| توغراق |
2014-06-27 00:22 |
توغراق:ئۆزۈڭ
ئۆزۈڭ
ئابدۇۋەلى تۇردى
بۇ كۆڭۈلنىڭ تارىنى تۇنجى رەت چەككەن ئۆزۈڭ،
رام قىلىپ دىلنى نىگار قايرىغان ،ئەگكەن ئۆزۈڭ.
بۇ دىلىمنىڭ باغىدا سەيلە قىپ ھەر كۈن كېچە،
يۈرىكىمگە ئاي كەبى،ئورنىغان ،مۆككەن ئۆزۈڭ.
سەن ئۈچۈن قەلبىم گويا مىسلى بىر ئوكيان ئېرۇر،
بەھرىدە ئەركىن ئۈزۈپ،كېمىدەك چۆككەن ئۆزۈڭ.
زىمىستاندا يۈرەكنى سەن ئۈچۈن بىر مەش دېسەم،
سۆيگۈنىڭ يالقۇنجىغان چوغىنى تۆككەن ئۆزۈڭ.
سەن ئۈچۈن سوقسا يۈرەك،چاپچىغان تۇلپار كەبى،
جىلۋە قىپ،ئوتلۇق بېقىپ،قامچا بوپ تەگكەن ئۆزۈڭ.
قولى گۈل ئۇستا ،چېۋەر كەشتىچى دەيمۇ سېنى،
گۈل يۈزۈڭنى يۈرەككە كەشتىلەپ تىككەن ئۆزۈڭ.
سېھرىگەرمۇ ياكى سەن،باغلىنىپ قالدىم ئەجەپ،
رىشتىمىزنى ئاجرىماس،چىڭ قىلىپ چىگكەن ئۆزۈڭ.
(ئاپتۇر:ئونسۇ ناھىيە 3-ئوتتۇرا مەكتەپتە)
|
|