دۇنيادىكى داڭلىق تەنتەربىيە ماركىلىرى !!~ ( نايىل )

nayil

       ئەسسالامۇ - ئەلەيكۇم !!!~


   


    دۇنيادا تەنتەربىيە ساھەسىدە ئىشلىتىلىۋاتقان ماركىلار ئىنتايىن كۆپ . بۇلار تەنتەربىيە ساھەسىنىڭ ھەر قايسى تۈرلىرىدە ئۆزىنىڭ سۈپىتىنىڭ ياخشىلىقى ، شۇ تۈرگە ماسلىشىشچانلىقىنىڭ يۇقىرى بولۇشى بىلەن يۇقىرى ئورۇن تۇتۇپ كەلدى . ئىشلىنىشىنىڭ سىپتىلىقى ، ئازادە ۋە بەدەنگە يېقىشلىقى ، يارىشىملىق ۋە سۈپىتىنىڭ ياخىشلىقى بىلەن پۈتۈن دۇنيادىكى نۇرغۇنلىغان كىشىلەرنىڭ ئالدىن تاللاش نىشانىغا ئايلاندى . مەن تۆۋەندە بۇ تەنتەربىيە ماركىلىرى ئىچىدىكى دۇنيادىكى ئالدىنقى قاتاردا تۇرىدىغان داڭلىق پۇتبول ماركىلىرىنى تونۇشتۇرۇپ ئۆتىمەن !!~
   


    1  .  ئادىداس    (  adidas  )


   


   ئادىداس ( adidas ) ماركىسىنى ياراتقۇچى ئادولېف ئادى داسلېر بولۇپ ، ئۇ گىرمانىيىلىك بىر تەنھەرىكەتچى شۇنداقلا ئۇستا ئاياق تىككۈچى ( موزدۇز ) . شۇ سەۋەبتىن ئۇ تەنھەرىكەتچىلەرنىڭ ئېھتىياجىنى چوڭقۇر چۈشىنىدۇ . بۇنىڭغا ئۇنىڭ ماھىر قول ھۆنەرۋەنچىلىكى ۋە لاھىيىلەش ئىقتىدارى قوشۇلۇپ ئۇنىڭ ھاياتىدىكى 700 دىن ئوشۇق تەنھەرىكەتكە مۇناسىۋەتلىك بۇيۇملارنى كەشىپ قىلىشى ۋە پاتېنىت ھوقۇقىغا ئرىشىشتەك ، شۇنداقلا ‹‹ ئادىداس شاھلىقى ›› نى قۇرۇپ چىقىشتەك يۈكسەك نەتىجىلەرنىڭ ساھىبى بولدى . داسلېر ئەپەندى 1920-يىلىدىن باشلاپ قولدا تىكىلگەن تەنھەرىكەت ئاياقلىرىنى بازارغا سالغان . شۇندىن كېيىن دۇنيانىڭ ھەر قايسى جايلىرىدىكى تەنھەرىكەتچىلەرنىڭ دېسلېر ئەپەندىنىڭ قولىدىن چىققان سۈپەتلىك تەنھەرىكەت ئاياقلىرىنى كىيىپ ئولىمپىك تەنھەرىكەت يىغىنلىرىدا شانلىق نەتىجىلەرنى يارىتىشى بىلەن دېسلېر ئەپەندىنىڭ داڭقى چىقىپ كەتكەن . شۇنداقلا ئۇنىڭ ئىسمى تەنھەرىكەت ساھەسىدە يۇقىرى ئورۇنغا ئىگە بولغان .


   


    1972 -يىلى ئادىداس ماركىسىدىكى تەنھەرىكەت كىيىملىرى ‹‹ ئۈچ يوپۇرماق ›› شەكلىدىكى ماركا بىلەن بازارغا سېلىنغان ۋە كەڭ كۆلەمدە ئىشلىتىلىشكە باشلىغان . ئادىداس ماركىسىنىڭ تونۇلۇشى ۋە كەڭ دائىرىدە تارقىلىشىدا داسلېر ئەپەندىنىڭ چوڭ ئوغلى خورست داسلېرنىڭ تۆھپىسى ئەڭ ئاساسلىق ئورۇندا تۇرىدۇ . خورست داسلېر سېتىش پائالىيەتلىرى ۋە ماركا ئوبرازىنىڭ موھىملىقىنى تونۇپ يېتىپ ، بۇ جەھەتتە ئۆزى قول سېلىپ ئىشلەشكە كىرىشكەن . 1956-يىلىدىكى موربېن ئولىمپىك تەنھەرىكەت يىغىنىدا ئادىداس ماركىسىدىكى مەھسۇلاتلارنى تونۇشتۇرۇش ، كېڭەيتىش ۋە سېتىش يەرمەنكىسى ئۆتكۈزۈپ ، ھازىرقى زامان تەنھەرىكەت بۇيۇملىرى ساھەسدىكى يېڭى بىر بۆسۈشنى قولغا كەلتۈرگەن . يەنى دۇنيانىڭ ھەر قايسى جايلىرىغا كەڭ تارقىتىشتا ئۈنۈم ھاسىل قىلغان . سودا تورىنىڭ پۈتۈن دۇنياغا كېڭىيىشى بىلەن دۇنيانىڭ ھەر قايسى جايلىرىغا سېتىش ئورۇنلىرىنى تەسىس قىلغان . شۇنىڭ بىلەن ئادىداس ماركىسى پۈتۈن دۇنياغا تونۇلۇپ كەتكەن . تەنھەرىكەت ماركىلىرى ئىچىدە ئادىداس ماركىسى ئالاھىدە ئورۇن تۇتۇپ كەلدى ، كىشىلەر تەرىپىدىن بولسا ‹‹ غەلبە ئۈچ سىزىقى ›› دەپ تەرىپلەنگەن . 1948-يىلىدىن باشلاپ ھازىرغىچە ، ئادىداس ماركىسى تەنھەرىكەت ساھەسىدە شانلىق نەتىجىلەرنىڭ ساھىبلىرىغا ئىزچىل ئەڭ ياخشى ھەمراھ ۋە ھەمكارداش بولۇپ كەلدى . ئادىداس ماركىسىنىڭ پۇتبول تەنھەرىكىتىدە تۇتقان ئورنى باشقا ماركىلارغا قارىغاندا ئەڭ يۇقىرى سالماقنى ئىگىلەيدۇ .

