ئوقۇغۇچىلار قەلب كارتۇچكىسى ئوقوتوش ۋە ئىزدىنىش تەۋپىق مۇنبىرى دەرىس تەييارلىقلىرى

ئوقۇغۇچىلار قەلب كارتۇچكىسى
يۈسۈپجان غۇپۇر
سىنىپ مەسئۇللۇق خىزمىتىدە سىنىپتىكى ئۇقۇغۇچىلارنىڭ ئەھۋالىنى ۋاقتىدا ئىگىللەپ تۇرۇش ئىنتايىن مۇھىم شۇنداقلا قىيىن بولغان بىر مەسىلە .تۆۋەندە مۇشۇ مەسىلىنى ھەل قىلىشتىكى بىر ۋاستە – ئوقۇغۇچىلار قەلب كارتۇچكىسى تونۇشتۇرىلىدۇ .
ئوقۇغۇچىلار قەلب كارتۇچكىسىنىڭ ئاساسلىق ئىدىيىسى:ئوقۇغۇچىلارنى ئۇلارنىڭ كۆڭلىنى ئېچىپ بېرەلەيدىغان بىر قانچە سۇئاللارغا قەرەللىك ھالدا (ھەپتىدە بىر قېتىم،ھەر ھەپتىنىڭ ئاخىرى تارقىتىلىدۇ ) جاۋاپ يازغۇزۇشتىن ئىبارەت .
تۆۋەندە پايدىلىنىش ئۈچۈن ئوقۇغۇچىلار قەلب كارتۇچكىسىنىڭ بىر شەكلى بېرىلدى .
ئوقۇغۇچىلار قەلب كارتۇچكىسى

جاۋاپ بېرىدىغان سۇئاللار جاۋاپ
مۇشۇ ھەپتە ئىچىدە سىزنى ئەڭ خوشال قىلىدىغان ئىش
مۇشۇ ھەپتە ئىچىدە سىز ئويلاشنى خالىمايدىغان ئىش
مۇشۇ ھەپتە ئىچىدە سىز ئەڭ ياخشى ئۆتۈلدى دەپ قارىغان دەرس
مۇشۇ ھەپتە ئىچىدە سىز ياخشى ئۆتۈلمىدى دەپ قارىغان دەرس
قايسى ئوقۇتقۇچىغا دەيدىغان، قانداق گېپىڭىز بار ؟
قايسى ساۋاقدىشىڭىزغا دەيدىغان، قانداق گېپىڭىز بار ؟
سىنىپ مەسئۇلىڭىزغا كۆرسىتىدىغان بىرەر ئەقىل بارمۇ ؟
بىرەر يېڭى نەرسە ئىجاد قىلىشنى ئويلاپ باقتىڭىزمۇ ؟
سىنىپ مەسئۇلىغا دەيدىغان قانداق گېپىڭىز بار ؟
بۇنىڭدىكى سۇئالنى ھەر قايسى ئوقۇتقۇچىلار ئۆزىنىڭ ئەمەلىي ئەھۋالىغا ۋە خىزمەتنىڭ مۇھىم نۇقتىسىغا ئاساسەن مۇۋاپىق ئۆزگەرتسە بولىدۇ .ئەمدى مەن سۇئالنى مۇشۇنداق لاھىيلەشتىكى مەقسىتىمنى ئوتتۇرىغا قويۇپ ئۆتەي :
1- سۇئال. ئوقۇغۇچىلارنىڭ نېمىدىن ( ماددىي نەرسىدىنمۇ ياكى مەنىۋىي نەرسىدىنمۇ ) بەكرەك خوش بولىدىغانلىقىنى بىلىش .
2- سۇئال .ئۇقۇغۇچىلارنىڭ ئازابىنى ۋاقتىدا بايقاش.( ئوخشاش بىر مەسىلىنى 3 قېتىم يازسا چوقۇم شۇ ئوقۇغۇچى بىلەن سىنىپ مەسئۇلى ئۆزى〈ياكى پىسخىك مەسلىھەت بەرگۈچى ئوقۇتقۇچى〉 كۆرۈشۈپ مۇشۇ مەسىلىنى ھەل قىلىشقا ياردەملىشىش )
3- 4-سۇئال.ئوقۇغۇچىنىڭ قايسى دەرسنى بەكرەك چۈشىنىپ قايسى دەرسلەرنى چۈشىنەلمەي مېڭىۋاتقانلىقىنى بىلىش يەنى كۆپ ساندىكى ئوقۇغۇچىلار ئۆزى ياخشى كۆرىدىغان ياكى بىلىپ مېڭىۋاتقان دەرسنى ياخشى ئۆتۈلدى دەپ قارايدۇ .بۇ سۇئال مەلۇم دەرىجىدە دەرس ئوقۇتقۇچىلىرىنى نازارەتچىلىك قىلىش رولىنىمۇ ئۆتەيدۇ .
