پاسىبان كۇلۇبى » iTunes

iTools, 同步推, 91 قاتارلىق چوماقچىلارنىڭ قوزغاتقۇچىسى

پاسىبان — Sat, 22 Oct 2011 10:06:22 +0000

كۆپ قىسىم كىشىلەر يازما تېمىسىدا ئېيتىلغان iPhone چوماقچىلىرىنى ئىشلىتىشكە ئادەتلەنگەن. ئۇلارنىڭ بۇنى ئىشلىتىشتىكى باھانىلىرى ھەرخىل. بەزەنلىرى ئىخچام، ئاددىي دېسە بەزەنلىرى ئەپ قاچىلاشقا قولاي، بۇرۇنقى قاچىلىغان نەرسىلەر يۇيۇلۇپ كەتمەيدۇ دېگەندەك … لېكىن بۇ نەرسىلەر ئۆزىدە iPhone ياكى iPad كە ئۇلايدىغان قوزغاتقۇچ پروگرامما بولمىغانلىقى ئۈچۈن، كومپىيۇتېردا iTunes بولمىسا يەنە نورمال خىزمەت قىلالمايدۇ. بۈگۈن سىلەرگە بۇ چوماقچىلارنى iTunes قا بېقىندۇرمايدىغان يەنە بىر «چوماقچى» نى دەپ بېرەي. شۇ ئارقىلىق iTunes بولمىغان كومپىيۇتېردىمۇ ئوخشاشلا iPhone ياكى iPad كە نورمال ئۇلىيالايسىلەر.

تەۋسىيە

مەن ئۆزۈم iTools دېگەندەك بۇ نەرسىلەرنى پەقەت ھۆججەت كۆچۈرۈش ياكى ئاختۇرۇشقىلا ئىشلىتىمەن. باشقا ھەممە ئىشنى iTunes قا تاپشۇرىمەن. بۇنىڭدا ئەڭ بىخەتەر، مۇكەممەل، سېستىمىغا زىيانسىز، يەنە كېلىپ ھەر قېتىم ماسقەدەملىگەندە بىر قېتىمدىن زاپاسلاپ ماڭىدىغان بولغاچ، بىزنىڭ iPhone ىمىزنىڭ سېستىمىسىنى بىخەتەر بىر ھالەتتە ئىشلىتىپ ماڭالىشىمىزغا پايدىلىق. تەۋسىيە قىلىدىغىنىممۇ شۇ. لېكىن بەزى ئالمىداشلىرىمىز بەزىبىر قولايسىزلىقلارنى نەزەردە تۇتۇپ iTools قا ئوخشاش 3-تەرەپ دېتاللىرىنى ئىشلىتىمەن دېسە ئۇ يەنە ئۆزىنىڭ ئىشى.

نېمە ئۈچۈن iTools يەنىلا iTunes قا بېقىنىدۇ؟

يىغىپلا ئېيتساق بۇ ئوقەتلەرنىڭ ئۆزىدە بىزنىڭ Apple Mobile Device ىمىزنىڭ قوزغاتقۇچ پروگراممىسى ۋە ئۇلىنىش ئېغىزى يوق. شۇڭا iTools تەك ئارانلا 1~2 مېگابايت چوڭلۇقتا كېلىدۇ. بىز iTools نى بارماق دېسكىغا كۆچۈرىۋېلىپ باشقا كومپىيۇتېردا بەزى مەشغۇلاتلارنى قىلاتتىم دېسەك، ئەگەر ئۇ كومپىيۇتېردا iTunes بولمىسا بىزنىڭ iTools ىمىزمۇ گۆشىرىپ قاراپلا تۇرىدۇ. بىز بۇ مەسىلىنى مۇشۇ كومپىيۇتېرغا iPhone غا ئوخشاش Apple Mobile Device نىڭ قوزغاتقۇچىسىنى قاچىلاپ بۇ ئىككى نەرسە ئارىسىدا كۆۋرۈك ھاسىل قىلىش ئارقىلىق ھەل قىلالايمىز.

ئۇنداقتا بۇ كۆۋرۈك قەيەردە؟ قانداق سالىمىز؟

بۇ كۆۋرۈكنى بۇ 2 خىل ئۇسۇلدا تاپالايمىز.