   ئادىداس (  adidas ) ماركا ئىسمى 1948-يىلى قويۇلغان بولۇپ ، ئادولېف داسلېرنىڭ ئسىم فامىلىسىنىڭ قىسقارتىلمىسى ئېلىنغان . يەنى ئادولېفنىڭ قىسقارتىلام ئىسمى ئادى ( adi ) بولۇپ ، فامىلىسىنىڭ باشلىنىشىدىكى داس ( das ) ھەرىپى قوشۇلۇپ بۇ ماركا ئىسمىنى بارلىققا كەلتۈرگەن .

   ئادىداس ماركىسىنىڭ ھازىرقى تەنتەربىيە ساھەسىدىكى تۇتقان ئورنىنى ھېچقانداق بىر تەنتەربىيە ماركىسى باسالمايدۇ . بولۇپمۇ پۇتبول تۈرىدە ! چۈنكى ، ئادىداس شېركىتى پۇتبولچىلارغا خاس بولغان چەم ئاستىدا ناھالى بولغان پۇتبول ئايىقىنى كەشىپ قىلغاندىن باشلاپ پۇتبول تەنھەرىكەتچىلىرىنىڭ قىزغىن قوللىشىغا ۋە ياقتۇرىشىغا ئېرىشكەن . 1974-يىلى غەربى گىرمانىيىدە ئۆتكۈزۈلگەن دۇنيا لوڭقىسى مۇسابىقىسىگە قاتناشقان ھەر قايسى دۆلەت پۇتبول ماھىرلىرىنىڭ %80 تىن كۆپرەكى ئادىداس ماركىسىدىكى پۇتبول ئايىقىنى كىيىپ ، ئادىداس ماركىسىنىڭ شۆھرىتىنى يەنىمۇ بىر بالداق كۆتۈرۈۋەتكەن .

   ئادىداس ماركىسىدىكى توپ 1970-يىلىدىكى دۇنيا لوڭقىسى مۇسابىقىسىدىن باشلاپ خەلىقئارا پۇتبولچىلار بىرلەشمىسى ئورگىنى ھەمكارلىشىپ كېلىۋاتقان ماركىغا ئايلانغان ، شۇنداقلا ھەر بىر نۆۋەتلىك دۇنيا لوڭقىسى مۇسابىقسىدە بۇ ماركىدىكى توپ ئىشلىتىلىپ كەلمەكتە .

   ھازىرغىچە ئادىداس ماركىسى ھەر قايسى دۆلەت ۋە كۇلۇبلار بىلەن زىچ ھەمكارلىق مۇناسىۋېتىنى ساقلاپ كەلمەكتە . دۆلەت كوماندىلىرىدىن ؛ گىرمانىيە ، دانىيە، شىۋىتسىيە، ۋېنگىرىيە ، نېگىرىيە ، ئارگېنتىنا ، ئىسپانىيە ، فىرانسىيە ،  ياپونىيە ، ۋېلىش، شىمالىي ئېرلاندىيە قاتارلىق دۆلەتلەر ... ، كۇلۇبلاردىن  بولسا ؛ چېلسى ، بايرېن مىيۇنخېن ، مارسېل ، خانلىق مادرىد ، مانچىستىر بىرلەشمىسى،  لىۋېرپول ، بېنفىكا ، مىلان ............... قاتارلىقلار .
   



    2 .  نايىك  (  Nike  )


   


     نايىك ( Nike ) شېركىتى 1972-يىلى ئامېرىكىدا قۇرۇلغان . شېركەتنىڭ يېلتىزى بولسا ھازىرقى نايىك ( Nike ) شېركىتىنىڭ لېدىرى پېلكنايت بىلەن بېل باۋېرمان تېرىنىرنىڭ شېرىك مەبلەغ سېلىشى بىلەن قۇرۇلغان ‹‹ كۆك بەلباغ ›› تەنتەربىيە شېركىتى بولۇپ ، تەنھەرىكەت كىيىملىرى ، تەنھەرىكەت ئاياقلىرى ۋە تەنھەرىكەت ئۈسكۈنىلىرى قاتارلىق تىجارەت تۈرلىرى بار .

