سېسىق پايپاق پۇرىقى بىلەن پاشا ئۆلتۈرۈش دورىسى ياساپ چىقىدىكەن ..

خەلقئارا تورى خەۋىرى: ئاۋسترالىيە «كۈندىلىك تېلېگرامما خەۋەرلەر گېزىتى»نىڭ 7- ئاينىڭ 14- كۈنىدىكى خەۋىرىگە قارىغاندا،تانزانىيە ئالىملىرى ھازىر سېسىق پايپاق پۇرىقىدىن پايدىلىنىپ بەزگەك كېسىلى ۋىرۇسى ئېلىپ يۈرىدىغان پاشىنى ئۆلتۈرۈشنى تەتقىق قىلىۋاتىدىكەن. بۇ ئارقىلىق ئىنسانلارنىڭ بەزگەككە قارشى تۇرۇشىغا ياردەم قىلىغىلى بولىدىكەن. گاتىس فوندى جەمئىيىتى بۇ تۈرگە ئىقتىسادى ياردەم قىلىدىغانلىقىنى جاكارلىدى.
ھازىر پاشىلىق ۋە تۇمانلاشتۇرۇش دورىسى بىلەن پاشىنىڭ ئۆي ئىچىدىكى بەزگەك كېسىلى ۋىرۇسىنى تارقىتىشى ئاساسەن كونتىرول قىلىندى. ئەگەر سىرىتتىكى بەزگەك كېسىلى ۋىرۇسى ئېلىپ يۈرگۈچى پاشىلارمۇ يوقۇتۇلسا، ئۇنداقتا چوڭ دائىرىدە بەزگەك كېسىلىنىڭ دالىدىكى تارقىلىشىنى زور دەرىجىدە ئازايىتقىلى بولىدۇ.
بۇ تۈردىكى تەتقىقاتقا يېتەكچىلىك قىلىۋاتقان تانزانىيە يىفاكلا تېببىي تەتقىقات ئورنىدىكى مۇتەخەسسىس فرېدروس.ئوكۇمۇنىڭ دېيىشىچە، گوللاندىيە ئالىمى بارت.كنولسنىڭ ئەڭ يېڭى بايقىشىغا قارىغاندا، ئىنسانلار قاراڭغۇ ئۆيدە يالىڭاچ ھالەتتە تۇرغاندا پۇتتىن چىققان سېسىق پۇراقنىڭ پاشىغا بولغان تارتىش كۈچى ئەڭ چوڭ بولىدىكەن.
15 يىلدىن بىرى ئالىملار ئىزچىل بۇ نەزىرىيەنى بەزگەكنىڭ ئالدىنى ئېلىش ئۈچۈن ئىشلىتىشكە تىرىشىۋاتىدۇ.
ئوكۇمۇ سەككىز خىل خىمىيەلىك ياسالما دورىلارنى ئارىلاشتۇرۇپ سېسىق پايپاق پۇرىقى ياساپ چىققان بولۇپ بۇنىڭ بىلەن پاشىنى زەھەرلەپ ئۆلتۈرگىلى بولىدىكەن. ئۇ مۇنداق دەيدۇ: «بۇ بولسا بىزنىڭ بىرىنچى قېتىم دىققىتىمىزنى مەركەزلەشتۈرۈپ دالىدىكى چىۋىننىڭ كېسەل تارقىتىشىنى كونتىرول قىلىشقا تىرىشىشىمىز بولۇپ ھېسابلىنىدۇ. يېڭى تېخنىكا يوق ئەھۋال ئاستىدا بەزگەكنى تۈپ يېلىتىزىدىن يوقوتۇش مەقسىدىگە يېتىش مۇمكىن ئەمەس».
ئوكۇمۇ ئىككى يىلدىن بىرى 100 مىڭ ئامېرىكا دوللىرى ئىقتىسادى ياردەمگە ئېرىشكەن. ھازىر گاتىس فوندى جەمئىيىتى ۋە «كانادا جەڭ ئېلان قىلغۇچى» ئورگىنى بىرلىشىپ ئۇنى 775 مىڭ ئامېرىكا دوللىرى ئىقتىسادى ياردەم بىلەن تەمىنلەپ ئۇنىڭ ئەرزان باھادا، كۆپ مىقداردا پۇراق بىلەن پاشا ئۆلتۈرگۈچ ياساپ چىقىشىغا ياردەم قىلىۋاتىدۇ. ئوكۇمۇنىڭ مۆلچەرلىشىچە، ھەر بىر قۇتىنىڭ باھاسى تۆت ئامېرىكا دوللىرىدىن 27 ئامېرىكا دوللىرىغىچە بولىدىكەن.
گەرچە بەزگەكنىڭ يەرشارىدا تارقىلىشى ھەر يىلى زور كۆلەمدە تۆۋەنلەۋاتقان بولسىمۇ، بىراق ھەر يىلى 220 مىليون كىشى يۇقۇملانماقتا. ب د ت نىڭ مۆلچەرىگە قارىغاندا، ھەريىلى 800 مىڭ ئادەم بەزگەك كېسىلى بىلەن ئۆلۈپ كېتىدىكەن. ئۇنىڭ ئىچىدە كۆپىنچىسى ئافرىقىدىكى بالىلار ئىكەن.
مەنبە: gb.cri.cn