كۆڭۈل تۇيغۇلىرى (ئاتتىلا )

كۆڭۈل تۇيغۇلىرى
ئاتتىلا
ئادەم ئۆزىنى كەمسىتكەندە جاسارەت سۇنىدۇ، باشقىلار تەرىپىدىن كەمسىتىلگەندە نەپىرەت پەيدا بولىدۇ، مېھىر-مۇھەببەت، ئىنسانىي يېقىنلىق سۇسلىشىدۇ.
ئىنساننىڭ «قىلمايمەن» دېگەن ئىشنى بىلىپ تۇرۇپ قىلىپ سالغان ۋاقتى-ئۆز ئىرادىسىنى ئۆزى گۇمران قىلغان ۋاقتى، ئۆزىگە ئۆزى ئاسىيلىق قىلغان ۋاقتى.
ئۆزىنى سۆيمىگەن ئادەم ئۆز خەلقىنى سۆيەلمەيدۇ. ئۆز خەلقىنى سۆيمىگەن ئادەم مىللىي خاسلىقىنى ساقلاپ قالالمايدۇ. مىللىي خاسلىقىنى يوقاتقانلار مىللىي مەۋجۇدلۇقنىڭ دۈشمەنلىرىدۇر.
بىر مىللەتنىڭ ياشاش ئادىتى جەھەتتىن ئۆزىگە ئوخشىماي قېلىشى شۇ مىللەتنىڭ ھالاكەتكە يۈزلەنگەنلىكىنىڭ سىگىنالى.
ئۆز نەرسىلىرنى سۆيۈش تەرەققىياتقا ئېلىپ بارىدۇ، ئۆز نەرسىلىرنى قەدىرسىزلەش ھالاكەتكە ئېلىپ بارىدۇ.
باي مەملىكەتلەرنىڭ ئادەملىرى ئىقتىسادچان ھەم مەدەنىي ياشايدۇ، نامراتلار ئارىسىدا بەدخەجلىك ھەم مەدەنىيسىزلىك ئەۋج ئالىدۇ.
ناسارالارنىڭ تەرەققى قىلىشى ئۆزى قىممەتلىك دەپ قارىغان ھەممە نەرسىلىرىنى قەدىرلىگەنلىكىدە، مۇسۇلمانلارنىڭ ئارقىدا قېلىشى باشقىلار تەرىپىدىن «يامان» دەپ بېكىتىپ بېرىلگەن ھەممە ياخشى نەرسىلىرىدىن ۋاز كەچكەنلىكىدە.
«يامان بولىدۇ» سۆزىنىڭ يوقىلىشى يامان بولىدىغان ئىشلارنىڭ كۆپىيىشىنى كەلتۈرۈپ چىقاردى.
مەيلى ئۇ كونا ئادەت بولسۇن، پايدىلىق ئەمىليەتنى روياپقا چىقارسىلا خۇراپاتلىق ھېسابلانمايدۇ، خۇددى سان-ساناقسىز «يامان بولىدۇ»لارغا ئوخشاش.
نامراتلىق بىلەن ئەخلاقسىزلىقنىڭ دىئالېكتىكىسى
دادا: بالام، ھازىرقى دۇنيادا ئەڭ نامرات كىشىلەر كىملەر؟
بالا: ئارتىستلار.
دادا: نېمە ئۈچۈن؟
بالا: ئۇلارنىڭ پۇلى بولغان بولسا پۈتۈن كىيىنگىدەك رەخت سېتىۋالغان بولاتتى.
بۈگۈنكى زاماندىكى ئەڭ بەختسىز مىللەت نەزىريىسى يوق مىللەتتۇر.
نەزىريىسى يوق مىللەتنىڭ ھېچنىمىسى بولمايدۇ.
ئۆزىگە خاس نەزىريىسى يوق مىللەت مەڭگۈ قۇل مىللەتتۇر.
نەزىريىگە ئەھمىيەت بەرگۈچى مىللەت بىلەن ھەرىكەتكە ئەھمىيەت بەرگۈچى مىللەت ئوتتۇرۇسىدىكى پەرق ئەمىليەتتە يېڭىلىق ياراتقۇچى مىللەت بىلەن دوراپ ياسىغۇچى مىللەت ئوتتۇرۇسىدىكى پەرقتۇر.
«تۆت ئېغىز كاپكاپتىن بىر ئېغىز چىپ-چاپ ياخشى» دېگەن ماقال بىزنىڭ نەزىريىگە ئەھمىيەت بەرمەسلىكىمىزنىڭ، نەزىريىۋى سېستىما بەرپا قىلالماسلىقىمىزنىڭ، ئىزچىل بىر ئىزىمىزغا دەسسەپ، يېڭىلىق يارىتالماسلىقىمىزنىڭ، ئاڭ ۋە تەرەققىيات ساھەسىدىكى ئومومىي قالاقلىقىمىزنىڭ تۈپ سەۋەبىدۇر.
پۇشايمان قىلىش ۋە ئىبرەت ئالماسلىق بىزدىكى ئەڭ چوڭ بەختسىزلىك جۈملىسىدىندۇر.