   نايىك ( Nike ) شىركىتى قۇرۇلغاندىن باشلاپ دەسلەپكى يېلتىز شېركەت ‹‹ كۆك بەلباغ ›› تەنتەربىيە شېركىتىنىڭ ئىزىنى بويلاپ تەنھەرىكەت كىيىملىرى ، تەنھەرىكەت ئاياقلىرى ۋە تەنھەرىكەت ئۈسكۈنىلىرى جەھەتتە داۋاملىق تىرىشىپ ھازىرقى دۇنياغا تونۇلغان داڭلىق تەنتەربىيە ماركىسى شۇنداقلا داڭدار تەنتەربىيە شېركىتى بولۇپ قالدى . نايىك ماركىسى تەنتەربىيە تۈرلىرىنىڭ ھەر قايسى قاتلاملىرىغا سىڭىپ كىرىپ ، ئۆزىنىڭ مەھسۇلات سۈپىتى ۋە ئىشەنچىلىكلىكى بىلەن كەڭ تەنھەرىكەتچىلەر ۋە خەلق ئاممىسىنىڭ ياقتۇرىشىغا ئېرىشكەن داڭلىق ئىشەنچلىك مەھسۇلاتقا ئايلاندى .

    شېركەت قۇرغۇچىسى بېل باۋېرمان ئەپەندىنىڭ بىر ئېغىز سۆزى نايىك شېركىتىنىڭ مىزانى بولۇپ كەلدى ، ئۇ بولسىمۇ : ‹‹ ئەتراپىمىزدىكى ھەر بىر كىشى تەنھەرىكەتچىدۇر ، دۇنيادا تەنھەرىكەتچى مەۋجۈت بولسىلا ، نايىك شېركىتىمىز داۋاملىق تەرەققى قىلىدۇ ۋە يۈكسىلىدۇ ! ›› دىگەن سۆزى ئىدى .

   نايىك ( NIKE ) دىگەن بۇ ئىسىم غەرىپلىكلەر نەزىرىدە ئىنتايىن خەيرىلىك بىر ئىسىم بولۇپ ، بۇ ماركا ‹‹ قەدىمىي گىرىتسىيە غالبىيەت ئايال ئىلاھىنىڭ قانات پېيى ›› گە ۋەكىللىك قىلىدۇ . ئۇندىن باشقا بۇ ماركا سۈرئەت ، ھېسىيات ۋە ئەۋرىشىملىكنى ئىپادىلەيدۇ .

   نايىك ( NIKE ) شېركىتى 2001-يىلى ھاۋا ئۆتكۈزۈشچان تەگلىك تېخنىكىسىنى ، شۇنداقلا تەۋرىنىشكە قارشى تۇرۇش تېخنىكىسىنى تەتقىق قىلىپ ياساپ چىقىپ زور ئالقىشقا ئېرىشكەن . ئۇندىن باشقا بۇ ماركىدىكى كىيىم -كېچەكلەر پۈتۈن تەنتەربىيە ساھەسىدە شۇنداقلا پۈتۈن ياشلار ئارىسىدا كەڭ تارقالغان . بۇ ماركىدىكى تەنھەرىكەت كىيىملىرىنىڭ سۈپىتىنىڭ ياخشىلىقى ، شەكلىنىڭ كۆركەم لاھىيىلىنىشى ۋە يېڭىلىنىپ تۇرۇشى بىلەن داۋاملىق قىززىق نوقتا بولۇپ كەلمەكتە .



   3 .  پۇما ‹‹ جەنۇبى ئامرىكا شىرى ››   ( PUMA  )


   


   پۇما ( PUMA ) ماركىسى دۇنياغا داڭلىق تەنتەربىيە بۇيۇملىرى ماركىسى ھېسابلىنىدۇ . پۇما ( PUMA ) نىڭ مەنىسى ‹‹ جەنۇبى ئامرىكا شىرى ›› دىگەن سۆز بولۇپ ، بۇ ماركىدىكى شېركەت 1948-يىلى گىرمانىيىدە قۇرۇلغان . قۇرغۇچىسى بولسا رادولېف داسلېر .

   بەلكىم مۇنبەرداشلىرىمىز بۇ ئىسىمنى ئادىداس شېركىتىنىڭ قۇرغۇچىسىغا ئوخشىتىۋاتقان بولۇشى مۆمكىن ، شۇنداق ، بۇ ئىككىسى ئاكا-ئۇكىلار . 1924-يىلى رادولېف داسلېر ئىنىسى ئادولېف داسلېر بىلەن بىرلىشىپ ‹‹ داسلېر ئاكا-.ئۇكىلار شېركىتى ›› نى قۇرغان . 1930-يىلىغا كەلگەندە بۇ ئاكا-ئۇكىلار شېركىتى يۈزگە يېقىن ئىشچى -خىزمەتچىسى بار بولغان ، 30 نەچچە خىل تەنھەرىكەت ئايىقى ئىشلەپچىقىرىدىغان داڭلىق كارخانىغا ئايلانغان . بۇ ئىككى ئاكا-ئۇكا قانداق قىلىپ ئايرىم ماركىلارنى تۇتۇشنى قارار قىلغان دەپ سورىشىڭىز مۆمكىن . مەن يۇقىرىدا ئادىداس ماركا ئىسمى ئۈستىدە توختالغانىدىم ، بۇ توغرىسىدا يەنە بىر تولۇقلىما بېرىشنى لايىق تاپتىم .
   ئادىداس (  adidas ) ماركا ئىسمى 1948-يىلى قويۇلغان بولۇپ ، ئادولېف داسلېرنىڭ ئسىم فامىلىسىنىڭ قىسقارتىلمىسى ئېلىنغان . يەنى ئادولېفنىڭ قىسقارتىلما ئىسمى ئادى ( adi ) بولۇپ ، فامىلىسىنىڭ باشلىنىشىدىكى داس ( das ) ھەرىپى قوشۇلۇپ بۇ ماركا ئىسمىنى بارلىققا كەلتۈرگەن .

