ﺋﯘﻳﻐﯘﺭ ﺗﯩﻠﯩﺪﯨﻜﻰ «ﺭﻩﯓ» ﺳﯚﺯﯨﻨﯩﯔ ﺳﯧﮭﯩﺮﮔﻪﺭﻟﯩﻚ ﺋﯘﻗۇمى

ﺋﯘﻳﻐﯘﺭ ﺗﯩﻠﯩﺪﯨﻜﻰ «ﺭﻩﯓ» ﺳﯚﺯﯨﻨﯩﯔ ﺳﯧﮭﯩﺮﮔﻪﺭﻟﯩﻚ ﺋﯘﻗۇمى

ﺋﺎﭘﺘﻮﺭﻯ: ﺋﯩﻤﯩﻨﺠﺎﻥ ﺋﺎﺑﺪﯗﺭېھىم

«ھﺎﺯﯨﺮﻗﻰ ﺯﺍﻣﺎﻥ ﺋﯘﻳﻐﯘﺭ ﺗﯩﻠﯩﻨﯩﯔ ﺋﯩﺰﺍھﻠﯩﻖ ﻟﯘﻏﯩﺘﻰ» ﺩﻩ ﺭﻩﯓ ﺳﯚﺯﯨﮕﻪ «ﺑﯩﺮﻩﺭ ﻧﻪﺭﺳﯩﻨﯩﯔ ﻳﯜﺯﯨﮕﻪ ﺑﻮﻳﺎﺵ ﺋﯜﭼﯜﻥ ﺋﯩﺸﻠﯩﺘﯩﺪﯨﻐﺎﻥ ﻣﺎﺩﺩﺍ؛ ﺑﻮﻳﺎﻕ-ﻧﻪﺭﺳﯩﻠﻪﺭﻧﻰ ﺑﻮﻳﺎﻳﺪﯨﻐﺎﻥ ﺑﻮﻳﺎﻕ، ﺳﯩﺮ؛ ﺗﯜﺱ-ﺷﻪﻳﺌﯩﻠﻪﺭﻧﯩﯔ ﺋﻮﭼﯘﻕ-ﻳﻮﺭﯗﻕ، ﺋﺎﻕ، ﻗﺎﺭﺍ، ھەﺭ ﺧﯩﻞ ﻗﯩﻴﺎﭘﻪﺗﻠﯩﺮﻯ؛ ﺭﻩﯓ-ﭼﯩﺮﺍﻱ، ﺭﻩﯓ-ھﯩﻴﻠﻪ-ﻣﯩﻜﯩﺮ» ﺩﯦﮕﻪﻧﺪﻩﻙ ﺋﯩﺰﺍھﻼﺭ ﺑﯧﺮﯨﻠﮕﻪﻥ. ﻣﯘﺷﯘﻧﯩﯖﺪﯨﻦ ﭼﯩﻘﯩﭗ ﺗﯘﺭﯗﭘﺘﯩﻜﻰ، ﺋﯘﻳﻐﯘﺭ ﺗﯩﻠﯩﺪﯨﻜﻰ «ﺭﻩﯓ» ﺳﯚﺯﯨﻨﯩﯔ ﺳﯩﺮ، ﺭﻩﯓ، ھﯩﻴﻠﻪ-ﻣﯩﻜﯩﺮ، ﺳﯩﺮﻟﯩﻖ ﺩﯦﮕﻪﻧﺪﻩﻙ ﻣﻪﻧﯩﻠﯩﺮﻯ ﺑﺎﺭ .

ﺩﯦﻤﻪﻙ، ﺭﻩﯓ ﺑﯩﺮ ﺳﯩﺮﻟﯩﻖ ﻧﻪﺭﺳﻪ، ﺳﯩﺮﻟﯩﻖ ﻧﻪﺭﺳﻪ ﺋﺎﺩﻩﻣﮕﻪ سېھرﯨﻲ ﭘﻪﻳﺪﺍ ﻗﯩﻠﯩﺸﻨﯩﯔ ﺋﺎﺳﺎﺳﻰ. ﺗﯚﯞﻩﻧﺪﻩ ﺑﯘ ھەﻗﺘﻪ ﺗﺎﺭﯨﺨﺘﯩﻦ ﺋﺎﺯ-ﺗﻮﻻ ﮔﻪﭖ ﺋﯧﭽﯩﭗ ﺑﺎﻗﺎﻳﻠﻰ :

