ياشاشتىكى جەسۇرلۇق

ياشاشتىكى جەسۇرلۇق     ئۇنىڭ كۆزى 10 نەچچە يىل ئىلگىرىكى بىر قېتىملىق زور ئوت ئاپىتىدە ئەما بولۇپ قالغانىدى. ئۇنىڭ خوتۇنىمۇ شۇ ئىشتا ئىككى پۇتىدىن ئايرىلغانىدى.    ئوغۇل كىچىك ۋاقتىدا ئاتا - ئانىسىنى خورلۇق تارتتى، دەپ قاراپ ئۇلارغا چەكسىز مېھىر - مۇھەببەت ئاتا قىلىش بىلەن بىر ۋاقىتتا، ئۇلارغا ياردەملىشىپ ھاسا - تاياقلىرىنى قولىغا ئېلىپ بېرەتتى. شۇ تەرىقىدە بۇ بىر ئائىلە كىشىلىرى خۇشال - خۇرام ھەم بەختلىك تۇرمۇش كەچۈردى.    ھەش - پەش دېگۈچە ئوغۇل 12 ياشقا كىردى. 12 ياشلىق ئوغۇل بىردىنلا ئۆز ئائىلىسىنىڭ باشقىلارنىڭ ئائىلىسىگە ئوخشىمايدىغانلىقىنى ھېس قىلدى. ئۇ باشقىلارنىڭ ئاتا - ئانىسى بىلەن ئۆز ئاتا - ئانىسىنى سېلىشتۇرۇپ ئىنتايىن ئازابلاندى. بولۇپمۇ باشقىلارنىڭ مەسخىرىسىگە ئۇچرىغاندىن كېيىن، ئوغۇلنىڭ خورلۇق تۇيغۇسى تېخىمۇ چوڭقۇرلاشتى، ئۇ ھەمىشە كەچكى شەپەققە قاراپ تۇرۇپ مۇنداق ئويلايتتى: نېمە ئۈچۈن مېنىڭ ساغلام - بېجىرىم ئاتا - ئانام يوق؟    بىر كۈنى يامغۇر ياغدى. ئوغۇل تۇنجى قېتىم ئاتىسى بىلەن ئانىسىنىڭ ھاسىسىنى ئېلىپ بەرمىدى. دەسلەپتە ئانىسى ھاسىسى بولمىغاچقا، يامغۇردا يىقىلىپ چۈشۈپ، يەنە ئۆمىلەپ ماڭدى، ئاندىن ئاتىسى يىقىلىپ چۈشتى، ئۇ يەرنى سىيلاشتۇرۇپ ماڭدى، ئۇنىڭ ئۈستىبېشى خوتۇنىغا ئوخشاش لاي بولۇپ كەتتى.    ئاتا - ئانىسىنىڭ قىيىن ھالىتىنى كۆرۈپ، ئوغۇلنىڭ قەلبىدە بىر ئويغىنىش ۋە ئويلىنىش پەيدا بولدى. ئۇلارنىڭ ياشىشىغا تۈرتكە بولۇۋاتقان نەرسە زادى نېمە؟ ئەگەر ئۆزى ئاشۇلارغا ئوخشاش بولغان بولسا، ئاللىبۇرۇن ئۆلۈۋالغان بولاتتى. بۇ دۇنياغا گۇناھ قىلىش ئۈچۈن ياشىغىلى كەلگەنمۇ؟ ئۆيگە قايتىپ بارغاندىن كېيىن، ئوغۇل ئاتا - ئانىسىدىن سورىدى:    ـــــ ئاتا، ئانا، سىلەر مۇشۇ ھالغا چۈشۈپ قالدىڭلار، سىلەرنىڭ ياشىشىڭلارغا تۈرتكە بولۇۋاتقان كۈچ زادى نېمە؟ ئەگەر سىلەر بىلەن مېنىڭ ئورنۇم ئالمىشىپ قالغان بولسا...    ئاتىسى دەسلەپتە ھەيران قالدى، ئاندىن:    ـــــ سېنىڭچە مېنىڭ ياشىغۇم بارمۇ؟ - دېدى.    ئانىسىمۇ دەسلەپ ھەيران قالدى، ئاندىن:    ـــــ مېنىڭ قارىشىممۇ ئاتاڭنىڭ قارىشى بىلەن ئوخشاش، - دېدى.    ـــــ ئۇنداقتا؟ - دېدى ئوغۇل.    بىراق ئۇلار گەپ قىلمىدى. ئوغۇلنىڭ جاۋابنى بەكلا ئاڭلىغۇسى بار ئىدى، شۇنىڭ بىلەن ئۇ قوشنىسىدىن سورىدى.      قوشنىسى بېشىنى چايقاپ تۇرۇپ جاۋاب بەردى:      ـــــ ئۇ قېتىمقى ئوت ئاپىتىدە ئاتاڭنىڭ كۆزى، ئاناڭنىڭ پۇتى كۆيۈپ كەتكەن. ئۇلار ئىنتايىن ئۈمىدسىزلىنىپ، بىرلىكتە كۆلگە سەكرەپ ئۆلۈۋالماقچى بولغان. ئۇلار ئۆلۈۋېلىشقا تەرەددۇت قىلىۋاتقان ۋاقىتتا، ئويلىمىغان يەردىن سەن ئاپىرىدە بولدۇڭ! بالام، سەن دەل ئۇلارنىڭ ياشىشىغا تۈرتكە بولۇۋاتقان جەسۇر كۈچ!    ئوغۇل بۇ گەپنى ئاڭلاپ ھەيران قالدى، ئۇ ئۆيگە بېرىپ ئاتا - ئانىسىنى چىڭ قۇچاقلاپ تۇرۇپ:    ـــــ ئاتا، ئانا، مەن سىلەرگە يۈز كېلەلمەيمەن...، - دېدى.  ما شياۋجۈن (ئەسقەر ئەھمىدى تەرجىمىسى) مەنبە : جۇڭگوئۇيغۇرچە رادىئو تورى

كۆرۈلۈشى:1057

قوشۇلغان ۋاقتى:2011/7/23 17:55:17

يوللىغۇچى ئەزا: