| ablatmuhamma |
2014-06-15 23:57 |
دەرىزەم
دەرىزەم
دەريا بولۇپ چۈشلىرىم ئۆركەشلىدى دەرىزەم ،
دەرۋازامنى تاڭ سەھەر جىمجىت قاقتى دەرىزەم ،
كېچىلەرنى ئۇزىتىپ كۈنگە باقتى دەرىزەم ،
تامچىلىغان نۇر مېھرى ھەجەپ ياقتى دەرىزەم ،
نۇرسىزلانغان كۆزۈمگە بەخت باقتى دەرىزەم .
ئاجىزلايدۇ ئىشەنچ يارىلانغان قاناتتا ،
چىقىرىدۇ دانخورەك يالغان مەزمۇن ساۋاتتا،
ھېكىمەتلىك خورجۇن بار جاھان كەزگەن بوز ئاتتا ،
داۋراڭى كۆپ شاھماتنىڭ يۈرۈشلىرى بار ماتتا ،
تەشتەكتىكى ئۈمۈدنى كىملەر چاقتى دەرىزەم .
تۆتقۇلاقنىڭ بوي تارتقان ئاپئاق بوينى كېسىلدى ،
غۇژمەكلىگەن شاماللارقۇم تېنىدە بېسىلدى ،
رودىپاينىڭ ياماشقان قىل ئارقىنى يېشىلدى ،
ئېتىقادتىن ياسالغان سىرلىق دامبا تېشىلدى ،
ساقايغاندا جاراھەت پاشا چاقتى دەرىزەم .
ساپ ھاۋاسى ھوجرامنىڭ تىنىقىمغا ياتلاشتى ،
داستان بولسا خورىكىم شەيتان لەئىن قۇتلاشتى،
چۈشلىرىمنىڭ سېغىزى كالپۇگىمغا چاپلاشتى ،
قۇربان قىلىپ باھارنى تېنىم ھەجەپ سەتلەشتى ،
داتقا پاتقان مىلتىقىم پىستان چاقتى دەرىزەم .
مەجنۇنتالنىڭ لەۋلىرى پىچىرلايدۇ يېنىڭدا ،
ئەركىلەيدۇ كۆز ئېچىپ قۇياش نۇرى قېنىڭدا ،
قورساق سالغان كېچىلەر ساقلىق تىلەر تېنىڭغا،
سىرلىق ئۈمۈد پىلىلدار دائىم ھايات شېمىڭدا ،
مەي باغلىغان قان -تەرىم شاختا قاقتى دەرىزەم .
سادىق بولسا بۇلبۇلى رىئاللىقتا گۈل كۈلەر ،
ئاتەش بولسا تەبەسسۇم مۇز ئېرىتەر كۈلكىلەر ،
قىسمىتىدىن شاخلىنىپ ۋەزنى پۇرسەت سۈركىلەر ،
چاڭقىغان دىل باياۋان يوپۇرماققا پۈركىلەر ،
ئەمەس كۆمۈر لەقىمىم ، قەلبىم ئاقتى دەرىزەم .
ئازلىمىسۇن يېلىدىن كىچىكلىگەن قىممتىم ،
ئۇرامىغا جايلاشسۇن سالام بەرگەن ئىززىتىم ،
نۇرلار بىلەن يالاشسۇن ئەسلى رەڭدە زىننىتىم ،
ياۋا چۆپتەك يۇلۇنسۇن يەنە ئۈنسە ئىللىتىم ،
لوقۇلدايدۇ بۇ بېشىم ئەسلى ساقتى دەرىزەم .
مەۋھۇم بولسا نېسىۋە تىلسىمىدىن تىل چىقار ،
ئەبجەش بولۇپ ئەقىدە رەڭ يېزىلسا سىر چىقار ،
نومور ئالسا غەيۋەتلەر تاز تىرناقتىن كىر چىقار ،
چىنىققانلار تاللاشتا مونەككىنە خىل چىقار ،
ئوت ياق ئەمەس مەنىسى ئەسلى < ياق > تى دەرىزەم .
ھەسەل تاپقان بارماقلار شىرنە بەرسۇن قىيدىماي ،
چوقۇنمايلى ماركىغا ئاددىيلىقنى قىينىماي ،
نۆۋىتىدە ساپلاشسۇن ئەۋلاد تىلنى تىلغىماي ،
سېمىز تارىخ يازايلى ماي -گۆشىنى ئىلغىماي ،
دەقىقەمگە قىزغىنىش قوزۇق قاقتى دەرىزەم .
يارقىن ھايات بەرمىسە شەجەرىدىن پەش -چېكىت ،
قالار داستان بېتىدە مەناسى يوق كۆپ چېكىت ،
يورىتالماس تېغىنى پىلىدىسا بىر ئۈمۈد ،
ئەخلاقىنى قايچىلار ئەبجەش تىلدا قىز -يىگىت ،
ئەجداد روھى ئەسلىدە مەزمۇت <چاق >تى دەرىزەم .
ئاپتۇرى : ئابلەت مۇھەممەت باغۋەن
|
|