1. ﺭﻩﯓ ﯞﻩ سېھىرﮔﻪﺭﻟﯩﻚ

»ﺷﯩﻨﺠﺎﯕﺪﯨﻜﻰ ﻗﻪﺩﯨﻤﻜﻰ ﺋﺎھاﻟﻪ ﺳﯩﺮﺗﺘﯩﻦ ﻛﻪﻟﮕﻪﻥ. ﺩﯨﻦ ﺗﺎﺭﻗﯩﻠﯩﺸﺘﯩﻦ ﺋﯩﻠﮕﯩﺮﻯ ﻳﻪﺭﻟﯩﻚ ﺩﯨﻦ ﯞﻩ ﺋﯩﭙﺘﯩﺪﺍﺋﯩﻲ ﺩﯨﻦ ﺋﺎﺳﺎﺳﯩﺪﺍ ﭘﻪﻳﺪﺍ ﺑﻮﻟﻐﺎﻥ ﺷﺎﻣﺎﻥ ﺩﯨﻨﯩﻐﺎ ﺋﯧﺘﯩﻘﺎﺩ ﻗﯩﻠﻐﺎﻥ. ﺷﯩﻨﺠﺎﯕﺪﯨﻜﻰ ﺑﻪﺯﻯ ﺋﺎﺯ ﺳﺎﻧﻠﯩﻖ ﻣﯩﻠﻠﻪﺗﻠﻪﺭﻧﯩﯔ ﺋﯩﭙﺘﯩﺪﺍﺋﯩﻲ ﺩﯨﻦ ﯞﻩ ﺷﺎﻣﺎﻥ ﺩﯨﻨﯩﻨﯩﯔ ﻗﺎﺭﺍﺷﻠﯩﺮﻯ ﯞﻩ ﺋﺎﺩﻩﺗﻠﯩﺮﻯ ھاﺯﯨﺮﻏﺎ ﻗﻪﺩﻩﺭ ﺋﻮﺧﺸﺎﺵ ﺑﻮﻟﻤﯩﻐﺎﻥ ﺩﻩﺭﯨﺠﯩﺪﻩ ﺳﺎﻗﻼﭖ ﻗﯧﻠﯩﻨﯩﯟﺍﺗﯩﺪﯗ». ﺋﯩﭙﺘﯩﺪﺍﺋﯩﻲ ﺟﻪمئىيەﺗﺘﻪ ﺋﯩﻨﺴﺎﻧﻼﺭﻧﯩﯔ ﺗﻪﺑﯩﺌﻪﺕ ﺩﯗﻧﻴﺎﺳﯩﻨﻰ ﺑﯩﻠﯩﺶ، ﭼﯜﺷﯩﻨﯩﺸﻰ ﻧﺎھاﻳﯩﺘﻰ ﭼﻪﻛﻠﯩﻚ ﺑﻮﻟﻐﺎﻧﻠﯩﻘﺘﯩﻦ، ﺗﻪﺑﯩﺌﻪﺕ ﺩﯗﻧﻴﺎﺳﯩﺪﺍ ﺳﺎﺩﯨﺮ ﺑﻮﻟﻐﺎﻥ «ﺗﺎﺳﺎﺩﯨﭙﯩﻲ ﺗﻮﻏﺮﺍ ﻛﯧﻠﯩﭗ ﻗﯧﻠﯩﺶ» «ﺋﻮﺧﺸﯩﺸﯩﭗ ﻗﯧﻠﯩﺶ» ﻻﺭﻧﻰ ﺗﻪﺑﯩﺌﻪﺕ ﺩﯗﻧﻴﺎﺳﯩﺪﯨﻦ ھاﻟﻘﯩﻐﺎﻥ ﺋﯩﻼھىي ﻛﯜﭼﻜﻪ ﺑﺎﻏﻼﭖ ﭼﯜﺷﯩﻨﻪﺗﺘﻰ. «ﺷﯩﻨﺠﺎﯕﺪﯨﻜﻰ ﺩﯨﻨﻼﺭﻧﯩﯔ ﺗﺎﺭﯨﺨﻰ» ﺩﯦﮕﻪﻥ ﻛﯩﺘﺎﺑﺘﺎ «ﺷﺎﻣﺎﻥ ﺩﯨﻨﻰ ﺭﻩﯕﻠﻪﺭﻧﯩﯔ سېھرﯨﻲ ﻛﯜﭼﯩﺪﯨﻦ ﭘﺎﻳﺪﯨﻼﻧﻐﺎﻥ، ﺋﯘﻧﯩﯖﺪﯨﻦ ﺗﯘﻍ-ﺋﻪﻟﻪﻣﻠﻪﺭ ﻗﯩﺰﯨﻞ، ﻛﯚﻙ، ﺋﺎﻕ، ﻗﺎﺭﯨﺪﯨﻦ ﺋﯩﺒﺎﺭﻩﺕ ﺗﯚﺕ ﺧﯩﻞ ﺭﻩﯕﺪﻩ ﺑﻮﻟﯘﭖ، ﺑﯘ ﺗﯚﺕ ﺧﯩﻞ ﺭﻩﯓ ﺷﻪﺭﻕ، ﺟﻪﻧﯘﺏ، ﻏﻪﺭﺏ، ﺷﯩﻤﺎﻟﺪﯨﻜﻰ ﺭﻭھلارﻏﺎ ﯞﻩﻛﯩﻠﻠﯩﻚ ﻗﯩﻼﺗﺘﻰ. ﭘﯧﺮﺧﯘﻧﻼﺭ ﺋﯘﺯﯗﻥ ﭼﺎﭺ ﻗﻮﻳﯘﭖ، ﺋﯜﭼﺒﯘﻟﯘﯓ ﺷﻪﻛﯩﻠﺪﯨﻜﻰ ﺋﺎﻕ ﻳﺎﻛﻰ ﻛﯜﻝ ﺭﻩﯓ ﺗﯘﻣﺎﻕ ﻛﯩﻴﻪﺗﺘﻰ. ﭘﯧﺮﺧﯘﻧﻠﯘﻕ ﭘﺎﺋﺎﻟﯩﻴﻪﺗﻠﻪﺭﻧﻰ ﺋﯧﻠﯩﭗ ﺑﺎﺭﻏﺎﻧﺪﺍ ﺋﺎﻳﺎﻟﭽﻪ ﻛﯚﻳﻨﻪﻙ ﻛﯩﻴﻪﺗﺘﻰ» ﺩﯦﻴﯩﻠﮕﻪﻥ. ﺋﯘﻳﻐﯘﺭﻻﺭ ﺷﺎﻣﺎﻥ ﺩﯨﻨﻰ ﺋﯧﺘﯩﻘﺎﺩﻯ ﺷﺎﺭﺍﺋﯩﺘﯩﺪﺍ ﺗﯜﺭﻟﯜﻙ سېھىرﮔﻪﺭﻟﯩﻚ ﭘﺎﺋﺎﻟﯩﻴﻪﺗﻠﯩﺮﻯ ﺋﯩﺸﻠﻪﭘﭽﯩﻘﯩﺮﯨﺶ، ﺗﯘﺭﻣﯘﺵ ﯞﻩ ﺋﯚﺯﯨﻨﯩﯔ ﺭﻭھى ﺑﯩﻠﻪﻥ ﺑﯩﺮﻟﻪﺷﺘﯜﺭﯛﻟﮕﻪﻧﯩﺪﻯ. ﺑﯘ ھەﻗﺘﯩﻜﻰ ﻣﻪﻟﯘﻣﺎﺗﻼﺭ ﺋﯘﻳﻐﯘﺭﭼﻪ، ﺧﻪﻧﺰﯗﭼﻪ، ﺧﻪﻧﺰﯗﭼﻪ ﯞﻩ ﭘﺎﺭﺳﭽﻪ ﻗﻪﺩﯨﻤﻜﻰ ﺋﻪﺳﻪﺭﻟﻪﺭﺩﻩ ﻛﯚﭖ ﺋﯘﭼﺮﺍﻳﺪﯗ. ﺋﯘﻧﯩﯔ ﺋﯜﺳﺘﯩﮕﻪ ﺷﺎﻣﺎﻥ ﺩﯨﻨﻰ ﺗﻪﺑﯩﺌﻪﺕ ﻛﯜﭼﻠﯩﺮﯨﻨﻰ ﺑﻮﻳﺴﯘﻧﺪﯗﺭﯗﭖ ﯞﻩ ﺋﯘﻻﺭﻏﺎ ﺗﻪﺳﯩﺮ ﻛﯚﺭﺳﯩﺘﯩﺸﻨﻰ ﻣﻪﻗﺴﻪﺕ ﻗﯩﻠﻐﺎﻥ ﺑﯩﺮ ﻳﯜﺭﯛﺵ سېھىرﮔﻪﺭﻟﯩﻚ ﺳﯧﺴﺘﯩﻤﯩﺴﯩﻐﺎ ﺋﯩﮕﻪ ﺩﯨﻦ ﺑﻮﻟﯘﭖ، ھاﺯﯨﺮﻏﯩﭽﻪ ﺋﯘﻳﻐﯘﺭﻻﺭﺩﺍ ﺳﺎﻗﻠﯩﻨﯩﯟﺍﺗﻘﺎﻥ سېھىرﮔﻪﺭﻟﯩﻚ ﭘﺎﺋﺎﻟﯩﻴﻪﺗﻠﯩﺮﯨﻨﯩﯔ ﻛﯚﭖ ﻗﯩﺴﻤﯩﻨﯩﯔ ﺷﺎﻣﺎﻥ ﺩﯨﻨﻰ ﺋﯧﺘﯩﻘﺎﺩﯨﻐﺎ ﺋﺎﻻﻗﯩﺪﺍﺭ ﺋﯩﻜﻪﻧﻠﯩﻜﯩﻨﻰ ﺑﺎﻳﻘﺎﻳﻤﯩﺰ .