   بۇنىڭدىن نېمىنى ھېس قىلدىڭىز ؟؟ شۇنداق ، بۇ ئاكا -ئۇكىلار دەل مۇشۇ ماركا ئىسمىنىڭ قويۇلۇش ئىشى بىلەن ئايرىلىپ كەتكەن . چۈنكى يۇقىرىدا دىيىلگەندەك ئادىداس ماركا ئىسمى پەقەت ئىنىسى ئادولېف داسلېرنىڭ ئىسمى بىلەن قويۇلغان بولغاچقا بۇ ئىككى ئاكا-ئۇكىنىڭ ئايرىلىپ كېتىشىنى كەلتۈرۈپ چىقارغان .

   1948-يىلى رادولېف داسلېر ئىنىسى بىلەن بولغان ھەمكارلىقتىن چېكىنىپ چىقىپ PUMA شېركىتىنى قۇرغان . بۇ شېركەتمۇ ئادىداس شېركىتى بىلەن ئوخشاش مەھسۇلات ئىشلەيدىغان شېركەت بولغاچقا ، بۇ ئىككى ئاكا-ئۇكىلارنىڭ رىقابىتى تېخىمۇ كەسكىنلەشكەن .

   PUMA شېركىتى 1986-يىلى مىيۇنخېن ۋە فىرانكىفورت پاي بازىرىغا قوشۇلغان . ھازىر بۇ شېركەت 3200 نەپەر ئىشچى -خىزمەتچىسى بار بولغان ، شۇنداقلا زور مەبلەغقە ئىگە دۇنياۋى كارخانىغا ئايلانغان .

   PUMA ماركىسى 1998-يىلىدىن 2003-يىلىغىچە ، سېتىلىش مىقدارى ۋە ئۈنۈم يارىتىش جەھەتتە دۇنيادىكى تەنتەربىيە كىيىم-كېچەك تۈرلىرى ئىچىدە ئەڭ يۇقىرى پەللىسىنى ياراتقان . كىشىنى ئەڭ ھەيران قالدۇرىدىغىنى 2002-يىلىدىكى ئېلانغا سەرىپ قىلغان چىقىمى 120 مىليۇن ئامرىكا دوللىرىدىن ئېشىپ كەتكەن . 67 يىللىق تارىخقا ئىگە بۇ ماركا پۈتۈن دۇنيانىڭ ھەر قايسى جايلىرىغا تارقىلىپ ، تەنھەرىكەتچىلەر شۇنداقلا ھەر بىر ياشلارنىڭ ياقتۇرۇپ ئىشلىتىشىگە مۇيەسسەر بولۇۋاتقان داڭلىق ماركا ئوبرازىنى تىكلىگەن .



   4 . لوتتو   (  LOTTO  )


   


   لوتتو ( LOTTO ) ماركىسى دۇنيادىكى 10 داڭلىق پۇتبول ئايىقى ماركىسى قاتاردىكى داڭلىق ماركا ، شۇنداقلا پۈتۈن دۇنياغا داڭلىق بولغان تەنتەربىيە ماركىسى ھېسابلىنىدۇ .

   لوتتو ( LOTTO ) شېركىتى 1973-يىلى ئىتالىيەدە قۇرۇلغان . شېركەت قۇرۇلۇپ دەسلەپكى ۋاقىتلاردا پۈتۈن زېھنىنى تېنىس توپ تۈرىگە قاراتقان بولۇپ ، شۇ مەزگىللەردە لوتتو ماركىسىنى كۆرگەن ھەر بىر كىشىنىڭ ئېسىگە دەماللىققا تېنىس توپ ئايىقى ۋە تېنىس توپ كىيىمى كېلەتتى . كېيىنچە بۇ شېركەت نىشانىنى دۇنيادىكى بىرىنچى تەنھەرىكەت تۈرى بولغان پۇتبولغا قاراتقان بولۇپ ، چىملىق ئەركىلىرىگە پۇتبول كىيىمى ۋە پۇتبول ئاياقلىرى بىلەن تەمىنلەشنى باشلىغان . بۇ ماركا دەسلەپتە ئىتالىيەدىكى ھەر بىر پۇتبولچى شۇنداقلا رېپىرلارنىڭ بىرىنچى تاللىشى بولۇپ قالغان .

