| توغراق |
2014-06-17 14:27 |
توغراق:بىر قىزغا (6)
بىر قىزغا
ئابدۇۋەلى تۇردى
ئېيتالمايمەن،يۈرەك سۆزۈم كۆپ ئەمما،
يۈرەكنىڭ قېتىدا ساقلانغان پىنھان.
ئۇچراشساق ھەر قېتىم نىمجان بېلىقتەك،
بۇ يۈرەك ئېيتىشقا بەرمىگەن ئىمكان.
ئېيتالمايمەن ،يۈرەك سۆزۈم كۆپ ئەمما،
سۆيگۈدىن پۈتكەن بىر داستان بولغۇدەك.
ئۇنىڭدىن تۆكۈلسە ئىشقىي غەزەللەر،
قىزىلگۈل شېخىغا بۇلبۇل قونغۇدەك.
ئېيتالمايمەن، يۈرەك سۆزۈم كۆپ ئەمما،
بىلمىدىم ،ئاڭلاشقا بارمىكىن رايىڭ؟
ئاڭلىساڭ چېھرىڭدە پارلارمۇ قۇياش؟
يا بۇلۇت توسارمۇ ئايدەك چىرايىڭ؟
ئېيتالمايمەن، يۈرەك سۆزۈم كۆپ ئەمما،
ئېيتاتتىم ئاڭلاشقا بولسىلا تاقەت،
تاقىتىڭ بولمىسا كۆمەي يۈرەككە،
سەن ئۈچۈن مەڭگۈلۈك ساقلاپ ساداقەت.
(ئاپتۇر:ئونسۇ ناھىيە 3-ئوتتۇرا مەكتەپتە) |
|
