تەۋپىق مۇنبىرى - Powered by phpwind

مۇنبەرداشلارغا( چارتېكىن)

    ئەسسالامۇ - ئەلەيكۇم ، مۆھتىرەم تورداشلار ، كائىناتتىكى پۈتۈن كەرەملەر ياخشى نام ئاتاقلار ھىدايەت ۋە مەرھەمەتلەر سىلەرگە بولسۇن . كەمىنە چۆلدە ئۇچقان كىچىككىنە خەس كەبى ئالدىڭىزلاردا پەيدا بولغانلىقىمنى ئەپۇ ئىتەكلىرى بىلەن يېپىپ ، ھىدايەت يامغۇرلىرى بىلەن يۇيۇپ ، سېخىلىق ئاپتىپىنى چېچىشىڭلارنى يەتتە قات تازىم بىلەن ئۈتۈنىمەن .
   ئۇمۇمەن ، تور - سىر ئەسرار دەرەخلىرى كىشىلەرنىڭ نەپسى ئىشتىھالىرىنى قوزغايدىغان ، گۈل –چىچەكلەرنىڭ تۈسلىرى بىلەن بىزەلگەن ، گۇلزارنىڭ ئەتراپلىرىنى ھېچقانداق كۆز كۆرۈپ باقمىغان ، ھېچقانداق قۇلاق ئاڭلاپ باقمىغان ، گۈزەل گۈللەرنىڭ بويلىرى بىلەن خۇش پۇراققا كىرگەن ھېكمەت بېغىدۇ.
   ئۇ، يالغۇزلارغا سىرداش، ئاشىقلارغا مەشۇق ، شائىرلارغا ئىلھام ، ئالىملارغا يېڭىلىق ئاتا قىلغۇچى سېھىرلىك كىتاب .
   دانالار ، ئالىملار ئۇنىڭ ھەقىقىتىدىن ئۆزىگە لەززەت ئىلھام تېپىش نىيتىدە سەيلە قىلسا ، نادانلار ئۇنىڭ كۆز قاماشتۇرىدىغان سېھىر ئەسرارلىرىدىن لەززەت تېپىش مەقسىدىدە كېلىدۇ .