   لوتتو ( LOTTO ) ماركىسى بەش قىتئەدىكى 80 دىن ئارتۇق دۆلەتلەردە سېتىش نوقتىسى تەسىس قىلغان بولۇپ ، بۇ سان ھازىرغىچە داۋاملىق ئېشىپ بارماقتا .
   لوتتو ( LOTTO ) ماركىسى ھازىرغىچە پۇتبول ساھەسىدە موھىم ئورۇن تۇتۇپ كەلمەكتە . سۈپىتىنىڭ ئېسىللىقى ، ماركا تەسىر كۈچى ۋە مەبلەغ سېلىنمىسى جەھەتتە ياۋروپادا جۈملىدىن پۈتۈن دۇنيادا ھەر قانداق بىر تەنتەربىيە ماركىسىدىن تۆۋەن تۇرۇپ باققان ئەمەس . بولۇپمۇ ياۋروپادىكى تەسىر كۈچى ئالاھىدە ئورۇننى تۇتىدۇ .

   بۇ ماركا بۇندىن بۇرۇن يۇۋېنتۇس ، مىلان ، ئىتالىيە دۆلەت كوماندىسى ، كىرودىيە دۆلەت كوماندىسى ، گوللاندىيە دۆلەت كوماندىسى ، فىلورېنتىنا ، ئۇدىنېس ، پالېرمو قاتارلىق دۆلەت كوماندىسى ۋە كۇلۇبلار بىلەن ھەمكارلاشقان .

   دۆلىتىمىز تەنتەربىيە بۇيۇملىرى جەھەتتە ئالدىنقى ئورۇندا تۇرىدىغان لىنىڭ ماركىسى لوتتو ماركىسى بىلەن ھەمكارلشقان بولۇپ ، 1 مىليارد شاڭگاڭ پۇلى سەرىپ قىلىپ جوڭگۇدىكى 20 يىللىق سودا ھوقۇقىغا ئېرىشكەن . لوتتو شېركىتىنىڭ تېخىنىكا ۋە سۈپەت جەھەتتىكى ئارتۇقچىلىقلىرى لىنىڭ ماركىسىغا زور ئاكتىپ تەسىرلەرنى كۆرسەتكەن . بۇ ئارقىلىق لىنىڭ ماركىسى جوڭگۇغا كەڭ تارقالغاندىن باشقا دۇنيانىڭ ھەر قايسى جايلىرىغا تارقىلىشقا باشلىغان .
   



   5 . ئۇمبىرو  ( UMBRO )


   


   ئۇمبىرو ( UMBRO ) ، دۇنياغا داڭلىق ئون چوڭ پۇتبول ئايىقى ماركىسىنىڭ بىرى ھېسابلىنىدۇ . UMBRO شېركىتى 1924-يىلى ئەنگىلىيەدە قۇرۇلغان بولۇپ ، دۇنيادىكى بىر قەدەر كۆلەملەشكەن تەنھەرىكەت كىيىمى ۋە ئاياقلىرى ئىشلەپچىقىرىش بازىسى ھېسابلىنىدۇ .

   91 يىللىق تارىخقا ئىگە بولغان بۇ داڭلىق تەنھەرىكەت بۇيۇملىرى شېركىتى 1924-يىلى خومپېرى ئاكا-ئۇكىلار تەرىپىدىن قۇرۇلغان بولۇپ ، ئەنگىلىيەدىكى ئەڭ چوڭ پۇتبول كىيىمى ئىشلەپچىرىش بازىسى . خومپېرى ئاكا-ئۇكىلارنىڭ ئېنگىلىزچە ئىسمىدىكى ( HUMPHREY BROTHERS ) بەش ھەرىپتىن UMBRO سۆزىنى تۈزۈپ چىققان ۋە ماركا ئىسمى قىلىپ ئەنگە ئالدۇرغان .

   UMBRO شېركىتىنىڭ يېتىلىش تارىخىغا قارايدىغان بولساق ، نۇرغۇنلىغان زەردار كوماندىلارنىڭ دۇنيا لوڭقىسىدىكى ئالاھىدە نەتىجىلىرىگە ھەمراھ بولۇپ كەلگەن . بۇلارنىڭ ئىچىدە 1958-يىللىق دۇنيا لوڭقىسى ۋە 1962-يىللىق دۇنيا لوڭقىسى چىمپىيۇنى بولغان بىرازىلىيە دۆلەرت كوماندىسى ، 1966-يىللىق دۇنيا لوڭقىسى چىمپىيۇنى ئېنگىلاند كوماندىسى قاتارلىقلار بار . تىلغا ئېلىشقا ئەرزىيدىغىنى شۇكى ، 1966-يىللىق دۇنيا لوڭقىسى پۇتبول مۇسابىقسدىكى 16 كۈچلۈك قاتارىغا كىرگەن 15 كوماندا كىيىمى UMBRO ماركىسىدىكى پۇتبول كىيىمى ئىدى . بۇ 91 يىللىق تارىخقا ئىگە داڭلىق شېركەت پۇتبول مەھسۇلاتلىرىنىڭ تولۇق بولۇشى بىلەن ھەممىنى ئۆزىگە جەلىپ قىلىپ كەلدى ، شۇنداقلا ھەر بىر پۇتبولچىنىڭ پۇتبول تارىخىغا ياخشى ھەمكارداش ۋە ئەسلىمىسىگە ياخشى ھەمراھ بولۇپ كەلدى .

