ئۇجمە پىششىقىدىكى سېغىنىش  (نۇرقىز)

قىزىل گۈل بەرگىدە يالتىرار شەبنەم،
شاخلاردا كۆز قىسىپ مارىلايدۇ جۈجەم.
چېكەمگە گۈل قىسىپ ئۈجمە يىگەندە،
ئەسلىدىم،ئاھ سېنى،ئەسلىدىم ئەركەم.


شاخلارغا ئېسىلغان قوشماق جۈجەمنى،
سۇنغاندا يۈزلىرىم كەتكەن ئوت ئېلىپ،
سۆيگۈڭدەك بىر تاتلىق جۈجەم يىگەندە،
تەمىدە تەنلىرىم كەتكەنتى ئېرىپ.

ھە مانا كېپ قاپتۇ،ئۈجمە پىششىقى،
ۋە لىكىن نىگارىم سەنلا كەلمىدىڭ.
چېكەمدە گۈللەرمۇ سولىشىپ قاپتۇ،
ئىشقىڭدا يۈرەكنى ئەجەپ تىلغىدىڭ.

كۈتەرمەن نەچچە رەت ئۈجمە پىششىقى،
بىلمىدىم ئاھ نىگار، ئەجەپ بىلمىدىم.
بىلگىنىم سەن تۇتقان جۈجەمدەك يەنە،
زەپ شېرىن جۈجەمنى قايتا يىمىدىم.

قىزىل گۈل بەرگىدە يالتىرار شەبنەم،
شاخلاردا كۆز قىسىپ مارىلايدۇ جۈجەم.
چېكەمدە قىزىل گۇل،كۆزۈمدە لىق ياش،
سېغىندىم ،زەپ سىنى سېغىندىم ئەركەم.

2014-يىل سەپەر ئېينىڭ 11-كۈنى