ھاﺯﯨﺮﻏﯩﭽﻪ ﺑﯩﺰﮔﻪ ﻳﯧﺘﯩﭗ ﻛﻪﻟﮕﻪﻥ ﺋﯘﻳﻐﯘﺭﻻﺭﻧﯩﯔ ﺭﻩﯓ ﺗﺎﺭﯨﺨﯩﻐﺎ ﺋﺎﺋﯩﺖ ﻣﻪﻧﺒﻪﻟﻪﺭﮔﻪ ﺋﺎﺳﺎﺳﻼﻧﻐﺎﻧﺪﺍ، ﻗﻪﺩﯨﻤﻜﻰ ﺋﯘﻳﻐﯘﺭﻻﺭﺩﯨﻜﻰ ﭘﯧﺮﺧﯘﻧﻼﺭ ﺋﯚﺯﻟﯩﺮﯨﻨﯩﯔ ﺩﯨﻨﯩﻲ ﭼﯜﺷﻪﻧﭽﯩﻠﯩﺮﯨﻨﻰ ﺋﯩﭙﺎﺩﯨﻠﻪﺷﺘﻪ ﺭﻩﯕﻨﯩﯔ سېھرﯨﻲ ﻛﯜﭼﯩﺪﯨﻦ ﺋﯜﻧﯜﻣﻠﯜﻙ ﭘﺎﻳﺪﯨﻼﻧﻐﺎﻥ. ﻣﻪﺳﯩﻠﻪﻥ، «ﺋﯘﻳﻐﯘﺭ ﺧﻪﻟﻖ ﺋﻪﺩﻩﺑﯩﻴﺎﺗﻰ ﺟﻪﯞھەﺭﻟﯩﺮﻯ» ﺩﯦﮕﻪﻥ ﻛﯩﺘﺎﺑﻨﯩﯔ «ﺑﺎﺧﺸﻰ، ﭘﯧﺮﺧﯘﻧﻼﺭﻧﯩﯔ ﺑﺎﻳﺎﻧﻰ» ﺩﺍ، «ﺭﻩﻣﻤﺎﻝ ﻛﯩﺘﺎﺏ ﻛﯚﺭﯛﭖ، ﻛﯧﺴﻪﻟﻨﯩﯔ ﺋﺎﻛﯩﺴﯩﻐﺎ ‹ﺳﯩﻠﯩﻨﯩﯔ ﺋﯩﻨﯩﻠﯩﺮﯨﻐﺎ ﺳﻮﻏﯘﻗﺘﯩﻦ ﺷﺎﻣﺎﻝ ﺩﺍﺭﯨﭙﺘﯘ. ﺑﯩﺮ ﻗﺎﺭﺍ ﺗﻮﺧﯘﻏﺎ ﺩﯗﺋﺎ ﺋﻮﻗﯘﺗﺴﯩﻼ، ﭼﺎﺭﺷﻪﻧﺒﻪ ﺋﺎﺧﺸﯩﻤﻰ 14 ﺋﻮﻳﯘﻥ ﭘﯧﺮﻩ ﺋﻮﻳﻨﺎﺗﺴﯩﻼ›» ﺩﯦﻴﯩﻠﮕﻪﻥ. ﺑﯘ ﻳﻪﺭﺩﻩ ﺭﻩﻣﻤﺎﻝ «ﻗﺎﺭﺍ ﺗﻮﺧﯘ» ﺩﯦﻴﯩﺶ ﺋﺎﺭﻗﯩﻠﯩﻖ ﭘﯧﺮﺧﯘﻧﻠﯘﻕ ﻣﻪﺯﻣﯘﻧﯩﻨﻰ ﺗﯧﺨﯩﻤﯘ سېھىرﻟﻪﺷﺘﯜﺭﮔﻪﻥ .