   ھازىرغىچە ، ئېرلاندىيە دۆلەت پۇتبول كوماندىسى ،   نورۋېگىيە دۆلەت كوماندىسى ، كانادا دۆلەت كوماندىسى ، پېرو دۆلەت كوماندىسى  قاتارلىق دۆلەت كوماندىلىرى بىلەن ھەمكارلىشىپ كېلىۋاتىدۇ . ئۇندىن باشقا ئېنگىلاند دەرىجىدىن تاشقىرى بىرلەشمىسىدىكى مانچىستېر شەھىرى كۇلۇبى ، ساندېرلاند كۇلۇبى ، بلاكبورن كۇلۇبى ، غەربى بىرومۋېچ كۇلۇبى قاتارلىقلار بىلەن ، ئىسپانىيە بىرلەشمىسىدىكى بېرباخ رىقابەت كۇلۇبى بىلەن ، شوتلاندىيە بىرلەشمىسدىكى گىلاسكوۋ سەرگەردانلار كۇلۇبى بىلەن ، روسىيە بىرلەشمىسىدىكى قازان قىزىل ياقۇت كۇلۇبى ۋە موسكىۋا دىنامو كۇلۇبى بىلەن ، بىرازىلىيە بىرلەشمىسىدە سانتوس كۇلۇبى ۋە بالانا كۇلۇبى قاتارلىقلار بىلەن ھەمكارلىشىپ كەلمەكتە .

   بۇ ماركىنىڭ ئوبراز ۋەكىللىرى بولسا ھەممىزگە تونۇشلۇق بولغان پۇتبول چولپانلىرىدىن مايكول ئوۋېن ، يوھان تېررى ، باررى فېرگوسون ، دېكو قاتارلىقلار بار .
   2008-يىلى دۇنيادىكى ئەڭ چوڭ تەنتەربىيە بۇيۇملىرى شېركىتى نايىك ( NIKE ) شېركىتى 285 مىليۇن فوندستېرلىڭلىق باھا بىلەن ئەنگىلىيەنىڭ داڭلىق تەنتەربىيە مەھسۇلاتلىرى ئىشلەپچىقىرىش بازىسى بولغان UMBRO شېركىتىنى قوشۇۋالدى .

   2012-يىلى 12-ئاينىڭ 14-كۈنى 225 مىليۇن دوللارلىق باھا بىلەن Iconix گۇرۇھىغا سېتىۋەتتى .

   2013-يىلى 5-ئاينىڭ 13-كۈنى نايىك ( NIKE ) شېركىتى ئېنگىلاند دۆلەت كوماندىسىنىڭ كىيىمىنىڭ UMBRO ماركىسى بىلەن خوشلاشقانلىقىنى ، بۇنىڭ پەقەت بىر تارىخقا ئايلانغانلىقىنى ئېلان قىلدى .



   6 . كاپپا  (  KAPPA  )


   


   كاپپا ( KAPPA ) خەلىقئارادا بەلگىلىك تەسىر قوزغىغان ۋە نام قازانغان ، 18 ياشتىن 35 ياشقىچە بولغان ياشلارنىڭ ئەڭ قارشى ئېلىشىغا مۇيەسسەر بولۇپ كېلىۋاتقان دۇنياغا داڭلىق تەنتەربىيە ماركىسىنىڭ بىرى .

   KAPPA شېركىتى 1916-يىلى ئىتالىيەنىڭ غەربى شىمالىدىكى تورېندا قۇرۇلغان ئىتالىيەنىڭ داڭلىق تەنتەربىيە كىيىم-كېچەك شېركىتى ھېسابلىنىدۇ . بۇ شېركەتنىڭ ئاساسى m.c.t. نامىدىكى كىچىك بىر شېركەت بولۇپ ، تولۇق ئاتىلىشى societa anonima calzificio torinese  .

   1993-يىلى KAPPA شېركىتى basic properties ناملىق داڭلىق پۇل -مۇئامىلە گۇرۇھى تەرىپىدىن سېتىۋېلىنغان بولۇپ ، بۇ گۇرۇھنىڭ كۆپلەپ مەبلەغ سېلىشى ۋە داڭلىق كىيىم -كېچەك ماركىسى benetton نىڭ قوللىشى ئاستىدا ، ياۋروپا ،شۇنداقلا دۇنياغا داڭلىق بولغان شەخسلەرنىڭ ئەڭ ياقتۇرۇپ ئىشلىتىدىغان ماركىسىغا ئايلانغان . بۇ ماركىدىكى كىيىم -كېچەكلەر تا ھازىرغىچە ياۋروپادىكى شەخىسلەرنىڭ ئەڭ قوللىشىغا ئېرىشىۋاتقان ماركا بولۇپ كەلمەكتە .

   1999-يىلى 2-ئاينىڭ 9-كۈنى ،  KAPPA ماركىسى ئىتالىيە دۆلەت كوماندىسى بىلەن رەسمىي ھەمكارلىق كېلىشىمى ئىمزالاپ ، پۈتۈن دۇنيادىكى ماركا تەسىرىنى تېخىمۇ نامايان قىلغان .

