ئۆز- ئارا مۇناسىۋەت توغرىسىدا ( ماقال - تەمسىل )

يامان ئات ئىگىسىنى يەرگە ئاتار ، يامان دوست دوستىنى دۈشمەنگە ساتار . ياخشى دوست ئۈلپەت ، يامان دوست كۈلپەت . تۇنىمايدىغان پەرىشتىدىن ، تۇنۇيدىغان شەيتان ياخشى . ئەقىلى يوق دوستىدىن يامانلار ، قۇرسىقى توق تاماقتىن ( يامانلار ). ھېسابلىق دوست ئايرىلماس . كۆڭۈلدىن كۆڭۈلگە يول بەر . دۈشمەنگە باش ئەگسەك دەسسەيدۇ ، دوستۇڭغا قول سۇنساڭ ئەسلەيدۇ . گۈلنىڭ تىكىنى بۇلىدۇ ، دوستنىڭ ئەيىبى (بۇلىدۇ). دوستىدىن ئەيىب ئىزدىگەن دوستسىز قالار . مەسچىتكە كىرسىلا موللا دېمە ، ماختاپ قويسىلا دوستۇم دېمە . ياخشى بىلەن دوست بولساڭ كۈندە بازار ، يامان بىلەن دوست بولساڭ كۈندە ئازار . ئۆز يۇرتۇڭدىن ئايرىلما چەت بولسىمۇ ، قەدىناستىن ئايرىلما سەت بولسىمۇ . ياخشى بىلەن دوست بولساڭ ئېچىلار چېچەكلىرىڭ ، يامان بىلەن دوست بولساڭ يېرىلار يۈرەكلىرىڭ . ياخشى بىلەن يۈرسەڭ يېتىسەن مۇراتقا ، يامان بىلەن يۈرسەڭ قالىسەن ئۇياتقا . تۈز يول ياخشى نېرى بولسىمۇ ، قەدىناس ياخشى قېرى بولسىمۇ . دوست يىغلىتىپ ئېيتار ، دۈشمەن كۈلدۈرۈپ (ئېيتار). گۈل -گۈل ئارىسىدا قەدىرلىك ، ھۆرمەت دوستلار ئارىسىدا (قەدىرلىك) چاپاننىڭ يېڭىسى ياخشى ، دوستنىڭ كونىسى (ياخشى) مەنبە : خەلق ماقال - تەمسىللىرى

كۆرۈلۈشى:1070

قوشۇلغان ۋاقتى:2013/4/8 15:59:06

يوللىغۇچى ئەزا:admin