ﺗﯘﺧﯘﻡ ﺋﯘﻳﻐﯘﺭ ﺋﯩﺸﻘﯩﻲ سېھىرﮔﻪﺭﻟﯩﻜﺘﻪ ﻛﯚﭘﺮﻩﻙ ﺋﯩﺸﻠﯩﺘﯩﻠﮕﻪﻥ ﺩﻭﺭﯨﻼﺭﻧﯩﯔ ﺑﯩﺮﯨﺪﯗ. ﺧﻪﻟﻖ ﺋﯩﺸﻪﻧﭽﻠﯩﺮﯨﮕﻪ ﺋﺎﺳﺎﺳﻼﻧﻐﺎﻧﺪﺍ «ﻗﺎﺭﺍ ﻣﯩﻜﯩﻴﺎﻥ ﺟﯜﻣﻪ ﻛﯜﻧﯩﺪﻩ ﻛﺎﻛﯩﻠﯩﻐﺎﻥ ﺗﯘﺧﯘﻣﻨﯩﯔ سېھرﻯ ﻗﯘﯞﯞﯨﺘﻰ ﻛﯜﭼﻠﯜﻙ ﺑﻮﻟﯘﭖ ...» ﺧﻪﻟﻖ ﺋﺎﺭﯨﺴﯩﺪﯨﻜﻰ «ﺑﺎﺧﺸﻰ»، «ﭘﯧﺮﺧﯘﻥ»، «ﺟﯩﻨﻜﻪﺵ»، «ﺋﯩﺴﺴﯩﺘﻘﯘ»، «ﺧﺎﺩﺍ» ﺩﻩﭖ ﺋﺎﺗﯩﻠﯩﯟﺍﺗﻘﺎﻥ سېھىرﮔﻪﺭﻟﻪﺭ «ﻗﺎﺭﺍ ﻣﯩﻜﯩﻴﺎﻥ» ﺩﻩﭖ «ﻗﺎﺭﺍ» ﻟﯩﻖ ﺗﯜﺳﯩﻨﻰ ﻛﯜﭼﻪﻳﺘﯩﭗ ﻛﯩﺸﯩﻠﻪﺭﺩﻩ ﺳﯩﺮﻟﯩﻖ ﺗﯘﻳﻐﯘﻧﻰ ﭘﻪﻳﺪﺍ ﻗﯩﻠﯩﭗ سېھىرﮔﻪﺭﻟﯩﻚ ﻗﯩﻠﻐﺎﻥ. ﺑﯘﻣﯘ ﺋﯘﻳﻐﯘﺭﻻﺭﻧﯩﯔ ﺗﺎﺭﯨﺨﺘﺎ «ﻗﺎﺭﺍ ﺭﻩﯓ» ﻧﻰ ﺋﯘﻟﯘﻏﻼﺵ ﭼﯜﺷﻪﻧﭽﯩﻠﯩﺮﯨﻨﯩﯔ ﺋﻪﻛﺲ ﺋﯧﺘﯩﺸﯩﺪﯗﺭ. ﺭﻩﯕﮕﻪ ﺑﺎﻏﻠﯩﻨﯩﺸﻠﯩﻖ سېھىرﮔﻪﺭﻟﯩﻜﻨﯩﯔ ﺋﺎﻻﻣﻪﺗﻠﯩﺮﯨﻨﻰ ﺋﯩﺰﺩﻩﭖ ﺗﯧﭙﯩﺶ ﺗﻪﺱ ﺋﻪﻣﻪﺱ .

»ﺷﺎﻣﺎﻧﻼﺭ ﻣﻪﻧﯩﯟﻯ ﺋﯩﻤﺘﯩﻴﺎﺯﻟﯩﺮﯨﻨﻰ ﺋﯘﺳﺴﯘﻝ-ﻣﯘﺯﯨﻜﺎ، ﺷﯧﺌﯩﺮ، ﻗﻮﺷﺎﻗﻼﺭﻧﯩﯔ سېھرﯨﻲ ﻛﯜﭼﻰ ﺋﺎﺭﻗﯩﻠﯩﻖ ﻛﯚﺭﺳﻪﺗﺘﻰ.» ﺑﯘ ھەﻗﺘﻪ «ﺋﻮﻏﯘﺯﻧﺎﻣﻪ» ﺩﻩ .... «ﺋﻮﻏﯘﺯ ﺧﺎﻗﺎﻥ ﭼﻮﯓ ﭼﯧﺪﯨﺮﺩﺍ (ﺋﻮﯓ ﺗﻪﺭﻩﭘﻜﻪ) ﻗﯩﺮﯨﻖ ﻏﻮﻻﭼﻠﯩﻖ ﺋﯘﺯﯗﻥ ﺑﯩﺮ ﻳﺎﻏﺎﭼﻨﻰ ﻗﺎﺩﺍﺗﻘﯘﺯﺩﻯ. ﺋﯘﻧﯩﯔ ﺋﯘﭼﯩﻐﺎ ﺑﯩﺮ ﺋﺎﻟﺘﯘﻥ ﺗﻮﺧﯘﻧﻰ ﺑﺎﻏﻠﯩﺪﻯ (ﺋﺎﺳﺘﻰ)، ﺋﯘﻧﯩﯔ ﺗﯜﯞﯨﮕﻪ ﺑﯩﺮ ﺋﺎﻕ ﻗﻮﻳﻨﻰ ﺑﺎﻏﻠﯩﺪﻯ، (ﺳﻮﻝ ﺗﻪﺭﻩﭘﻜﻪ) ﻗﯩﺮﯨﻖ ﻏﻮﻻﭼﻠﯩﻖ ﺋﯘﺯﯗﻥ ﺑﯩﺮ ﻗﺎﺭﺍ ﺑﺎﻏﻠﯩﺪﻯ» ﺩﯦﻴﯩﻠﮕﻪﻥ. ﺑﯘ ﻳﻪﺭﺩﻩ ﺋﯧﻴﺘﯩﻠﯩﯟﺍﺗﻘﺎﻥ «ﻗﺎﺭﺍ ﻗﻮﻱ» «ﻗﺎﺭﺍ» ﭼﯜﺷﻪﻧﭽﯩﻠﯩﺮﻯ ﺋﻪﻟﯟﻩﺗﺘﻪ ﺑﻪﻟﮕﯩﻠﯩﻚ ﺋﯩﭽﻜﻰ ﻣﻪﺯﻣﯘﻥ ﺑﯩﻠﻪﻥ ﺑﺎﻏﻼﻧﻐﺎﻥ ﯞﻩ ﻗﯘﺭﯗﻟﺘﺎﻳﻨﯩﯔ ﻛﻪﻳﭙﯩﻴﺎﺗﯩﻨﻰ ﺳﯩﺮﻟﯩﻘﻼﺷﺘﯘﺭﯗﺵ ﺭﻭﻟﯩﻨﻰ ﺋﻮﻳﻨﯩﻐﺎﻥ. ﻣﺎﻧﺎ ﺑﯘﻧﯩﯔ ﺋﯚﺯﻯ ﺑﯩﺮ ﺭﻩﯓ سېھىرﮔﻪﺭﻟﯩﻜﯩﺪﯨﻦ ﺋﯩﺒﺎﺭﻩﺕ. «ﺋﯩﭙﺘﯩﺪﺍﺋﯩﻲ ﺩﻩﯞﺭﻟﻪﺭﺩﻩ ﮔﯜﺯﻩﻟﻠﯩﻚ ﺋﯧﻠﯩﻤﯩﻨﺘﻠﯩﺮﻯ ﺩﯨﻨﯩﻲ سېھىرﮔﻪﺭﻟﯩﻚ ﺋﯧﻠﯩﻤﯩﻨﺘﻠﯩﺮﻯ ﺑﯩﻠﻪﻥ ﻗﻮﺷﯘﻟﯘﭖ ﻣﯘﺭﺍﺳﯩﻤﻼﺭﻧﯩﯔ ﭘﯩﺴﺨﯩﻜﯩﻠﯩﻖ ﺭﻭﻟﯩﻨﻰ ﻛﯜﭼﻪﻳﺘﻜﻪﻥ»، ﺧﯘﺩﺩﻯ ﻳﺎﭘﻮﻧﯩﻴﯩﻠﯩﻚ ﺗﻪﺗﻘﯩﻘﺎﺗﭽﻰ ﭼﯩﻦ ﻳﯜ ﻓﯘ ﺋﯧﻴﺘﻘﺎﻧﺪﻩﻙ «ﺋﺎﻕ ﯞﻩ ﻗﺎﺭﺍ ﺭﻩﯕﻠﻪﺭ ﺑﺎﻗﯩﻲ ﺋﺎﻟﻪﻣﻨﯩﯔ ﯞﻩ ﺋﯚﻟﯜﻣﻨﯩﯔ ﺳﯩﻤﯟﻭﻟﻰ ﺑﻮﻟﯘﺵ ﺑﯩﻠﻪﻥ ﺑﯩﻠﻠﻪ ﭼﻪﻛﺴﯩﺰ سېھىرﺮﮔﻪﺭﻟﯩﻚ ﺧﺎﺭﺍﻛﺘﯧﺮﯨﮕﻪ ﺋﯩﮕﻪ» ﻳﯘقىرىقى ﻣﯩﺴﺎﻟﻼﺭﺩﯨﻦ ﺋﯧﻨﯩﻖ ﻛﯚﺭﯛﯞﺍﻻﻻﻳﻤﯩﺰﻛﻰ ، ﺭﻩﯓ-ﺋﯘﻳﻐﯘﺭﻻﺭﻧﯩﯔ ﺋﻪﻧﺌﻪﻧﯩﯟﻯ ﺋﯧﯖﯩﺪﺍ ﺑﯩﺮ ﺧﯩﻞسېھرﯨﻲ ﻛﯜﭼﺘﯩﻦ ﺋﯩﺒﺎﺭﻩﺕ.