5- سۇئال .نۇرغۇن ئوقۇغۇچىلار ئۆزىنىڭ بەزىبىر گەپلىرى ( نارازىلىغى،ئوقۇتقۇچىنىڭ خاتا چۈشىنىپ قېلىشى...) نى شۇ دەرس ئوقۇتقۇچىسىغا بىۋاستە دېيەلمەيدۇ ياكى ئۇنى دەرھاللا ئۇنتۇپ كېتەلمەيدۇ، بۇ سۇئال ئۇلارغا بىر ئىچ بوشىتىۋېلىش پۇرسىتى بىلەن تەمىنلەيدۇ.( ئەگەر ھەقىقەتەن مەسىلە ئېغىر بولسا سىنىپ مەسئۇلى ۋاكالىتەن شۇ ئوقۇتقۇچى بىلەن كۆرۈشۈپ چۈشىنىش ھاسىل قىلىنسا بولىدۇ)
6-سۇئال.ساۋاقداشلار ئارىسىدا يۈز بېرىۋاتقان ئىشلاردىن ۋاقتىدا خەۋەردار بولۇش مەقسىدىدە چىقىرىلغان .
7-سۇئال.ئوقۇغۇچىلارنى سىنىپنى باشقۇرۇشقا قاتناشتۇرۇش مەقسىتىدە چىقىرىلغان .
8-سۇئال.ئوقۇغۇچىلارنىڭ ئىجادچانلىق روھىنى ۋاقتىدا بايقاپ، مەدەت بېرىش مەقسىتىدە چىقىرىلغان .
9- سىنىپ مەسئۇللۇق خىزمىتىدە ساقلانغان يېتەرسىزلىكلەرنى ۋاقتىدا بايقاش مەلۇم جەھەتتىن ئوقۇغۇچىلارغا سىنىپ مەسئۇلىدىن رازى بولمىغان ، مۇۋاپىق بولمىدى دەپ قارىغان تەرەپلىرىنى دېيىشكە پۇرسەت بېرىش مەقسىتىدە چىقىرىلغان .
ئوقۇغۇچىلار قەلب كارتۇچكىسىنى قوللانغاندا دىققەت قىلىدىغان ئىشلار :
1. ئوقۇغۇچىلارغا كارتۇچكىغا يازغان جاۋاپلىرىنىڭ مەخپىيەتلىكىنى ساقلاشقا ۋەدە بېرىش ھەم چوقۇم شۇ بويىچە قىلىش .ئەگەر مەخپىيەتلىك ساقلانمىسا ئوقۇغۇچىلار كۆڭلىدىكىنى يېزىشقا ئۇنىمايدۇ نەتىجىدە بۇ كارتۇچكا قەلب كارتۇچكىسى بولالمايدۇ .
2. ئوقۇغۇچىلارغا بۇ كارتۇچكىدىكى ھەممە سۇئالغا چوقۇم جاۋاپ يېزىشقا قىستىماسلىقى كېرەك . بۇ كارتۇچكا تاپشۇرۇق ئەمەس ، مەسىلە بولسا يېزىش مەسىلە بولمىسا ئاق قالدۇرۇشقا رۇخسەت قىلىش .
3. مەلۇم ئوقۇغۇچىنىڭ كارتۇچكىغا يازغان جاۋابىدىن ،شۇ ئوقۇغۇچىدا بەلگىلىك مەسىلە بارلىقى بايقالغاندا ،ھەل قىلىشتا ئۇسۇلغا ئالاھىدە دىققەت قىلىش كېرەك بولمىسا يەنە شۇ ئوقۇغۇچىدا مەسىلە كۆرۈلگەندە كارتۇچكىغا يېزىشقا جۈرئەت قىلالمايدۇ.