1. بۇ قوزغاتقۇچ ئەمەلىيەتتە باشقا بىر يەردە ئەمەس. ھەممىمىز بىلىدىغان iTunes نىڭ قاچىلاش پروگراممىسى ئىچىدە بار. بىز ئالما تور بېكىتىدىن iTunes نىڭ ئەڭ يېڭى قاچىلاش ھۆججىتىنى چۈشۈرىمىز. ئاندىن بۇ iTunesSetup.exe ناملىق قاچىلاش ھۆججىتىنى خۇددى پرېس ھۆججىتى rar نى يەشكەندەكلا Winrar دېگەندەك پىرېس يېشىش قوراللىرى ئارقىلىق ئاچىمىز. ( ئەمەلىيەتتە exe ناملىق ئىجرا ھۆججىتى ئىچىدە باشقا گەپ يوق، بۇ بىر يوغان نەرسە ئەمەس ، ناھايىتى كەلسە بىر توپلاپ قاچىلاش ھۆججىتى خالاس. (قەشقەر تەلەپپۇزىدە ئوقۇڭ)) ئاچقاندىن كىيىن ئىچىدە يەنە نەچچە دانە msi ھۆججىتىنىڭ بارلىقىنى كۆرىمىز (بۇمۇ خۇددى exe دەك قاچىلاش ھۆججىتى. MicroSoft Installer دىن كەلگەن).

رەسىمگە قارىساق ھەممىنى بىلىمىز. بىز بۇلارنىڭ ئىچىدىكى AppleApplicationSupport.msi ۋە AppleMobileDeviceSupport.msi دېگەن بۇ ئىككى ھۆججەتنى تاللاپ ئۆزىمىز خالىغان بىر جايغا يېشىۋالىمىز. (دىققەت: مېنىڭ سېستىمام 64 بىتلىق سېستىما بولغانلىقى ئۈچۈن رەسىمدىكىدەك 2-ھۆججەتنىڭ ئاخىرىدا 64 دەپ رەقەم بار. iTunes نىڭ قاچىلاش ھۆججىتىدىمۇ 64 دېگەن ساننى كۆرىسىز. ئەگەر سىزنىڭ 32 لىك سېستىما (x86 لىك بىلەن ئوخشاش) بوپقالسا بۇ رەقەم يوق.) بىزگە لازىم بولىدىغان ھۆججەت دەل مۇشۇ ئىككى ھۆججەت شۇ.

2. مەن يەنىلا 1-خىل ئۇسۇلنى تەۋسىيە قىلىمەن. بۇنىڭدا بىز ئاشۇ 2 ھۆججەتنىڭ ئەڭ يېڭى نۇسقىسىدىن پايدىلىنالايمىز. ئەگەر iTunes نىڭ قاچىلاش ھۆججىتى بەك چوڭكەن، ئۇنى چۈشۈرۈپ يېشىپ … بولغۇچە ئاۋارىچىلىقكەن دەپ قالساق، بۈگۈن (2011-يىل 10-ئاينىڭ 22-كۈنى) ئالما تور بېكىتىدىن چۈشۈرىۋالغان مۇشۇ 2 ھۆججەتنىڭ ئايرىم نۇسقىسىنى تور دېسكىسىدىن چۈشۈرىۋالسىڭىزمۇ بولىدۇ.

چوماق ھۆججىتىنى چۈشۈرۈش

32 بىتلىق سېستىما ئۈچۈن بۇ جايدىن چۈشۈرۈڭ. (كۆپ قىسىم سېستىمىلار مۇشۇ شەكىلدە)

64 بىتلىق سېستىما ئۈچۈن بۇ جايدىن چۈشۈرۈڭ.

ئەڭ ياخشىسى 1-خىل ئۇسۇل ئارقىلىق ئۆزىڭىزنىڭ سېستىمىسىغا ماس كېلىدىغان نۇسقىسىنى چۈشۈرۈپ پايدىلىنىڭ. كۆپ قىسىم كىشىلەرنىڭ سېستىمىسى 32 لىك سېستىما بولىدۇ. ئەگەر سىز ئۆزىڭىزنىڭ كومپىيۇتېرىدىكى سېستىمىنىڭ 32 لىك ياكى 64 لىك سېستىما ئىكەنلىكىنى بىلەلمىسىڭىز:

1. ئۈستىدە ئېيتىلغان 1-ئۇسۇلنى قوللىنىڭ.