سېنىڭ بىر قەدەم يول قويۇشۇڭ دۈشمىنىڭنىڭ بىر قەدەم ئىلگىرلىشىدىن دېرەك بېرىدۇ.
مۇستەبىت ھۆكۈمرانلىقنىڭ ھوقوقى قانچە كۈچەيگەنسېرى ئۇنىڭ ئېۋەنلىرى شۇنچە كۆپىيىپ بارىدۇ ھەم يېپىلىپ بارىدۇ. بۇ خۇددى يۇلتۇزنىڭ ئېنىرگىيەسى قانچە كۈچەيگەنسېرى ئۇنىڭ نۇرى تەركىبىدىكى ھەر خىل نۇر ھالقىلىرىنى پەرق ئەتكىلى بولمىغاندەك، ھەممىسى قوشولوپ غۇبارسىز ئاق نۇر بولوپ كۆرۈنگەندەك بىر ئىش. بىراق بۇلارنىڭ پەرقى، ئالدىنقىسىدا خەلقنىڭ كۆزى كۆرۈپ، قەلبى تۇيۇپ تۇرىدۇ؛ ئىدىيسى تۇنجۇقتۇرۇلدۇ. كېيىنكىسىدە كىشىلەرنىڭ كۆزى ئالدىندۇ. ئالدىنقىسىدا نەتىنجە مەجبۇرىي يوسۇندا سىرىتقى ئامىل تەرىپىدىن بولىدۇ، كېيىنكىسىدە نەتىنجە ئۆزلۈكنىڭ سېزىم جەھەتتىكى ئالدىنىشىدىن ئىختىيارى ئاساستا بولىدۇ.
ئادەمنىڭ قىممىتى ئۇنىڭ كۆرگەن ئۆمرىدە ئەمەس بەلكى ئۆز ھايات مۇساپىسىدە قەۋمىنىڭ مەۋجۇتلۇقى ئۈچۈن قانچىلىك روھ ئاتا قىلالىغانلىقىدا. ھاياتنىڭ ھەقىقىي مەنىسى مانا شۇ. شۇنىڭ ئۈچۈن پەلەك شاھى ئادىل ھۇشۇر بىزنىڭ قەلبىمىزدە ئۇلۇغ بولالىغان.
ھەر بىر ئادەمنىڭ ئۆزىنى قوغدىشى ئۈچۈن ئۇنىڭ ۋۇجىدىدا تۆۋەندىكىدەك بەش خىسلەت نامايەن بولىشى ھەم ئەمەلىي ھىرىكەتكە ئايلىنىشى كېرەك. ئۇلار: يېتەرلىك قانۇن ئېڭى ۋە قانۇن ئاساسى، زىددىيەتكە تاقابىل تۇرۇش روھى ۋە جاسارىتى، ئاخىرغىچە كۈرەش قىلىش قەتئىيلىكى، نوپوزغا جەڭ ئېلان قىلالايدىغان يۈرەك، زىددىيەتنى بىرتەرەپ قىلىش ئىقتىدارى. مانا بۇلار زامانىمىزدىكى ھەر بىر پۇقرا ئۇچىراۋاتقان قانۇنسىز دەخلى-تەرۇزنى تۈگۈتۈشتىكى ھەل قىلغۇچ ئەڭگۈشتەر.
ئۆزىنى سۆيمىگەن، ئۆزىنى قەدىرلىمىگەن، ئۆزىگە ئىشەنمىگەن ئەرلەر مەڭگۈ ھۆرمەتكە، ئىشەنچكە ئېرىشەلمەيدۇ. قەلبىدىن سۆيمەيدىغان ئاياللار مەڭگۈ مۇھەببەتكە ئېرىشەلمەيدۇ.
ئەرلەرنىڭ ئەڭ زور مۇۋاپىقىيىتى بىر لاياقەتلىك دادا بولوپ، دادىلىق ئوبرازىنى نامايەن قىلىشتا. ئاياللارنىڭ ئەڭ زور مۇۋاپىقىيىتى ئاياللىق قىممىتىنى ساقلاپ، ئانىلىق بۇرچىنى ئادا قىلىشتا، دۇنياغا سۆيگۈ- مۇھەببەت ئۇرۇغىنى چېچىشتا. پاھىشىۋازلىق ھەم پاھىشىلىق ئەۋج ئېلىۋاتقان زامانىمىزدا دادىلىق ئوبراز ۋە ئاياللىق قىممەتتىن قانداقمۇ سۆز ئاچقىلى بولسۇن؟!
ئەرلەر ئەقىل ۋە جاسارەت، ئاياللار ھايا ۋە نازاكەت بىلەن ئۇلۇغلۇق تاپىدۇ.

مەنبە: ئىجادىيىتىم

ئەكبەرنىياز	2013-06-13 17:07
شۇنداق ئېسىل تېما نىمىشقا ئىنكاسسىز قالغاندۇ ؟ ئۇستازنىڭ تۇيغۇلىرىغا يەنىمۇ بەركەت تىلەيمەن !!!

查看完整版本: [-- كۆڭۈل تۇيغۇلىرى (ئاتتىلا ) --] [-- top --]

Powered by phpwind v8.7 Code ©2003-2011 phpwind
Gzip enabled