تەۋپىق مۇنبىرى - Powered by phpwind

خۇشھاللىق قەيەردە

(زى فېڭ)

بىر سېھرىگەر بىر كىچىك چۆپنىڭ يىغلاۋاتقانلىقىنى كۆرۈپ،ئۇنىڭدىن سەۋەبىنى سوراپتۇ.كىچىك چۆپ:
-مەن بەك كىچىك،بەك ئادەتتىكىدەك،شۇڭا كۆڭلۈم بەك يېرىم،-دەپتۇ.شۇنىڭ بىلەن سېھرىگەر ئۇنى بىرتۈپ چىرايلىق گۈلگە ئايلاندۇرۇپ قويۇپ،ئۇنىڭ يېنىدىن ئايرىلىپتۇ.
نەچچە يىلدىن كېيىن سېھرىگەر گۈلنىڭ يېنىغا كېلىپ،ھازىر شۇنداق كۆركەم گۈلگە ئايلانغان كىچىك چۆپنىڭ يەنىلا يىغلاۋاتقانلىقىنى كۆرۈپتۇ.سېھرىگەر سەۋەبىنى سورىغانىكەن گۈل:
-مەن دەسلەپتە راستىنلا ناھايىتى خوشھال بولغان ئېدىم،ئەمما ھەر يىلى كۈزدە ئۆزۈمنىڭ قۇرۇپ كېتىپ،يازدا يېڭىباشتىن كۆكلەيدىغانلىقىنى ،ھەتتا ھەقىقىي گۈزەل ۋاقتىمنىڭ ناھايىتى قىسقا ئىكەنلىكىنى ھېس قىلغاندىن كېيىن ،يەنىلا خۇشھال بولالمىدىم،-دەپتۇ.شۇنداق قىلىپ سېھرىگەر ئۇنى ناھايىتى ھەيۋەتلىك دائىم كۆكىرىپ تۇرىدىغان دەرەخكە ئايلاندۇرۇپ قويۇپ،ئۇنىڭ يېنىدىن كېتىپتۇ.
يەنە بىر قانچە يىل ئۆتكەندىن كېيىن،سېھرىگەر يەنە بىر قېتىم ئايلىنىپ كېلىپ،ھېلىقى دائىم كۆكىرىپ تۇرىدىغان دەرەخكە ئايلاندۇرۇپ قويغان كىچىك چۆپنىڭ يەنىلا قاش-قاپىغىدىن مۇز ياغدۇرۇپ ،غەمكىن ھالدا تۇرغانلىقىنى كۆرۈپتۇ ھەم سەۋەبىن سوراپتۇ.دائىم كۆكىرىپ تۇرىدىغان دەرەخ:
-مەن دەسلەپتە راستىنلا ناھايىتى خۇشھال بولغان ئېدىم،ئەمما ھېچكىممۇ مەندىن ھۇزۇرلانمىدى،مېنى ماختاپمۇ قويمىدى.شۇڭا يەنىلا خۇشھال بولالمىدىم ،-دەپتۇ.شۇنىڭ بىلەن سېھرىگەر ئۇنى خان ئوردىسىغا كۆچۈرۈپ ئەكىلىپ قويۇپ،ئۇنى كۆرگەنلىكى كىشىلەرنىڭ ھەممىسى ماختايدىغان ھالەتكە ئەكىلىپ قويۇپتۇ.
ئارىدىن ئانچە ئۇزاق ئۆتمەي،سېھرىگەر دائىم كۆكىرىپ تۇرىدىغان دەرەخنى كۆرگىلى بېرىپتۇ.قارىسا ئۇ يەنىلا خۇشھال بولالمىغانىكەن.
-قارىغاندا كىشىلەرنىڭ ماختاشلىرىنىڭمۇ ھېچ بىر مەززىسى يوق ئىكەن،،-دەپتۇ بۇ دەرەخ،-بەلكىم،مەن پەقەت سېھرىگەرگە ئايلانساملا ،ئاندىن مەڭگۈ خۇشھال بولالىشىم مۇمكىن.
سېھرىگەر ئۇنىڭغا قاراپ قويۇپ بېشىنى چايقىغىنىچە،ئۇنىڭ يېنىدىن كېتىپتۇ.
شۇنداق، بارلىق كىشىلەر قوغلىشىۋاتقان ھەر قانداق نەرسە كىشىلەرگە پەقەت ۋاقىتلىق رازىمەنلىك تۇيغۇسى ئاتا قىلىشى مۇمكىن،پەقەت كۆڭۈل تىنىچ،خاتىرجەم بولسىلا،ئاندىن مەڭگۈلۈك خۇشھاللىققا ئېرىشكىلى بولىدۇ.