چۈشۈم(بەگمەت يۈسۈپ)

چۈشۈم(نەسىر)
بەگمەت يۈسۈپ

1

بالىلار قۇشقاچقا ئوخشايدۇ، ۋىچىرلىشىپ يېنىڭغا كېلىۋالىدۇ؛ كارى يوق، كىم بىلەن، نېمە ئىش ئۈستىدە سۆزلىشىۋاتىمەن . قاپاق تۈرسەم «پۇررىدە» ئۇچۇپ كېتىدۇ، تۈرمىسەم ئەركىلەيدۇ، غىدىڭشىيدۇ، تەلەپ قىلىدۇ، بۆلىدۇ ئوي－پىكرىمنى، گەپنى－سۆھبەتنى؛ «مۇھىم ئىش» بىلەن راستلا كارى يوق، گاھ مۈرەمگە قونۇۋالىدۇ، چوقۇلايدۇ بۇرۇنلىرىمنى ئوماق بۇدرۇق بارماقلىرىدا.

2

مەن ئەسلى بىلىمى يوق بوۋايمەن، بىلىملىك قىلىپ قويدى ساقىلىم، ساقىلىمنى سۆرەپ كىردىم شەھەرگە، ساقالسىزلار ئىچىگە . پەتىلەپ كوچىلارنى بىلىم توپلىدىم، نەچچە يەشىك يېڭى پاراڭنى، ئېلىپ باردىم سەھراغا يەنە . «شەھەر كۆرگەن ئېشەكتىن قاچ»مىدى، ئىمتىھانغا كىردىم قەلەمسىز، تەرلىرىم قۇيۇلماقتا ماڭلىيىمدىن، قۇيۇلماقتا كۆزلىرىمدىن، خۇددى كىچىك بالىدەك...

3

تاۋۇتقا ئاشىق ئادەملەرنى كۆردۈم، كۆتۈرۈۋالساق كۆتۈرۈلەرمىز دەپ.
بىلىمى يوق بوۋاينى ئويلاپ، شېئىر يېزىپ ئولتۇرار بەگمەت، سەھرادىكى خىلۋەتخانىدا، شەھەردىكى ۋاراڭ－چۇرۇڭدا.
خۇددى ياشنى ئۆلچەپ بەرگەندەك، پەقەت، ئىككى تامچە ياش ئەڭ ئاخىرى تامدى كۆزىدىن.
كۈلكىسىمۇ.. . يىغىسىمۇ...

4

ئويغاندىم، چۈشۈمنى يازدىم.
چۈشۈڭلاردا ئوقۇڭلار ئۇنى.

ئاچقۇچلۇق سۆزلەر : بەگمەت يۈسۈپ , چۈشۈم ,
ساقلىۋېلىش
باھا يازمىلار	يوللانغان ۋاقىت : 2010-8-9 22:16:39 تەھرىر : نامەلۇم	باھا : 0	كۆزىتىش : 384