| ablatmuhamma |
2014-06-04 14:08 |
ئەتكەن چېيىم
ئەتكەن چېيىم
پۇت- قولۇمغا كىردى قۇۋۋەت ئەتكەن چېيىم ،
ۋۇجۇدىمغا بەردى لەززەت ئەتكەن چېيىم ،
ئۇنتۇلدۇردى قايغۇ- ھەسرەت ئەتكەن چېيىم ،
خۇمارىمغا بەردى تىلخەت ئەتكەن چېيىم ،
چىن ياشاشقا بەردى جۈرئەت ئەتكەن چېيىم .
ناۋاي دەيدۇ نان قىزىرار مېيى بىلەن ،
رتلىك -رەتلىك كېسەك پىشار لېيى بىلەن ،
تۆت پەسىلدە دېھقان ياشار يېرى بىلەن ،
ئەۋلاد بېقىپ كەلدى ئۇيغۇر چېيى بىلەن ،
چوڭ -كىچىككە يەتتى ئىززەت ئەتكەن چېيىم .
مەھكۇم دىللار سېغىنمامدۇ ساپ ھاۋانى ،
تىرىكچىلىك خالاپ تۇرار كۈي -ناۋانى ،
ئوروقلايدۇ كىم تارتمىسا مىڭ جاپانى ،
تۈگىمەيدۇ بۇ تۇرمۇشنىڭ ئىمتىھانى .
ئىش -ئەمگەكتە باردۇر سۈرئەت ئەتكەن چېيىم .
تەييارلىق قىپ بىرەر كورا قايناقسۇغا ،
رەڭ تەڭشەيمىز قويۇققىنە چاي ئۇنىغا،
قايماق بىلەن سۈت قۇيىمىز قاراپ تۇزغا ،
قاپاق چۆمۈچ ناخشا ئېيتىپ بېرەر شامغا ،
نان كۆركىگە بېرەر زىننەت ئەتكەن چېيىم .
چوڭ -كىچىكلەر چۆرىدەيدۇ داستىخانغا ،
ھەممە بىردەك قول ئۇزىتار تاتلىق نانغا ،
ھەسەل بىلەن مۇراببالار بار پىلاندا ،
ئاۋال چوڭلار قىيسىيىدۇ تويوپ يانغا ،
روھ سېغىنماس ئىشقى -ئىشرەت ئەتكەن چېيىم .
بالىلارنىڭ جىدىلى بار سەن بولمىساڭ ،
قورۇپ قالار بۇۋاي -موماي سەن بولمىساڭ ،
مېھمان سۆزلەر گۆش بولسىمۇ نان قويمىساڭ ،
بىرەر چىنە ئىچىپ قويغىن كەل ، تويمىساڭ ،
نۆۋىتىدە زەردىن قىممەت ئەتكەن چېيىم .
مىللىتىمنىڭ مائارىپى دەستۇرخاندا ،
بىر ئېتىقاد كۆۋەجەيدۇ ئەركەك قاندا ،
نىمە قۇۋۋەت بولسۇن دەيسىز دىر-دىر جاندا ،
نىيەت -ئىقبال ئەمەس ھەرگىز مونەك شامدا ،
دەستۇرخاندا يۇيار ئىللەت ئەتكەن چېيىم .
ئەسىرلەرنىڭ ئۇيقىسىنى ئاچتى قۇياش ،
بىزگە ئۈندەش بەلگە ئەمەس قانداق ياشاش ،
ساپ دىللاردا يۈز بەرمىسۇن ئەمدى قاناش ،
بىر مىللەتكە ئۇدۇم ئەمەس ئۇششاق چامداش ،
ئەدەپ بىلەن ساڭا ھۆرمەت ، ئەتكەن چېيىم !
خامانلاردا ياسىغاندا ئايرىدۇرۇم ،
ئالەم كېمە روللىرىنى تۇتسا قولۇم ،
كېلىچەكتە سامانيولى بولسا يولوم ،
تاڭ سەھەردىن چىقىپ كەلسە غۇنچەم -نۇرۇم !
قىيالمايمەن سەندىن ھەرگىز ئەتكەن چېيىم .
ئاپتۇرى : ئابلەت مۇھەممەت باغۋەن
|
|
