سالام قۇياش
رەيھانگۈل ئاۋۇت
سۈبھى پەيتى سۆيۈپ ئۆتەر،
كەچ كىرگەندە كۆرۈپ كېلەر،
تاغلىرى بار، باغلىرى بار،
گۈل بەرگىدە ئىزلىرى بار
سالام قۇياش، سالام قۇياش !
پويىز بېلىتى ئالمىسىمۇ،
كانىكولنى كۈتمىسىمۇ
تەڭرىتاغقا نۇرىن سېپىپ
قۇملۇقلارغا مېھرىن بېرىپ
ئۆز ئېلىدە ئەگىپ، ئەگىپ
يۈرۈش نېسىپ بولغان قۇياش.
ساما شۇڭا ئۇلۇغ ئىكەن
بەرگەچ ساڭا تەخت سېلىپ.
ئېقىپ كەتتى قۇرلىرىدا
ياستۇق بولغان كىتابىمنىڭ
چېكىتسىمان ئانام يېشى
چۈشلىرىمگە پاتماي قېلىپ.
قۇلىقىمدا ئۇكام ئۈنى :
«كېلە ئاچا ئوينايمىز» دەپ.
لەۋلىرىمنى كەتتىم چىشلەپ
يىغلىۋەتكىم كېلىپ ھۆڭرەپ.
بەك سىقىلدىم ئۆگىنىشتىن
ساراڭ بولاي دېدىم چارچاپ
غەمگە ئەسرار مەسۇمەدىن
بىزنىڭ ئۆيگە سالام قۇياش.