭ ئۆزىگە ئادىل مۇئامىلە قىلمىغانلىقىدىن ناھايىتى نارازى بولۇپ، ئاخىر بىر كۈنى خوجايىننىڭ ئالدىغا كىرىپ كوتۇلداشقا باشلاپتۇ. خوجايىن ئۇنىڭ ئاغرىنىشلىرىنى سەۋرچانلىق بىلەن تىڭشىغاچ ئولتۇرۇپ، كۆڭلىدە ئۇنىڭ بىلەن ئانود ئوتتۇرىسىدىكى پەرقنى ئۇنىڭغا قانداق چۈشەندۈرۈشنى ئويلىشىپتۇ.
− برونو ئەپەندى، − دەپتۇ خوجايىن، − سىز بازارغا بېرىپ، بۈگۈن ئەتىگەن نېمە سېتىۋاتقانلىقىنى كۆرۈپ كەلسىڭىز، − دەپتۇ.
برونو بازاردىن قايتىپ كېلىپ خوجايىنغا بۈگۈن ئەتىگەن بازاردا بىر دېھقاننىڭ بىر ھارۋا ياڭيۇ ئەكېلىپ سېتىۋاتقانلىقىنى ئېيتىپتۇ.
− قانچىلىك چىقىدىكەن؟ − دەپ سوراپتۇ خوجايىن.
برونو دەررۇ قالپىقىنى كىيىپ بازارغا قاراپ يۈگۈرۈپتۇ. ئاندىن قايتىپ كېلىپ خوجايىنغا ياڭيۇنىڭ قىرىق تاغار ئىكەنلىكىنى ئېيتىپتۇ.
− باھاسى قانچىكەن؟
برونو بازارغا ئۈچىنچى قېتىم قاتراپ بېرىپ باھانى سوراپ كەپتۇ.
− بوپتۇ، − دەپتۇ خوجايىن ئۇنىڭغا، − ئەمدى سىز ماۋۇ ئورۇندۇقتا ئولتۇرۇپ بىر ئېغىزمۇ گەپ قىلماي، باشقىلارنىڭ نېمە دەيدىغانلىقىنى ئاڭلاپ بېقىڭ.
ئانود بازاردىن ناھايىتى تېزلا قايتىپ كېلىپتۇ ھەمدە دوكلات قىلىپ ھازىرغىچە بىرلا دېھقاننىڭ ياڭيۇ سېتىۋاتقانلىقى، ياڭيۇنىڭ قىرىق تاغار ئىكەنلىكى، باھاسىنىڭ قانچە ئىكەنلىكى؛ ياڭيۇنىڭ سۈپىتىنىڭ ناھايىتى ياخشىلىقى، ئۆزىنىڭ خوجايىن كۆرۈپ باقسۇن دەپ بىرنى ئالغاچ كەلگەنلىكى؛ بۇ دېھقاننىڭ بىر سائەتتىن كېيىن يەنە بىرنەچچە ساندۇق پەمىدۇر ئەكېلىدىغانلىقى، ئۆزىنىڭ قارىشىچە، باھاسىنىڭ ناھايىتى ئەرزانلىقى، تۈنۈگۈن ئۆزلىرنىڭ دۇكىنىدىكى پەمىدۇرنىڭ تولىمۇ تېز سېتىلغانلىقى، ئامباردا كۆپ قالمىغانلىقى، شۇڭا ئۆزىنىڭ مۇنداق ئەرزان پەمىدۇرنى خوجايىن جەزمەن ئازراق ئالىدۇ دەپ ئويلاپ، پەمىدۇردىن بىرنى ئالغاچ كېلىپلا قالماستىن، يەنە ھېلىقى دېھقاننىمۇ باشلاپ كەلگەنلىكى، ئۇنىڭ شۇ تاپتا تالادا جاۋاب كۈتۈپ تۇرغانلىقىنى ئېيتىپتۇ.
شۇ چاغدا خوجايىن برونوغا بۇرۇلۇپ:
− ئەمدى سىز ئانودنىڭ ئىش ھەققىنىڭ نېمىشقا سىزنىڭكىدىن يۇقىرى بولىدىغانلىقىنى چۈشەنگەنسىز؟ − دەپتۇ.
( مەنبە: «قەترىگە يوشۇرۇنغان دېڭىز» ناملىق كىتابتىن ئېلىندى. 2012-5-1 )
|