ھاياتلىق يولىدا ئېھتىيات بىلەن مېڭىڭ

بىر قېتىم سوقرات بىلەن بىر شاگىرتى ئات ھارۋىسىغا ئولتۇرۇپ سەپەرگە مېڭىپتۇ. ئۇلار بىر ئاز ماڭغاندىن كېيىن، چاڭ-توزان ئۇچۇپ تۇرغان، ئوڭغۇل-دوڭغۇل بىر يولغا كەپتۇ. شاگىرت ئات ھارۋىسىنى ئىنتايىن ئاۋايلاپ ھەيدەپ، بۇ خەتەرلىك يولنى مىڭ تەستە تاماملاپ، ئاخىر داغدام يولغا چىقىپتۇ، بۇنىڭدىن خۇشال بولغان شاگىرتنىڭ چىرايىغا كۈلكە يۈگۈرۈپتۇ. 　　ئۇ ئاتنى قامچىلاپ، بولۇشىغا ھەيدەپ، ئۇستاز-شاگىرت يول بويىدىكى گۈزەل مەنزىرىلەرگە مەپتۇن بولۇپ مېڭىپتۇ، تۇيۇقسىز ئۇلار جىددىي ئەگىلىدىغان بىر ئايلانمىغا دۇچ كەپتۇ، شاگىرت ئاتنىڭ يۈگىنىنى تارتىشقا ئۈلگۈرەلمەي، ھارۋا ئۆرۈلۈپ چۈشۈپتۇ. سوقرات بىلەن شاگىرت يارىلىنىپتۇ. شاگىرت سوقراتقا قاراپ ناھايىتى ئوڭايسىزلىنىپتۇ.　　 ئادەم ھەرقانداق ۋاقىتتا، ھەرقانداق ئىشتا ئېھتىيات قىلىش، پەخەس بولۇش كېرەك. خېيىم-خەتەر ئادەمگە ھەرۋاقىت ھەمراھ، ئۇ پەقەت ئوڭغۇل-دوڭغۇل يوللاردىلا بولمايدۇ، سەن بايا خەتەرلىك يولدا ناھايىتى ئېھتىياتچان بولدۇڭ. داغدام يولغا چىققاندىن كېيىن، سەزگۈرلۈكىڭنى يوقىتىپ قويدۇڭ،  دەپتۇ سوقرات ئۈستى بېشىدىكى توپىلارنى قېقىپ. 　　رېئال تۇرمۇشىمىزدا بۇنداق ئەھۋاللارغا كۆپ ئۇچرايمىز، نۇرغۇن كىشىلەر خەتەردىن ئامان-ئېسەن ئۆتۈپ كەتكەندىن كېيىن، خۇشاللىقتا خۇدىنى يوقىتىپ، بىخەستەلىك قىلىدۇ، شۇنىڭ بىلەن داغدام يولدىمۇ ماڭالمايدۇ، شۇڭا ھەرۋاقىت ئېھتىياتچان بولۇش كېرەك. 　　ھاياتلىق يولى ھەر قاچان داغدام بولۇۋەرمەيدۇ، ئەمما بۇ يولدا قانداق مېڭىش ئۆزىمىزگە باغلىق. بىز ئېھتىياتچانلىق بىلەن مەزمۇت قەدەم تاشلىيالىساق، ھەرقانداق چاغدا ھاياتلىق يولىدا مەزمۇت قەدەم بىلەن خاتىرجەم ماڭالايمىز.

كۆرۈلۈشى:499

قوشۇلغان ۋاقتى:2012/1/7 12:05:50

يوللىغۇچى ئەزا: