查看完整版本: [-- توغراق:قېرىنداش --]

تەۋپىق مۇنبىرى -> مۇنبىرىمىز ئەزالىرى ئىجادى شىئىرلىرى -> توغراق:قېرىنداش [打印本页] 登录 -> 注册 -> 回复主题 -> 发表主题

توغراق 2014-06-12 18:57

توغراق:قېرىنداش

قېرىنداش

(مۇخەممەس)

ئابدۇۋەلى تۇردى

سېنىڭ ئۈچۈن زور بەدەل بېرەلەيدۇ قېرىنداش،

سېنىڭ ئۈچۈن قۇمغا گۈل تېرەلەيدۇ قېرىنداش،

ياۋغا سەنچۈن كۆكرەكنى كېرەلەيدۇ قېرىنداش،

ساڭا بېرىپ ئۇلاغنى يۈرەلەيدۇ قېرىنداش،

جاپالاردا سەنچۈن يەڭ تۈرەلەيدۇ قېرىنداش.



چاقچىقى كۆپ ھاياتنىڭ يەتسەڭ ئەگەر تەكتىگە،

«خار بولغاننى خان بولماس» دېمە شاھلىق تەختىگە،

جان بېرىدۇ قېرىنداش ، قېرىنداشنىڭ بەختىگە،

ئاسان قىلىپ يولۇڭنى سېنى خانلىق تەختىگە-

يۆلەش ئۈچۈن ئوت، سۇغا كىرەلەيدۇ قېرىنداش.



بولغاچ ھەمدەم قېرىنداش جاپالارنى تورايسەن،

بەرگەن ئوتى، سۈيىدە ئەلنى گۈلگە ئورايسەن،

« چېڭى چىقماس يالغۇزنىڭ»شامدەك تېزلا خورايسەن،

كېرەك بولسا ياردەممۇ قېرىنداشتىن سورايسەن.

ھەتتا سەنچۈن جېنىنى بېرەلەيدۇ قېرىنداش.



قېرىنداشتىن پۈتىدۇ بار-يوقۇڭنىڭ تەڭلىكى،

ئۇ ھاياتلىق ئۆيۈڭنىڭ بىر تال زاپاس تۈۋرۈكى،

ئۇ بولغاچقا بىلىنمەس بۇ ھاياتنىڭ كۆپ يۈكى،

گاھىدا تار كەلگەندە غەلبە ، نۇسرەت كۆۋرۈكى،

ئاۋۋال ساڭا نۆۋەتنى بېرەلەيدۇ قېرىنداش.







تاڭ قالىسەن بەك قىزىق بۇ ھاياتنىڭ ئىشلىرى،

گاھى ئىللىق ياز كەلسە، گاھى سوغ، جۇت قىشلىرى،

ياردەمچىسىز پالۋاننىڭ سۇنار ئېزىق چىشلىرى،

بىر كۈنلەردە بېشىڭغا قونسا تەلەي قۇشلىرى،

غەلبەڭ ئۈچۈن شادلىنىپ كۈلەلەيدۇ قېرىنداش.



ئوبدان ئۆسكەي كۆچەتمۇ پۇتاپ تۇرسا پۇتاقنى،

خۇددى شۇنداق كۆرسىتەر ئۇ سەندىكى چاتاقنى،

خەلقىڭ ساڭا ھۆرمەتتىن بەرسە ئالىي ئاتاقنى،

دۈشمەنلىرىڭ ھەسەتتىن قۇرغىنىدا توزاقنى،

يوللىرىڭدىن تىكەننى تېرەلەيدۇ قېرىنداش.



بۇ ھاياتلىق گوياكى پايانى يوق بىر جاڭگال،

ئۆلسەڭ توزۇپ تۈگەيسەن، سەنمۇ تۇپراق بىر چاڭگال،

(ئەل قارغىشى بەك يامان، خىزمىتىن قىپ دۇئا ئال!)

دۈشمەنلىرىڭ بېشىڭغا ئاتقىنىدا تاش،داڭگال،

قالقان بولۇپ سەن ئۈچۈن تۇرالايدۇ قېرىنداش.



ھۆرمەت تونى كىيىسەن، بىر كۈنلەردە ئامەتتىن،

ئامان ئۆتكەچ تالايلاپ تەبئىي، سۈنئىي ئاپەتتىن،

«يا» بولىسەن ئىز قالماس ئەسلى «ئوق»تەك قامەتتىن،

پۇت-قولۇڭدا ماغدۇر يوق باشلاپ ئاشۇ سائەتتىن،

ھېچبولمىسا بىر ھاسا بولالايدۇ قېرىنداش.



ياستۇق بولار بىتاپ بوپ ياتقىنىڭدا قېشىڭدا،

تۇرسا دائىم كۆڭلۈڭ توق ، پەرۋانە بوپ قېشىڭدا،

ئۆزى چامغۇر يېسىمۇ گۆش كەم بولماس ئېشىڭدا،

كۆز يۇمساڭمۇ يوقلايدۇ، دائىم تۇپراق بېشىڭدا،

خەتمە قۇرئان ئوقۇتۇپ تۇرالايدۇ قېرىنداش.