2. ﺭﻩﯓ ﯞﻩ ﺳﯩﺮﭼﯩﻠﯩﻖ

ﺳﯩﺮﭼﯩﻠﯩﻖ ﻛﻪﺳﭙﻰ ﺋﯘﻳﻐﯘﺭﻻﺭ ﺋﯘﺯﺍﻕ ﺗﺎﺭﯨﺨﺘﯩﻦ ﺑﯘﻳﺎﻥ ﻗﻮﻟﻠﯩﻨﯩﭗ ﻛﯧﻠﯩﯟﺍﺗﻘﺎﻥ ھۈﻧﻪﺭ-ﻛﻪﺳﭙﻠﻪﺭﻧﯩﯔ ﺑﯩﺮﻯ. ﺋﻪﺟﺪﺍﺩﻟﯩﺮﯨﻤﯩﺰ ﺗﺎﺭﯨﺨﺘﯩﻦ ﺑﯘﻳﺎﻥ ﺳﯩﺮ ﺋﺎﺭﻗﯩﻠﯩﻖ ﺑﯧﺰﻩﺷﻜﻪ ﺗﯧﮕﯩﺸﻠﯩﻚ ﺑﻮﻳﯘﻣﻼﺭﻧﻰ ﺳﯩﺮﻻﭖ، ﻛﯚﺭﻛﻪﻣﻠﻪﺷﺘﯜﺭﯛﭖ ﻛﻪﻟﮕﻪﻥ. ﺋﯘﻳﻐﯘﺭﻻﺭﺩﯨﻜﻰ ﺳﯩﺮﭼﯩﻠﯩﻖ ﻛﻪﺳﭙﯩﻨﯩﯔ ﺗﺎﺭﯨﺨﻰ ﻧﺎھاﻳﯩﺘﻰ ﺋﯘﺯﺍﻕ ﺩﯦﻴﯩﺸﻜﻪ ﺑﻮﻟﯩﺪﯗ. ﻣﻪھﻤﯘﺩ ﻗﻪﺷﻘﻪﺭﻯ «ﺗﯜﺭﻛﯩﻲ ﺗﯩﻠﻼﺭ ﺩﯨﯟﺍﻧﻰ» ﻧﯩﯔ 1-ﺗﻮﻣﯩﺪﺍ «ﺳﯩﺮ «sir«ﭼﯩﻨﻠﯩﻘﻼﺭ ﻗﺎﭼﯩﻨﻰ ﻧﻪﻗﯩﺸﻠﻪﭖ ﺳﯩﺮﻻﻳﺪﯨﻐﺎﻥ ﺑﯩﺮ ﺧﯩﻞ ﻳﯧﻠﯩﻤﻠﯩﻖ ﺑﻮﻳﺎﻕ، ﺳﯩﺮﻟﯩﻖ ﺋﺎﻳﺎﻕ (ﻗﺎﭼﺎ)» ﺩﻩﭖ ﺗﯩﻠﻐﺎ ﺋﯧﻠﯩﻨﻐﺎﻥ .