   KAPPA ماركىسى LOGO نىڭ بارلىققا كېلىشى

   1969-يىلى بىر جۈپ مودىل قىز-يىگىت رېپىتىستىن كېيىن بىر-بىرسىگە يۆلىنىپ ئولتۇرۇپ ئارام ئېلىۋاتقان رەسىمى مەلۇم فوتۇگراف تەرىپىدىن تارتىۋېلىنغان . كېيىنچە بۇ رەسىم ھازىرقى KAPPA ماركىسىنىڭ LOGO رەسىمى بولۇپ قالغان . بۇ رومانتىكىلىققا تولغان بىر جۈپ ياشنىڭ رەسىمى تا ھازىرغىچە ئىشلىتىلىپ كەلمەكتە . KAPPA شېركىتىنىڭ بۇ رەسىمنى تاللىشى بولسا ، قىز-يىگىتلەرنىڭ ھەممىسى تەنتەربىيەدىن ھوزۇر ئېلىشى ۋە شادلىنىشى ئۈچۈن دىگەن مەنىنى بىلدۈرىدىكەن .

   KAPPA ماركىسى 20 ئەسىرنىڭ 50 يىللىرىنىڭ ئاخىرىدا ئىتالىيىدە داڭلىق تەنتەربىيە كىيىم - كېچەك ماركىسىغا ئايلانغان . 20 ئەسىرنىڭ 60 - ۋە 70-يىللىرىنىڭ ئارخىرىغىچە پۈتكۈل ياۋروپادا ھەممىگە تونۇشلۇق داڭلىق ماركىغا ئايلانغان .

   KAPPA ماركىسىدىكى كىيىم -كېچەكلەر ۋە ئاياقلارنىڭ لاھىيىلىنىشى يېڭى دەۋىر مودا ئېقىمىغا ماسلاشقان ، ئەركىن -ئازادىلىكنى ئاساس قىلغان بولۇپ ، ھازىرغىچە دۇنيا ياشلىرىنىڭ تاللىشىغا نائىل بولۇپ كەلمەكتە .



   7 . دىيادورا  (  DIADORA  )


   


   DIADORA شېركىتى 1948-يىلى ئىتالىيەنىڭ موتېبېللو دىگەن يېرىدە قۇرۇلغان . ئەڭ دەسلەپتە بۇ ماركا دالا ئاياقلىرى ۋە قار تېيىلىش بۇيۇملىرىنى ئىشلەپچىقىرىش بىلەن باشلانغان . كېيىنچە تېخمۇ كەڭ دائىرىدە تەرەققىي قىلىپ پۇتبول ، ۋېلىسپىت تەنھەرىكىتى ، يېنىك ئاتلىتكا قاتارلىق تۈرلەردە ئۆزىنى نامايان قىلغان .

   DIADORA سۆزىنىڭ مەنبەسى گىرىكچە سۆزدىن كەلگەن بولۇپ ، مەنىسى ‹‹ ئىقتىدار ۋە تالانت ›› دىگەن مەنىنى بىلدۈرىدىكەن .
  DIADORA شېركىتى 1948- يىلى ماكسېل دانېل ئىسىملىك تاشقى سودىسى بىلەن شۇغۇللىنىدىغان ياش تەرىپىدىن قۇرۇلغان بولۇپ ، بۇ ياش تاشقى سودا ساھەسىدىن چېكىنىپ چىقىپ ، بۇ ماركىدىكى ئاياق ئىشلەپچىقىرىش ساھەسىگە كىرگەن .

   1955-يىلى بۇ ماركا تاغقا ياماشقۇچىلار ئايىقىنى ئىشلەپچىقىرىش جەھەتتە ئىتالىيەدىكى بىرىنچى نومۇرلۇق تاللاش نىشانى بولۇپ قالغان .

   1965-يىلىغا كەلگەندە ماكسېل دانېل پۇرسەتنى چىڭ تۇتۇپ ، كىشىلەرنىڭ قىزىقىشىنى قوزغاۋاتقان قار تىيىلىش تۈرىگە مەنلەغ سالغان ۋە بۇ تۈردىكى قار تىيىلىش مەھسۇلاتلىرىنى بازارغا سېلىپ زور ئالقىشقا ئېرىشكەن .

   1967-يىلى ، بۇ ماركىدىكى ئاياقلار يېنىك ئاتلىتكا تۈرىگە يەنى يۈگۈرۈش ئايىقى ئىشلەپچىقىرىپ بازارغا سالغان ، شۇنىڭ بىلەن بىرلىكتە تېنىس توپ ئايىقى ئىشلەپچىقىرىپ بۇ تۈردىكى ياخشى نەتىجىلەرنى ياراتقان .

   DIADORA ماركىسى 1975-يىلىغا كەلگەندە پۇتبول تەنھەرىكىتىگە سىڭىپ كىرگەن . 1982-يىلىغا كەلگەندە ئىتالىيە دۆلەت كوماندىسى بىلەن ھەمكارلىشىپ پۇتبول ساھەسىگە كىرگەندىن بۇيانقى ئەڭ زور نەتىجىسىنى ياراتقان . شۇ يىلىدىكى دۇنيا لوڭقىسى مۇسابىقسىدىكى ئىتالىيە كوماندىسى چىمپىيۇنلۇقنى قولغا كەلتۈرۈپ ، بۇ ماركىنىڭ تەسىر دائىرىسىنى تېخىمۇ كېڭەيتىۋەتكەن .

