ئۇيغۇر توربېكەتلىرىدىكى ۋابا__ئۇنۋېرساللىق

ئۇيغۇر توربېكەتلىرىدىكى ۋابا__ئۇنۋېرساللىق----- بۇ تىما نۇرقۇتتىكى قىرىندىشىمىزFinalDream نىڭ يازمىسى بولۇپ ئەھمىيىتى خىلى چوڭقۇر ،پىكىر قاتلىمى ،تەھلىلى ياخشى بولغان...شۇڭا بۇ تىمىنى بىكىتىمىزدە تەۋسىيە قىلدۇق------سەئىدىيە

ئۇيغۇر توربېكەتلىرىنىڭ بارلىققا كەلگىنىگە خېلى يىللار بولغان بولسىمۇ ، ئەمما بېكەتلەرنىڭ مەزمۇن سەرخىللىقى بىر خىل ئىپتىدائىي ھالەتتە مېڭىۋاتىدۇ . ئەڭ دەسلەپكى تۈرەلمە ھالەتتىكى باشلامچى بېكەتلەرگە تەقلىد قىلىش ۋە دوراشنى دەسلەپكى مەقسەت قىلىۋالغان «كېلون توربېكەت»لەر ئارقا-ئارقىدىن مەيدانغا كەلدى . بۇ خىل يېڭىلىق بولمىغان «كېلون توربېكەت»لەر ۋاقىتنىڭ ئۆتۈشىگە ئەگىشىپ ئاستا-ئاستا زاۋاللىققا يۈزلەندى . ئەپسۇسلىنارلىقى شۇكى، ئىبرەت ئېلىش ئېڭىنىڭ كەمچىل بولۇشى سەۋەبىدىن «كېلون توربېكەت» لەر ھېلىھەم بارلىققا كىلىۋاتىدۇ ۋە زاۋاللىقققا يۈزلىنىۋاتىدۇ . نېمىشقا بۇ ۋابا ھەممە تەرەپكە يامراپ كىتىدۇ ؟

  بۇنىڭ تۈپكى سەۋەبىنى شۇ بېكەت قۇرغۇچىلارنىڭ ئېڭىدىن ئىزدەش مۇمكىن . بىر قىسىم بېكەت قۇرغۇچىلارنىڭ ئاڭ سەۋىيىسى تۈۋەن بولغانلىقتىن ، نوقۇل ھالدىكى بېكەت قۇرۇش مەقسىتى ئىنىق بولمىدى، ۋەياكى پەقەت پۇل ئۈچۈنلا توربېكەت قۇرۇش يۇلىغا كىرىۋالغانلىقتىن مېغىز بىلەن شاكالنى ئىلغىماستىن ، ئۇچرىغانلىكى «بايلىق»نى توپلاش ئېڭى ئۇلار قۇرغان بېكەتنى مەزمۇنلار ئارىلىشىپ كەتكەن ئۇچۇر دۈۋىسىگە ئايلاندۇرۇپ قويدى . قىممەت ئۇقۇمى جەھەتتىن سۆزلىگەندە ، ئەخلەت دۈۋىسى بولۇپ قالدى ، چۈنكى ئۇچۇر كۆپ بولغان بىلەن تۈرگە ئايرىلمىغانلىقىتىن ئىزدەپ تېپىش قۇلايسىز بولۇپ ، پايدىلىنىش مۇمكىن بولمىدى .

ئۇنۋىرساللىق نېمىشقا ۋاباغا ئوخشاش ھەممە تەرەپكە يامراپ كەتتى ؟ ...
«كۈچلۈكلەر تاللىنىدۇ ، ئاجىزلار شاللىنىدۇ»  دېگەندەك ئۈزىگە ۋابا يۇقتۇرۇۋالمىغان بىر قىسىم نادىر توربېكەتلەرنىڭ بارلىققا كىلىۋاتقانلىقى بىزدە كەسپىي بېكەت باشلىقلىرىنىڭ بارلىققا كىلىۋاتقانلىقىنى ئىسپاتلاپ بەردى . ئەمما تور زىيارەتچىلەرنىڭ تار دۇنيا كۆز قارىشى ۋەياكى پائالىيەت دائىرىسىنىڭ تار بولۇشى سەۋەبىدىن تازا تولۇق پايدىلىنىپ بولغىلى بولمايۋاتىدۇ . ئەمما بۇمۇ ۋاقىتلىق قىيىنچىلىق ، ھامان ھەل بولغۇسى .

ئۆزىنىڭ ئۇنۋىرساللىقى ۋە تارىخىنىڭ ئۇزۇنلۇقى بىلەن نۇرغۇن تورزىيارەتچىلىرىنىڭ ئالقىشىغا ئىرىشىپ كىلىۋاتقان سەلكىن ،شەبنەم،دىيارىم ،ئىزدىنىش توربېكەتلىرى ئەڭ ئاۋۋال يادىمىزغا كېلىدۇ . مۇشۇ داڭلىق ئۇنۋېرسال توربېكەتلەرگە ھەۋەس قىلىش سەۋەبىدىن ئۇنۋىرسال بېكەتلەر كۆپلەپ قۇرۇلۇپ «كېلون توربېكەت»لەر بارلىققا كىلىۋاتىدۇ . نېمىشقا يېڭىلىق يارىتىشنى ئويلاپ باقمايسىز ؟ بىزدە «مۇنارغا مۇش تەڭلىمە » دەيدىغان گەپ بار . يۇقارقى ئۇنۋېرسال كۈچلۈك توربېكەتلەرگە جەڭ ئېلان قىلىش سىزگە شۇنچە ئاسان تۇيۇلامدۇ ؟ ھېچبولمىغاندا پۇت تىرەپ ئۆرە تۇرىۋالغاندىن كىيىن جەڭ ئېلان قىلسىڭىزمۇ كېچىكمەيتتىڭىز ...

ئۇيغۇر توربېكەتلىرى ئىچىدە بارلىققا كىلىپ ، يېڭىلىق يارىتىپ گۈللىنىۋاتقان توربېكەتلەرمۇ ئاز ئەمەس . مەسىلەن :مەخسۇس ئەدەبىيات كەسپىي مۇنازىرىلىرى ، مەخسۇس تارخ توربېكەتلىرى (تىركەش تورى ، ئۇرخۇن تورى ) ، مەخسۇس قارا مېھمان تورلىرى ، مەخسۇس VB مۇنبىرى ، مەخسۇس ئەقلىي يانفۇن مۇنبىرى ، مەخسۇس پروگىرامما مۇنبەرلىرى ،مەخسۇس شاھمات بىلىملىرى تورى ، فىزىكا بىلىملىرى تورى ، ماتېماتىكا مەخسۇس بىلىملىرى تورى  ،مەخسۇس فىلىم ئىشلەش بېكەتلىرى ،  يەنە باشقا كەسپىي بېكەتلەر . .. . . ..   كەسىپلىشىش ۋە مەخسۇسلىشىشقا قاراپ يۈزلىنىۋاتقان يۇقارقى توربېكەتلەرنىڭ تەرەققىي قىلىپ روناق تېپىشىنى چىن دىلىمدىن ئۈمۈد قىلىمەن . ماڭغان ئىزىڭلاردىن گۈللەر ئۈنسۇن !