1980»-يىلى ﻛﺮﻭﺭﻩﻧﺪﯨﻜﻰ ﻗﻪﺩﯨﻤﻜﻰ ﺋﺎﺭﺧﯧﺌﻮﻟﻮﮔﯩﻴﯩﻠﯩﻚ ﺗﻪﻛﺸﯜﺭﯛﺷﺘﻪ ﻗﯧﺰﯨﯟﯦﻠﯩﻨﻐﺎﻥ ﺳﯩﺮﻻﻧﻐﺎﻥ ﻗﺎﭼﺎ ﻳﺎﻏﺎﭼﺘﯩﻦ ﻳﺎﺳﺎﻟﻐﺎﻥ ﺑﻮﻟﯘﭖ، ﺋﯜﺳﺘﯩﮕﻪ ﻗﯩﺰﯨﻞ، ﻗﺎﺭﺍ، ﭘﻮﺭﺭﻩﯓ ﻗﺎﺗﺎﺭﻟﯩﻖ ﺳﯩﺮﻻﺭ ﺑﯩﻠﻪﻥ ﮔﯜﻝ-ﮔﯩﻴﺎھلاﺭﻧﯩﯔ ﺷﻪﻛﻠﻰ ﺳﯩﺰﯨﻠﻐﺎﻥ. ﺑﯘ ﻗﺎﭼﺎ ﺳﯩﭙﺴﯩﻠﯩﻖ، ﭘﺎﺭﻗﯩﺮﺍﻕ ﺑﻮﻟﯘﭖ، ﻳﯘقىرﻯ ﺗﯧﺨﻨﯩﻜﯩﻠﯩﻖ ﻣﺎھاﺭﻩﺕ ﻛﯚﺭﯛﻧﯜﭖ ﺗﯘﺭﯨﺪﯗ». ﺑﯘﻧﯩﯖﺪﯨﻦ ﻛﯚﺭﯛﯞﯦﻠﯩﺸﻘﺎ ﺑﻮﻟﯩﺪﯗﻛﻰ، ﺋﯘﻳﻐﯘﺭﻻﺭﻧﯩﯔ ﺳﯩﺮﭼﯩﻠﯩﻖ ھۈﻧﯩﺮﻯ ﺋﯘﺯﺍﻕ ﺗﺎﺭﯨﺨﻘﺎ ﺋﯩﮕﻪ. ﺳﯩﺮﭼﯩﻠﯩﻖ ھۈﻧﯩﺮﻯ ھەﺭ ﺧﯩﻞ ﺭﻩﯕﻠﯩﻚ ﺳﯩﺮ ﺋﺎﺭﻗﯩﻠﯩﻖ «ھۈﻧﻪﺭ» ﻗﯩﻠﯩﺪﯨﻐﺎﻥ ﻛﻪﺳﭗ ﺑﻮﻟﯘﭖ، ﺋﯘﻧﯩﯔ ﺋﯩﺸﻠﯩﺘﯩﺪﯨﻐﺎﻥ ﻣﺎﺗﯧﺮﯨﻴﺎﻟﻠﯩﺮﻯ ﺳﯩﺮ «ﺭﻩﯓ» ﺑﻮﻟﻐﺎﻧﻠﯩﻘﻰ ﺋﯜﭼﯜﻥ ﺋﯘ ﺑﺎﺷﻘﺎ ﻛﻪﺳﭙﻠﻪﺭﺩﯨﻦ ﺋﯚﺯﯨﻨﯩﯔ ﺋﺎﻻھىدﯨﻠﯩﻜﻰ ﺑﯩﻠﻪﻥ ﺯﻭﺭ ﺩﻩﺭﯨﺠﯩﺪﻩ ﭘﻪﺭﻗﻠﯩﻨﯩﭗ، ﻛﯩﺸﯩﻠﻪﺭﮔﻪ ﺑﯩﺮ ﺧﯩﻞ ﺳﯩﺮﻟﯩﻖ ﺗﯘﻳﻐﯘ ﺑﯧﺮﯨﺪﯗ .

ﺑﯩﺰ ﻳﯘقىرﯨﺪﺍ ﺋﯧﻴﺘﻘﺎﻧﺪﻩﻙ «ﺳﯩﺮ» ﺩﯦﮕﻪﻥ ﺑﯘ ﺳﯚﺯ ھاﺯﯨﺮﻗﻰ ﺯﺍﻣﺎﻥ ﺋﯘﻳﻐﯘﺭ ﺗﯩﻠﯩﺪﺍ ﺋﯩﻜﻜﻰ ﺧﯩﻞ ﻣﻪﻧﯩﮕﻪ ﺋﯩﮕﻪ ﺑﻮﻟﯘﭖ، ﺑﯩﺮﺳﻰ ﺳﯩﺮﭼﯩﻠﯩﻘﺘﺎ ﺯﯨﻨﻨﻪﺗﻠﻪﺷﻜﻪ ﺋﯩﺸﻠﯩﺘﯩﺪﯨﻐﺎﻥ ﺭﻩﯕﻠﻪﺭ ﻛﯚﺯﺩﻩ ﺗﯘﺗﯘﻟﯩﺪﯗ. ﻳﻪﻧﻪ ﺑﯩﺮﺳﻰ ﻳﻮﺷﯘﺭﯗﻥ، ﺋﺎﺟﺎﻳﯩﭗ ﻏﻪﻳﺮﯨﻲ، ﺋﯘﻗﻘﯩﻠﯩﻲ ﺑﻮﻟﻤﺎﻳﺪﯨﻐﺎﻥ ﻗﻮﺭﻗﯘﻧﭽﻠﯘﻕ ﺩﯦﮕﻪﻧﺪﻩﻙ ﻣﻪﻧﯩﻠﻪﺭ ﻛﯚﺯﺩﻩ ﺗﯘﺗﯩﻠﯩﺪﯗ. ﺋﯘﻳﻐﯘﺭﻻﺭ ﺗﯩﻠﯩﺪﯨﻜﻰ «سېھىرﮔﻪﺭﻟﯩﻚ» ﺩﯦﮕﻪﻥ ﺳﯚﺯ ﺑﯩﻠﻪﻥ «ﺳﯩﺮ» ﯞﻩ «ﺳﯩﺮﻟﯩﻖ» ﺩﯦﮕﻪﻥ ﺳﯚﺯﻟﻪﺭﻧﯩﯔ ﻣﻪﻧﻪ-ﻣﻪﺯﻣﯘﻧﻠﯩﺮﻯ ﺑﯩﺮ-ﺑﯩﺮﯨﮕﻪ ﻳﯧﻘﯩﻦ ﻛﯧﻠﯩﺪﯗ، ﺩﻩﭖ ﺋﯧﻴﺘﯩﺸﻘﺎ ﺑﻮﻟﯩﺪﯗ. ﭼﯜﻧﻜﻰ سېھىرﮔﻪﺭﻟﯩﻜﻨﯩﯔ ﻗﯩﻠﻐﺎﻥ سېھىرﮔﻪﺭﻟﯩﻜﻰ ﺩﺍﺋﯩﻢ ﺑﯩﺰﮔﻪ ﺑﯩﺮ ﺳﯩﺮ ﺑﻮﻟﯘﭖ ﺗﯘﻳﯘﻟﯩﺪﯗ .

