ئاتام كەتتى

ئاتام كەتتى

يۈرەكلەرنى داغلاپ قويۇپ ئاتام كەتتى ،

يېرىلغاننى ياغلاپ قويۇپ ئاتام كەتتى ،

باغقا ئۈمۈد باغلاپ قويۇپ ئاتام كەتتى ،

شەجەرىنى ساقلاپ قويۇپ ئاتام كەتتى ،

تىلەكلەرنى ئاقلاپ قويۇپ ئاتام كەتتى .

يېلىنجار ئوت ئانام تۇتقان ئوچاقلاردا  ،

تەببەسسۇم بار بۇغداي -قوناق ، پۇرچاقلاردا ،

ھېكايەت بار لاي چاپلاشقان پۇچقاقلاردا ،

تاڭلار ئېرەر ئاتام ئاچقان قۇچاقلاردا ،

ئوتقا كاۋاپ قاقلاپ قويۇپ ئاتام كەتتى .

كۈچىيىدۇ قېرىنداشلار ئانتىنىسى ،

باشلىنىدۇ مەناسىدا سۆھبەت بېشى ،

ھۆججىتىدە  ئالمىشىدۇ نەق يا نېسى ،

بەرىكەتلىك بوپ كېتىدۇ سۆيگۈ ئېشى ،

دات مېھىرنى چاقلاپ قويۇپ ئاتام كەتتى .

قىشتا باھار بىخلىنىدۇ ئىخلاسىدا ،

يېشىلىدۇ تۈگۈنلىرى سىرداشىدا ،

بار ھارارەت ئۇ ساقلىغان قۇياشىدا ،

روھى  كۆكلەر ئەل -ئاۋامنىڭ باھاسىدا ،

شەيتانلارنى قوغلاپ قويۇپ ئاتام كەتتى .

يارالمىشنىڭ ھېكمىتى مېھمان سىياق ،

ھۆكۈم كەلمەس قۇرىمايدۇ بىر تال قىياق ،

بۇ ھاياتلىق ئالمىشىدۇ پەسىل سىياق ،

شەرھى ھۆكۈم قىيامەتتە باردۇر سوراق .

ئېتىقادنى چوغلاپ قويۇپ ئاتام كەتتى .

بىر ئەسىرنى خامىنىغا يايغاندا ئۇ ،

ۋايسىمىدى پۇچقاق تۈرۈپ تايغاندا ئۇ ،

ھاسا بىلەن بىر ئىشىككە بارغاندا ئۇ ،

بەكلا ئاددىي كۆزنى يۇمدى ھارغاندا ئۇ ،

بىرەر كېچە ئۇخلاپ قويۇپ ئاتام كەتتى .

ساقىلىغا ئاپئاق يىپلار ياماشقاندا ،

چاچلىرىنى تاڭ تارغىقى تاراشقاندا ،

تاڭ سەھەردە بۇلبۇل مۇڭلۇق سايراشقاندا ،

بۆشۈكتىكى ئەللەي بارماق ساناشقاندا،

باغرىمىزنى پۇراپ قويۇپ ئاتام كەتتى .

يېزىلغاندا  بىر قەۋمنىڭ جەڭنامىسى ،

رەڭ ئىچىدۇ ھەر بىر يۇرتنىڭ سالنامىسى ،

ئۈزۈلگەندە  ئەركەك يىللار كۈي تارىسى ،

ئۆزگىرىدۇ  دەقىقىنىڭ ھەر خانىسى ،

جان بۇۋامنى دوراپ قويۇپ ئاتام كەتتى .

ئانا يۇرتى ئالقىنىغا قويغاچ ئىمزا ،

مەرىمەيدۇ قورسىقى توق يېتىم قوزا ،

ئەل قەلبىدە يۈزى يورۇق تارتماس ئىززا،

جىنازىغا ئەگىشىدۇ كەنت-يېزا ،

سۆيگۈ زەم زەم ئوتلاپ قويۇپ ئاتام كەتتى .

ئاپتۇرى : ئابلەت مۇھەممەت باغۋەن

تىلداش

2014-06-24 10:19

ھېكايەت بار لاي چاپلاشقان پۇچقاقلاردا ،
........
دات مېھىرنى چاقلاپ قويۇپ ئاتام كەتتى .
......
بىر ئەسىرنى خامىنىغا يايغاندا ئۇ ،
.......
جان بۇۋامنى دوراپ قويۇپ ئاتام كەتتى

______________________
«كۈچىيىدۇ قېرىنداشلار ئانتىنىسى»
=«كۈچىيىدۇ قېرىنداشلار كىشنەشلىرى» قىلىپ ئوقۇپ باقسا قانداق بولار...؟

توغراق	2014-06-24 10:48
جىنازىغا ئەگىشىدۇ كەنت-يېزا بۇ مىسرادا بىر بوغۇم كەم قاپتۇ. بۇنى جىنازىغا ئەگىشىدۇ كەنتۇ-يېزا ياكى جىنازىغا ئەگىشىدۇ كەنت-ھەم يېزا دەپ ئېلىپ باسىڭىز قانداق بولار؟ مەنغۇ ئاۋۋالقىسى مۇۋاپىق كۆردۈم.

ئارزۇيۇم	2014-06-24 17:28
شئېرنىڭ مەزمۇنى ناھايىتى چوڭقۇركەن.

نۇرلالە	2014-06-25 13:06

tawpek	2014-07-07 17:55
دادام ۋاپاتىنىڭ بىر يىللىقى بولاي دەۋەتقاندا بۇ شىئىرىڭىز ماڭا ياخشى بىر ئەستىلىككە خۇرۇچ بولدى.

گۈلنىھال	2014-07-07 18:44
ئابلەت مۇئەللىم شىئېرنى ياخشى يازىدۇ ، بەرىكەتلىك بولغايسىز .

گۈلنىھال	2014-07-07 18:45
توغراق:جىنازىغا ئەگىشىدۇ كەنت-يېزابۇ مىسرادا بىر بوغۇم كەم قاپتۇ.بۇنى جىنازىغا ئەگىشىدۇ كەنتۇ-يېزا....... (2014-06-24 10:48) مېنىڭچە ئەسلى ھالىتى ياخشىكەن ...