   1990-يىلىغا كەلگەندە بۇ ماركا ئامرىكا ۋە ئاسىيا بازىرىغا كىرىپ زور ئالقىشقا ئېرىشكەن . شۇ يىلى داڭلىق پۇتبولچى ۋان باستتېن بۇ ماركىنىڭ ئوبراز ۋەكىلى بولغان .
   2000-يىلىغا كەلگەندە ، روبېرت باگگىيۇ ، ۋېئېرى ، ئىنزاگى قاتارلىق دۇنياۋى پۇتبول چولپانلىرى ئارقا ئارقىدىن بۇ ماركىدىكى پۇتبول كىيىملىرى ۋە ئاياقلىرىنىڭ ئوبراز ۋەكىلى بولغان .
   2003-يىلى ئىتالىيە بىرلەشمىسى زەردارى رىم كوماندىسى DIADORA ماركىسى بىلەن رەسمىي ھەمكارلىق توختامى تۈزگەن .

   DIADORA شېركىتى داۋاملىق تەرەققىي قىلىپ ھازىرقى تەنتەربىيە بۇيۇملىرى ئىشلەپچىقىرىش جەھەتتىكى يۇقىرى ئورۇنىنى ساقلاپ كەلمەكتە .




   

   تەنتەربىيە ماركىلىرى ئىنتايىن كۆپ ، لېكىن پۇتبول بىلەن زور دەرىجىدە باغلىنىشى بولغان يۇقىرىدىكى تەنتەربىيە ماركىلىرى ھوزۇرۇڭلارغا سۇنۇلدى . قېنى ھوزۇرلانغايسىلەر !!!~


                                                                                                                           تامام !!!!!!!!!!!!!!!!!!!!!!!!





   

مەشئەل520

رەھمەت بۇرادەر،  كۆپ ئەجىر قىلىپسىز،   نۇرغۇن بىلىمگە ئىگە بولدۇم .

دېھقان

تېمىللىرى تېتىملىق ئادەم جۇمۇ بۇ................

ئابلەتجان

فىيلا ۋە دىيادورا، جومادىن دىن ئىبارەت ئۈچ  ماركىنى قېتىۋەتسىڭىز دۇنيادىكى 10 داڭلىق تەنتەربىيە ماركىسى پۈتۈنلەي بولاتتىكەن.
پۇما بىلەن ئادىداسنىڭ باش ئىشتابى دەريانىڭ ئىككى قىرغىقىدا، ئادىداس سېتىۋاپتۇ پۇمانى...
  ئىتالىيەنىڭ ماركىلىرىدىن بىردەم پەخىرلىنىۋالاي، يۇقىرىقى ئۈچ ماركىمۇ ئىتالىيەنىڭ...

ئامرىقىم

مىنىڭ بىلدىغىنىم باشتىكى 3 ماركىكەن . راسلا مۇشۇ داڭلىق ماركىنىڭ كىيىملىرى بىر خىل پەيزى .

تەجەللى

نايىك توغرىسىدا باشقىچە گەپلەرنى ئاڭلىغان ئەسلى ئۇنداق ئەمەسكەندە ؟

بارسېلونا-

لىنىڭچۇ؟؟؟  جۇڭگۇدا بەك ياقتۇتۇپ كىيىشىدىغۇ...

سايرام22

مەنمۇ خېلى بۇرۇن ئ‍ادىداس بىلەن پۇما ئ‍ىككى ماركىنى ئ‍اكا ئۇكىلارنىڭ دەپ ئاڭلىغان لىكىن ئ‍ادىداسنى ئ‍اكىسىنىڭ پۇما ئ‍ۇكىسىنىڭ دەپ

سايرام22

ئابلەتجان يوللىغان ۋاقتى  2015-11-26 17:44
فىيلا ۋە دىيادورا، جومادىن دىن ئىبارەت ئۈچ  ماركىنى قې ...

جومانى ئىسپانىيەنىڭ دەپ ئ‍اڭلىغانتىم ،  ئ‍ىتالىيەنىڭ ماركىسىما ؟

nayil

ئابلەتجان يوللىغان ۋاقتى  2015-11-26 17:44
فىيلا ۋە دىيادورا، جومادىن دىن ئىبارەت ئۈچ  ماركىنى قې ...

ۋاقىت مەسلىسى ، مەنبە مەسىلىسى بەكلا ھاردۇرۇۋەتتى !!~ كېلەر قېتىمدا ئىتالىيەنىڭ داڭلىق ماركىلىرى توغرىسىدا بىرەنى يازامىز بولمىسا !!~
ئەسلى مۇنداق تېما يازساق كىرىدىغانلىقلىرىنى بىلگەن بولسام بىر نەچچىنى يېزىۋىتەركەنمەن !!~

nayil

ئۇسىتا يوللىغان ۋاقتى  2015-11-26 17:42
تېمىللىرى تېتىملىق ئادەم جۇمۇ بۇ................

رەھمەت !!~ سىلەرگە ياققان بولسا بولدى !!~

nayil

ئابلەتجان يوللىغان ۋاقتى  2015-11-26 17:44
فىيلا ۋە دىيادورا، جومادىن دىن ئىبارەت ئۈچ  ماركىنى قې ...

دىيادورا بارغۇ !!~