   كەمىنە ــ پېقىر شۇ تەرىقىدە مەنالار خەزىنىسىنىڭ جەۋھەر پۇرۇچى ۋە سۆز سەرراپخانىسىنىڭ ھېكمەتشۇناسى ، غارايىپ ھېكمەتلەرنىڭ چىرايىنى ئاچقۇچى ۋە ئاجايىپ رىۋايەتلەرنىڭ رەسسامى، خەۋەرلەر مۇقەددىمىسىنىڭ يۈزىنى ئاچقۇچى ئۇشبۇ باغۇ ھېرەمگە قەدەم باسقىنىمدا ، ئۇنىڭ مۇبارەك سەھىپىلىرىدە ئالەمگە تۇنۇلغان مەشھۇر ئالىملار، دانا تەدبىرلىك ئىلىم پۇرىقى پۈتكۈل تېنىدىن تارقاپ تۇرىدىغان زىيالىيلار، پازىل بۇزرۇكۋار زاتلار، نەسىھەتچى ھېكىملەر ، ھەۋەس كۇرسىدا ئولتۇرۇپ ھېكمەتلەرنى تۈكۈۋەتكەنلىكىنى كۆرۈپ، ئۆزۈمنى بۇ ئەرزىمەس تېمام بىلەن زامان مۆتىۋەرلىرى ۋە دەۋران زىرەكلىرىنىڭ تەنەن ئوقىغا نىشان قىلغانلىقىمنى ھېس قىلدىم . مەن بۇ ئىشتىن ھەرقانچە كۆڭۈل سۇۋۇتقان بولساممۇ ھەۋەسنىڭ ۋەسۋەسىسى ۋە «ھەركىشىنىڭ ئىنسابى بولسا كىشىگە تەنە ۋە مالامەت قىلىشتىن ئۈزىنى تارتىدۇ » دېگەن ئىبرەتلىك سۆزنى ئۈزۈمگە قالقان قىلىپ تۇتتۇم .
   دوستۇم ، سىز بىلەمسىز ؟ قايسىبىر دەرىسلىك كىتاپتا « ئۆگىنىش ھەيران قېلىش دېمەكتۇر . چۈنكى ئۆگىنىشتە ھەيران قېلىش بولمىسا قىزىقىش بولمايدۇ، قىزىقىش بولمىسا ئويلىنىش بولمايدۇ ، ئويلىنىش بولمىسا ئىزدىنىش بولمايدۇ ،ئىزدىنىش بولمىسا ئىجاد قىلىش بولمايدۇ، ئىجاد قىلىش بولمىسا يېڭلىق يارىتىش بولمايدۇ » دېيىلگەن . ئىنسانىيەتنىڭ ئىستىقبالى ، بەختى پەقەت بىلىمدۇر . بىلىمنىڭ ئۈزى ئۆگىنىشتۇر. چۈنكى ، ئۇنىڭ ئۈگىنىپ بولغۇدەك چېكى بولمايدۇ . بىز توردىن ئىبارەت ئەنە شۇ سېھىرلىك باغقا ھەيران قېلىش ۋە قىزىقىش بىلەن كىردۇق . كۈڭۈل بوستانىمىز ئەنە شۇ باغدا خۇش پۇراققا تولدى . بىز ئەنە شۇ جاھان باغچىسىدا ئۆگىنەيلى، ئىجاد قىلايلى، ئىزدىنەيلى، ئوينايلى، ئۆز - ئارا ھەمنەپەس بۇلۇپ ، ئەشۇ باغنى ئاسرايلى ، شۇنداقلا ئۈزىمىزنىمۇ قوغدايلى . كۆز قارىشىمىزنى ، بىلگىنىمىزنى بۇجاھان داستىخانىغا تاشلايلى. بىلمىگەننى ئۇنىڭدىن سورايلى . ئەشۇ ئارزۇ مەيدانىدەك كەڭرى، ئۈمىد دالاسىدەك بىپايان، كۈڭۈل تۇلپارىدەك تېز، يارنىڭ ۋىسالىدەك جەلپكار، بۇ تورنى سائادەتمەنلەر ئۈچۈن مۇقەددەس جايغا ئايلاندۇرايلى . ھەرگىزمۇ بۇ تورنى قاپلاپ تۇرغان پەلەك يۇلتۇزلىرىدەك كۆپ ، خۇشبۇي گۈلى رەيھانلار ئارىسىغا ھېيلە - مىكىر ۋە پىتنە بۇيلىرىنى ئۈندۈرمەيلى . جەننەتنىڭ مەيىن شامىلى ئېلىپ كەلگەن خۇش پۇراقلارنىڭ ئارىسىغا بەتبۇي شۇم پۇراقلارنى ئارىلاشتۇرمايلى . قانۇنغا خىلاپ ئىشلارنى قىلىپ ، پاك روھىمىزنى نىجاسەت بىلەن بۇلغىمايلى .ئالدىراقسانلىق قىلىپ ھالاكەت دېڭىزغا تەۋەككۇل قىلمايلى . قەلب تەشنالىقىمىزنى ئۇنىڭ ئابى ھايات سۈيى بىلەن سۇغىرايلى . ھەرگىز ئۇ سۇغا زەھەر تاشلىمايلى .
   مۆھتىرەم تورداشلار ، سۆزلىرىمنىڭ شەربەتلەردەك تاتلىق ھەم مەنالىق ، تاغ سۈيىدەك سۈزۈك ھەم راۋان بولمىسىمۇ ، كۈپ سۈيىدەك سوغوق ، تاڭ شەبنەملىرىدەك جۇلالىق بولۇشىنى ، ھۆرمەتكە سازاۋەر ، قەلبى مېھرى - شەپقەت ، ئىلىم – ئىرپان بىلەن تۇيۇنغان مۆھتىرەملەرگە چۈشىنىشلىك بولۈشىنى ئاتىكاچىلىق بىلەن ئېيتقان سۆزلىرىمنى ئەپۇ دېڭىزغا تاشلاپ ، مەرھەمەت ئېتەكلىرى بىلەن يېپىشىنى تىلەيمەن.
مەنبە: QARTIKIN