ھاﺯﯨﺮﻗﻰ ﺯﺍﻣﺎﻥ ﺭﻩﯓ ﺋﯩﻠﻤﯩﻨﯩﯔ ﻗﺎﺭﯨﺸﻰ ﺑﻮﻳﯩﭽﻪ، ﺋﻪﮔﻪﺭ ﺑﯩﺮ ﺗﻪﺧﺴﯩﻨﯩﯔ ﻳﯜﺯﯨﻨﻰ ﺗﻪﯓ ﻧﯩﺴﺒﻪﺗﺘﯩﻜﻰ ﻳﻪﺗﺘﻪ ﺧﯩﻞ ﺭﻩﯓ (ﻗﯩﺰﯨﻞ، ﻛﺎﯞﺍ ﭼﯩﭽﯩﻜﻰ، ﺳﯧﺮﯨﻖ، ﻳﯧﺸﯩﻞ، ﭼﻪچرﻩﯓ، ﻛﯚﻙ، ﺳﯚﺳﯜﻥ) ﺑﯩﻠﻪﻥ ﺑﻮﻳﺎﭖ، ﺋﯘﻧﻰ ﺗﯧﺰ ﺳﯜﺭﺋﻪﺗﺘﻪ ﭘﯩﺮﻗﯩﺮﺍﺗﺴﺎﻕ ﺑﯘ ﺗﻪﺧﺴﻪ ﺋﺎﻕ ﺑﻮﻟﯘﭖ ﻛﯚﺭﯛﻧﯩﺪﯗ. ﻳﻪﻧﻪ ﻳﯘقىرىقى ﻳﻪﺗﺘﻪ ﺭﻩﯓ ﻧﯘﺭﯨﻨﻰ ﺋﯚﺯﺋﺎﺭﺍ ﻗﻮﺷﺴﺎﻕ ﺋﺎﻕ ﻧﯘﺭ ﻛﯧﻠﯩﭗ ﭼﯩﻘﯩﺪﯗ. ﻣﺎﻧﺎ ﻣﯘﺷﯘﻧﯩﯔ ﺋﯚﺯﯨﻤﯘ ﺑﯩﺮ «سېھىرﮔﻪﺭﻟﯩﻚ» ﺗﯩﻦ ﺋﯩﺒﺎﺭﻩﺕ. يۇقىرىقى ﻣﯩﺴﺎﻟﻼﺭﻏﺎ ﺋﺎﺳﺎﺳﻼﻧﻐﺎﻧﺪﺍ، ﺋﯘﻳﻐﯘﺭﻻﺭﻧﯩﯔ ﺳﯩﺮﭼﯩﻠﯩﻖ ھۈﻧﯩﺮﯨﻨﯩﯔ ﺋﻪﺳﻠﯩﻲ ﺑﯩﺮ «ﺭﻩﯓ سېھىرﮔﻪﺭﻟﯩﻚ» ھۈﻧﯩﺮﻯ ﺋﯩﻜﻪﻧﻠﯩﻜﯩﮕﻪ ﮔﯘﻣﺎﻥ ﻗﯩﻼﻻﻳﻤﯩﺰ. ﺩﯦﻤﻪﻙ، ﺭﻩﯓ-سېھىرﮔﻪﺭﻟﯩﻚ ﺑﯩﻠﻪﻥ ﺯﯨﭻ ﺑﺎﻏﻠﯩﻨﯩﺸﻠﯩﻖ ﺳﯩﺮﻟﯩﻖ ﺩﯗﻧﻴﺎ .