2. ھەر ئىككىسىنى چۈشۈرۈپ قاچىلاپ كۆرۈڭ. ئەگەر ماس كەلمەيدىغان نۇسقىسى بولۇپ قالسا قاچىلاش جەريانىدا msi ھۆججىتى نورمال قوزغالماسلىقى مۇمكىن.

چوماقچىنى ئىشلىتىش

مۇشۇ 2 ھۆججەتنى ئايرىۋالغاندىن كىين (ياكى چۈشۈرۈپ بولغاندىن كىيىن) قوش چېكىپلا سېستىمىغا (iPhone نىڭ ئەمەس، كومپىيۇتېردىكى سېستىمىڭىزغا) قاچىلىۋەتسەكلا ئىش تامام. ئەمدى كومپىيۇتېردا iTunes بولمىسىمۇ iTools دېگەندەك چوماقچىلىرىڭىز iPhone, iPad لەرنى پەرق ئېتەلەيدۇ، نورمال ئۇلىنىدۇ.

كۆڭلىڭىزدىكىنى تاپايمۇ؟

iOS 5 كە تەييارلىق: iTunes 10.5 نى چۈشۈرۈڭ

پاسىبان — Wed, 12 Oct 2011 03:44:28 +0000

iPhone 4S ئېلان قىلىنغان چاغدا ئۇلار 12-چىسلا iOS 5.0 نى چۈشۈرۈشكە تەمىنلەيدىغانلىقىنى ئېيتىشقان ئىدى. بۈگۈن بۇ كۈنمۇ كەلدى. يېڭى ئىقتىدارلىرىدىن بەھرلەنمەكچى بولغان ئالمىداشلار (قۇلۇپى يوق بولسىلا) دەرھال چۈشۈرۈشكە ئالدىراۋاتىدىغۇ دەيمەن؟

ھازىر جۇڭگو ۋاقتى بويىچە ھېسابلىساق 12-چىسلا بولغىنى بىلەن ئامېرىكىدا ئۇلار ھازىر 11-ئۆكتەبر كەچتە ئۇخلاۋاتىدۇ. iOS 5 كە مەخسۇس ئىشلەنگەن، نەچچە ۋاقىتتىن بۇيان Beta نۇسقىسى ئۈچۈن تەمىنلەنگەن iTunes 10.5 نىڭ بۈگۈن ھەقىقىي نۇسقىسى چۈشۈرۈشكە تەمىنلىنىپتۇ. تۆۋەندىكىدەك 2 يول ئارقىلىق چۈشۈرسىڭىز بولىدۇ.

iTunes نىڭ ئۆزىدىكى 帮助 دىن 检查更新 نى باسساق، بىرئازدىن كىيىن قىستۇرما رەسىمدىكىدەك كۆزنەك چىقىدۇ، بۇ كۆزنەكتىكى 下载iTunes نى باسساق Apple Software Update قوزغىلىپ، ئەڭ يېڭى نەشىردىكى ئالما ئەپلىرىنى چۈشۈرىدۇ.
2-خىل ئۇسۇل ئورگان تەرەپ تور بېكىتىدىن چۈشۈرۈش ئۇسۇلى. بۇنى چۈشەندۈرۈپ ئولتۇرۇشنىڭ ھاجىتى يوق. تور بەتنى زىيارەت قىلىپ، سول تەرەپتىكى Download Now نى باسساقلا بولىدۇ. بېسىشتىن ئەۋۋەل دۆلەت تاللايدىغان جايغا دىققەت قىلىش كېرەك. ئادەتتە سىزنىڭ IP رىڭىزغا ئاساسەن ئاپتۇماتىك تاللايدۇ. رازى بولمىسىڭىز ئاستىدىكى جايدىن ئىزدەپ خالىغان تىلدىكىسىنى چۈشۈرىۋېلىڭ. رەسىمگە قاراڭ

بۇنى ھازىرچە چۈشۈرگەچ تۇرۇڭ. ئامېرىكا ۋاقتى 12-چىسلا بولىشىغا يەنە نەچچە سائەت بار. بەلكى كەچ تەرەپلەردە ئېلان قىلىنىشى مۇمكىن. iOS 5 ئېلان قىلىنغان 1-ۋاقىتتا ئىنشا ئاللاھ چۈشۈرۈش ئادرېسىنى قالدۇرىمەن.

