| uzqak | 2011-08-19 13:41 |
نېمە يازىمەن؟ نېمە يازىمەن؟ قەلىمىمدىن نېمە يازىمەن؟- دەپ سورىدىم ؛ -يازغىن ، تەڭرىنىڭ پۈتمىشىنى، زىمىننىڭ قايغۇسىنى، ئىنساننىڭ شەيتانى نەپسىنى يەنە يالغۇز دەرەخنىڭ پىغانىنى يەنە پەرزەنت ئوتىدا كۈيىۋاتقان ئانىنى ....يازغىن... قۇلۇمغا قەلەم ئالدىم ؛ نمىدۇر مېنى ماغدۇرسىز ،قەلىمىمنى كۈچسىز قىلىپ قۇيىۋاتاتتى ..بۇ چەمبىرەك ھەسەن-ھۈسەندەك رەڭدار، ھەم ئېزىتقۇدەك بەزى پەيدا بۇلۇپ بەزى يوقاپ قەلىمىمنى ئۆزىگە رام قىلىپ، چىرمىۋېلىپ چىن ھېسىياتىمنى نەلەرگىدۇر بەنت قىلاتتى.. ھەي قەلەم نىمە يازاي؟ يازغىن، ئالەمشىمۇل توھپىلەرنى ياراتقان ئىنسانلارنى،ئائىلىسى ئۈچۈن ئۈن- تىنسىز قۇربانلىق بېرىۋاتقان ئانىلارنى، يىقىلىپ كەتكەن گۈل-چىمەنلەرنى يۈلەۋاتقان پەرىشتە سۈپەت كىشىلەرنى، رىقابەت دېڭىزلىرىدا قوللاشقا مۇھتاج بۇلىۋاتقان جەڭچىلەرنى يازغىن ،خۇددى ماكسىم گوركى" بوران قۇش قوشىقى"نى يازغان ماھىرلىق بىلەن،ئابدىرىھىم ئۆتكۈرنىڭ" قاش تېشىغا مەدىھيە"سىدىكى ئوتلۇق سۆيگۈسىگە ئوخشاش چىن سۆيگۈ بىلەن يازغىن! زادى مەن نېمە يازسام بۇلا؟ يازغىن ..يۈرۈكۈڭنى تۇتۇپ تۇرۇپ ،قەلىمىڭنى ۋىزدان سۈيىدە سۇغۇرۇپ تۇرۇپ، ئەقىل كۆزلىرىڭنى ئىشقا سېلىپ تۇرۇپ يازغىن... يازغىن ! قەپەسنىڭ گۈزەللىكىنى ھېس قىلالايدىغان قۇشنىڭ، قەپەسنىڭ گۈزەللىكىنى بايقىيالمىغان قۇشتىن ياخشاراق ئىكەنلىكىنى ، ئۈمۈد بۇ گۈزەللىكنىڭ چىگرىسى ئىكەنلىكىنى يازغىن. يازغىن !يالغۇز دەرەخنى ،ئۇ كىشلەر كۆزىدە يالغۇز بولسىمۇ لېكىن ئۇنىڭ ئىچكى قىسمىدا بىر ھاياتى كۈچ بار .ئۇ ئۆزىنىڭ نەچچە قېتىم بوراندا قالغانلىقىنى،نەچچە قېتىم شىۋىرغاندا قالغانلىقىنى ، ئېنىق ساناپ بېرەلمىسىمۇ لېكىن ئۇنىڭ جىسمىدا ھاياتلىق تامغىسى بار. ئۇ باھار پەسلىدە كۆكلەپ، ياز پەسلىدە سايە تاشلاپ ، قىش پەسلىدە قار ئۇچقۇنلىرىغا ھەمرا بۇلۇپ مەۋجۈتلىغى ئۈچۈن تىركىشىدۇ...ئۇ مەدىھلەشكە ئەرزىيدۇ... ئاۋازىڭنى قۇيىۋېتىپ بار كۈچۈڭ بىلەن ئۇنى مەدىھلە...يازغىن ئاجىز چىمنى . .. يەنە يازغىن تاش ئۈستىدىن ئۆسۈپ چىققان مۇخنى...چۈنكى ئۇلار تەڭرىنىڭ ئۆزلىرىگە ئاتا قىلغان خۇسۇسيەت ،ئالاھىدىلىكلىرىدىن پايدىلىنىپ رەڭدار دۇنيادىكى ئۆزگىچە بىر توپلىقىنى كائىناتقا ئاجىز جىسمى بىلەن جاكارلىيالىغان.. قەلىمىم نېمە يازاي؟ ھېلىقى ئېزىتقۇ چەمبىرەك يەنە پەيدا بولدى...مەن ھېچنىمە يازالمىدىم... قەلىمىم ماڭا خىتاب قىلدى: <<ئۆزىدىن ھالقىش دۇنياغا خۇجايىن بولغانلىق بىلەن باراۋەر ، سېنىڭ ئۈزلۈكسىز ئىزدەيدىغىنىڭ شۇ خۇجايىنلىق بولسۇن!....>> |
|