قىسمەت
تەلئەت قادىرى
كىملەرنىڭ چىرايىدا شادلىق-كۈلكە،
كىملەرنىڭ چىرايىدا قايغۇ يۇقى.
كىملەرنىڭ ئامەتلىرى كەلسە ئوڭدىن،
كىملەرنىڭ يەر چىشلىگەن ئەلەم-تۇغى.
كىملەرنىڭ بەكىلىرى كەسكەن بىلەن،
كىملەرنىڭ تىغ-خەنجىرى ئۆتمەي قالار.
كىملەرنىڭ قارچۇغىسى ئالالماي ئوۋ،
كىملەرنىڭ چۈجىلىرى شۇڭقار ئالار.
قوغلىشىپ بولالمايسەن ئادىللىقنى،
بولغاندەك تەبىئەتنىڭ ياز ۋە قىشى.
بەزىدە قىسمەتنىڭ گىرۋەكلىرىدىن،
نۇرلىنىپ قالىدۇ ھاياتنىڭ سىرى.