ئىزدەپ سېنىڭ بەختىڭنى ئوت دېڭىزىن كېچىدۇ،

ساڭا كەلگەن زەھەرنى ھەسەل بىلىپ ئىچىدۇ،

ئۆزى جەندە كىيسىمۇ ساڭا شاھ تون پىچىدۇ،

سەن بولمىغان جاي ھەتتا جەننەت بولسۇن، كېچىدۇ،

دوزاخقىمۇ سەن ئۈچۈن كىرەلەيدۇ قېرىنداش.

2013-يىل مارت ئونسۇ

(ئاپتۇر: ئونسۇ ناھىيە 3-ئوتتۇرا مەكتەپتە ئوقۇتقۇچى)

تۆتتاش 2014-06-12 19:05
ئىجادى تىما

تۆتتاش 2014-06-12 19:08
شېئىرنى ياخشى يازدىكەنسىز.

بابۇر0725 2014-06-12 23:52

ئىزدەپ سېنىڭ بەختىڭنى ئوت دېڭىزىن كېچىدۇ،

ساڭا كەلگەن زەھەرنى ھەسەل بىلىپ ئىچىدۇ،

ئۆزى جەندە كىيسىمۇ ساڭا شاھ تون پىچىدۇ،

سەن بولمىغان جاي ھەتتا جەننەت بولسۇن، كېچىدۇ،

دوزاخقىمۇ سەن ئۈچۈن كىرەلەيدۇ قېرىنداش.
بەكمۇ ياخشى يېزىلىپتۇ

ozqan 2014-06-13 12:08
تەسەۋۇرغا بايكەنسىز  ، شۇنداق ياقتۇردۇم بۇ شېئىرنى ...

قەلەملىرىڭىزگە بەرىكەت تىلەيمەن .

بەزى مىسرالارنىڭ  بوغۇم سانىنى ھەم  5- مىسرادىكى قاپىيە ئىزچىللىقىنى تولۇق ساقلاپ تەھرىرلەپ باققان بولسىڭىز تېخىمۇ ياخشى بوپ كېتەتتىكەن بۇ شېئىر ...

توغراق 2014-06-13 12:21
ozqan:تەسەۋۇرغا بايكەنسىز  ، شۇنداق ياقتۇردۇم بۇ شېئىرنى ...قەلەملىرىڭىزگە بەرىكەت تىلەيمەن .بەزى مىسرالارنىڭ  بوغۇم سانىنى ھەم   .. (2014-06-13 12:08) 

بولىدۇ تەكلىپىڭىز بويىچە يەنە ئىزدىنىپ باقاي، رەھمەت سىزگە‍!

ئوتقاشئەرقۇتى 2014-06-13 22:31
       مەزمونى بەكمۇ ياخشى چىققان لېرىكىكەن ،بەك ياقتۇردۇم !كىشىلەرئارسىدىكى مىھىر مۇھەننەتنىڭ ئورنىنى ماددى دۇنيا ئىلۋاتقان بۈگۈنكىدەك دەۋىردە ساپ قىرىنداشلىق مىھرىنى تەشۋىق قىلىش ئىناق جەمىئەت قۇرۇشتا كام بولسا بولمايدۇ .ياشىسۇن قېرىنداشلار ئارسىدىكى مىھىر- مۇھەببەت !

ئەكبەرنىياز 2014-06-15 16:37
ھەقىقەتەن ياخشى چىقىپتۇ بۇ مۇخەممەس ، ئۆزقان مۇئەللىمنىڭ تەكلىپىنىمۇ ئويلىشىپ باقارسىز !!!

توغراق 2014-06-16 13:13
بولىدۇ، چوقۇم شۇنداق قىلىمەن.

ھاتەھاتەم 2014-06-16 17:31
  

ياستۇق بولار بىتاپ بوپ ياتقىنىڭدا قېشىڭدا،


تۇرسا دائىم كۆڭلۈڭ توق ، پەرۋانە بوپ قېشىڭدا،

ئۆزى چامغۇر يېسىمۇ گۆش كەم بولماس ئېشىڭدا،

كۆز يۇمساڭمۇ يوقلايدۇ، دائىم تۇپراق بېشىڭدا،

خەتمە قۇرئان ئوقۇتۇپ تۇرالايدۇ قېرىنداش
قېرىنداشلىق مېھرى-مۇھابىتى ھەممىدىن قىممەت. ئىجاديىتىڭىزگە بەركەتلەر بولسۇن.

tawpek 2014-06-26 16:31
ئوقوپ سۆيۆنۆپ كەتتىم، قىرىنداشلىق ئۈزۈلمەس رىشتە.


داۋاملىق سۇنۇپ تۇرۇيۇڭ،.

ئابلەت مۇئەللىمنىڭ شىئىر پۇرىقىنى پۇراۋاتىمەن.


查看完整版本: [-- توغراق:قېرىنداش --] [-- top --]


Powered by phpwind v8.7 Code ©2003-2011 phpwind
Gzip enabled