ﻳﯘﻗﯘﺭﻗﯩﺪﯨﻦ ﺑﺎﺷﻘﺎ ھاﺯﯨﺮﻗﻰ ﺯﺍﻣﺎﻥ ﺭﻭھى ﺋﺎﻧﺎﻟﯩﺰ ﺋﯩﻠﻤﯩﻨﯩﯔ ﻧﻪﺗﯩﺠﯩﻠﯩﺮﯨﺪﯨﻦ ﻗﺎﺭﯨﻐﺎﻧﺪﺍ «ھاﺯﯨﺮﻗﻰ ﺋﯩﻨﺴﺎﻧﻼﺭ ﻣﯧﯖﯩﺴﻰ ﭘﻪﻗﻪﺕ ﻳﻮﻗﻠﯘﻗﺘﯩﻦ ﺑﺎﺭﻟﯩﻘﻘﺎ ﻛﻪﻟﮕﻪﻥ ﻳﺎﻛﻰ ھېچنەرسە ﻳﯧﺰﯨﻠﻤﯩﻐﺎﻥ ﺋﺎﻕ ﻗﻪﻏﻪﺯ ﺋﻪﻣﻪﺱ، ﺑﻪﻟﻜﻰ ﺋﯩﭙﺘﯩﺪﺍﺋﯩﻲ ﺋﯩﻨﺴﺎﻧﻼﺭﻧﯩﯔ ھۈﺟﻪﻳﺮﻩ ﺋﯧﺮﺳﯩﻴﻪﺗﻠﯩﺮﻯ ﺋﺎﺳﺎﺳﯩﺪﺍ ﺑﺎﺭﻟﯩﻘﻘﺎ ﻛﻪﻟﮕﻪﻥ. ﭼﻮﯓ ﻣﯧﯖﯩﻤﯩﺰﻧﯩﯔ ﻣﻪﺭﻛﯩﺰﯨﻲ ﻗﯩﺴﻤﯩﺪﺍ ﺋﯩﭙﺘﯩﺪﺍﺋﯩﻲ ﺋﯩﻨﺴﺎﻧﻼﺭﻧﯩﯔ ﺧﺎﺗﯩﺮﻩ ﺋﯩﺰﻯ ﺳﺎﻗﻼﻧﻐﺎﻥ ﺑﻮﻟﯘﭖ، ﺋﯘ ﺑﯩﺰﻧﯩﯔ ھەﺭ ﺧﯩﻞ ﻗﯩﻠﻤﯩﺸﻠﯩﺮﯨﻤﯩﺰﺩﺍ، ﭘﯩﺴﺨﯩﻜﯩﻠﯩﻖ ﺋﻪﻛﺲ ﺋﻪﺗﺘﯜﺭﯨﺸﯩﻤﯩﺰﺩﻩ، ﺗﻪﭘﻪﻛﻜﯜﺭ ﻗﯘﺭﯗﻟﻤﯩﻤﯩﺰﺩﺍ ﺳﯜﺭﻩﺕ ﯞﻩ ﺧﯩﻴﺎﻟﯩﻤﯩﺰﺩﺍ ﺩﺍﺋﯩﻢ ﺋﯩﭙﺎﺩﯨﻠﯩﻨﯩﭗ ﺗﯘﺭﯨﺪﯗ. ﺑﯘ ﺋﯩﭙﺘﯩﺪﺍﺋﯩﻲ ﺗﻪﺳﯩﺮﺍﺗﻼﺭ ﺭﻩﯕﻨﻰ ﺋﯚﺯ ﺋﯩﭽﯩﮕﻪ ﺋﺎﻟﻐﺎﻥ ﺑﻮﻟﯘﭖ، ﺋﯩﻨﺴﺎﻧﻼﺭﻧﯩﯔ ھاﻳﺎﺗﻘﺎ، ﺗﻪﺑﯩﺌﻪﺗﻜﻪ، ﻣﻪﺩﻩﻧﯩﻴﻪﺗﻜﻪ ﺑﻮﻟﻐﺎﻥ ھېس-ﺗﯘﻳﻐﯘﻟﯩﺮﻯ ﺑﯩﻠﻪﻥ ﺩﻩﯞﺭﮔﻪ ﺋﻪﮔﯩﺸﯩﭗ، ﺭﻩﯓ ﺑﯩﻠﻪﻥ ﭼﯩﯔ ﺑﺎﻏﻠﯩﻨﯩﭗ ﻛﻪﺗﻜﻪﻥ ﺑﻮﻟﯩﺪﯗ». ﺑﯩﺰ ﻛﯜﻧﺪﯨﻠﯩﻚ ﺗﯘﺭﻣﯘﺷﯩﻤﯩﺰﺩﺍ ﺑﻪﺯﻯ ﺭﻩﯕﻠﻪﺭﻧﻰ ﻳﺎﺧﺸﻰ ﻛﯚﺭﯨﻤﯩﺰ، ﺑﻪﺯﻯ ﺭﻩﯕﻠﻪﺭﻧﻰ ﻳﺎﺧﺸﻰ ﻛﯚﺭﻣﻪﻳﻤﯩﺰ. ﺑﯘﻧﯩﯔ ﻧﯧﻤﻪ ﺋﯜﭼﯜﻥ ﺷﯘﻧﺪﺍﻗﻠﯩﻐﯩﻨﻰ ﺋﺎﺳﺎﻧﻠﯩﻘﭽﻪ ﺑﯩﻠﻪﻟﻤﻪﻳﻤﯩﺰ، ﺑﯘﻣﯘ ﺑﯩﺰﮔﻪ ﻧﯩﺴﺒﻪﺗﻪﻥ ﺑﯩﺮ ﺳﯩﺮﺩﯨﻦ ﺋﯩﺒﺎﺭﻩﺕ .

ﺗﯧﺨﯩﻤﯘ ﺋﯧﻨﯩﻘﺮﺍﻕ ﻗﯩﻠﯩﭗ ﺋﯧﻴﺘﻘﺎﻧﺪﺍ، ﺷﯘﻧﻰ ﺑﯩﻠﯩﺶ ﻛﯧﺮﻩﻛﻜﻰ، «ﺭﻩﯓ-ﺑﯩﺰﻧﯩﯔ ﺗﯧﻨﯩﻤﯩﺰﺩﯨﻜﻰ ﻓﯩﺰﯨﺌﻮﻟﻮﮔﯩﻴﯩﻠﯩﻚ، ﻓﯩﺰﯨﻜﯩﻠﯩﻖ ﺟﻪﺭﻳﺎﻧﻼﺭﻏﺎ ﺋﺎﺳﺎﺳﻪﻥ ﺑﯩﺰﻧﯩﯔ ﭘﯩﺴﺨﯩﻜﯩﻤﯩﺰ ﺑﯩﻠﻪﻥ ﭼﻪﻣﺒﻪﺭچاﺱ ﺑﺎﻏﻼﻧﻐﺎﻥ ﺑﻮﻟﯩﺪﯗ». ﺭﻩﯓ ﺋﻪﻧﻪ ﺷﯘﻧﺪﺍﻕ ﺑﯩﺮ ﺳﯩﺮﻟﯩﻖ ﻧﻪﺭﺳﯩﺪﯗﺭ. ﺩﯦﻤﻪﻙ، ﻳﯘﻗﯘﺭﻗﯩﻼﺭﻧﻰ ﺧﯘﻻﺳﻪ ﻗﯩﻠﯩﺪﯨﻐﺎﻥ ﺑﻮﻟﺴﺎﻕ، ﺋﯘﻳﻐﯘﺭ ﺗﯩﻠﯩﺪﯨﻜﻰ ﺭﻩﯓ، ﺳﯩﺮ، ﺳﯩﺮﻟﯩﻖ، سېھىرﮔﻪﺭﻟﯩﻚ ﺩﯦﮕﻪﻥ ﺳﯚﺯﻧﯩﯔ ﻣﯘﺋﻪﻳﻴﻪﻥ ﺋﯩﭽﻜﻰ ﺑﺎﻏﻠﯩﻨﯩﺸﻠﯩﻘﻘﺎ ﺋﯩﮕﻪ ﺋﯩﻜﻪﻧﻠﯩﻜﯩﻤﯩﺰﻧﻰ ﻛﯚﺭﯛﯞﺍﻻﻻﻳﻤﯩﺰ .

ﻣﻪﻧﺒﻪ : «ﻣﯩﺮﺍﺱ» ﮊﻭﺭﻧﯩﻠﻰ 2005-ﻳﯩﻠﻠﯩﻖ 3-ﺳﺎﻧﯩﺪﯨﻦ ﺋﯧﻠﯩﻨﺪﻯ.

توردىكى مەنبەسى: ئىزدىنىش مۇنبىرى