سەمىمى ئەسكەرتىش: ئەڭ ياخشىسى iTunes نىڭ ئۆزىدىكى ئەسكەرتمە بويىچە چۈشۈرمەڭ. مەن قالدۇرغان ئادرىستىن چۈشۈرۈپ، ئۆزىڭىز بىلىدىغان بىر جايغا ساقلاپ قويۇڭ. كىيىن سېستىما بۇزۇلۇپ قالسا قايتۇرۇشقا قولايلىق.

كۆڭلىڭىزدىكىنى تاپايمۇ؟

iTunes چۈشۈرۈش سۈرئېتىنى چاقماقتەك تېزلەتكۈڭىز بارمۇ؟

پاسىبان — Tue, 20 Sep 2011 07:03:46 +0000

iTunes ئالما مەھسۇلاتلىرىنىڭ كەم بولسا بولمايدىغان ھەمراھى. ھەرقانداق iTools, 91 دېگەندەك ياردەمچى قوراللارمۇ، iTunes قاچىلانمىغان كومپىيۇتېردا كۈچىنى يوقىتىدۇ. iTunes ئارقىلىق ئەپ چۈشۈرگەندە ئالمىنىڭ جۇڭگودا مۇلازىمىتېرى بولمىغانلىقتىن دائىم 20~30 كېلوبايتلىق سۈرئەت بىلەن چۈشىدۇ. ئەگەر خەرىتىگە ئوخشاش 2 گېگابيت كېلىدىغان نەرسىنى چۈشۈرۈشكە توغرا كەلسە، چۈشۈپ بولغۇچە يېڭى نۇسقىسى چىقىپمۇ ئۈلگۈرىشى مۇمكىن.

ھازىر ئايفون ۋە ئايپەدتىكى ئويۇنلارنىڭ سەرخىللىشىشىغا ئەگىشىپ چوڭ ھەجىمدىكى نادىر ئويۇن ۋە ئەپلەر بارغانسىرى كۆپىيىۋاتىدۇ. بۇنداق نەرسىلەرنى ئاران 20 كېلوبايتتىن چۈشۈرگىلى تۇرسا ئادەمنىڭ ئىچىنى سىقىپلا قويىدىغان گەپ. ئۇنداقتا بۇ ئوقەتنىڭ سۈرئېتىنى ئاشۇرۇشقا ئىمكان بارمۇ يوق؟

بىر ئامالى : جۇڭگودىكى مۇلازىمېتىرلارغا يوللاپ قويۇلغان «يېشىۋېتىلگەن» نۇسقىسىنى چۈشۈرۈش. لېكىن بۇ بىۋاستە iTunes نىڭ چۈشۈرۈش سۈرئېتىنى يېڭىلىمايدىغان قارىسىغىلا تاپقان بىر ئامال. بۇ ئامال ئەمەلىيەتتە ~~ئاقماس بىر ئامال!~~

ئەسلى Apple شىركىتى جۇڭگو بازىرىغا كىرمىگىنى بىلەن شىياڭگاڭغا بالدۇرلا كىرگەن ئىكەن ئەمەسمۇ. ئەگەر بىر چۈشۈرۈش مۇلازىمىتېرىنى شىياڭگاڭدىكى مۇلازىمېتىرغا توغرىلاپ قويساق ئۇ چاغدا ئامېرىكىغا قارىغاندا يېقىنراق بولغاچقا تېز سۈرئەت بىلەن چۈشۈرىشى مۇمكىن. ئىشقىلىپ ھەق ئالمايدىغان، زىيان قىلمايدىغان ئامال بولغاندىن كىيىن قېنى بىر سىناپ باقامدۇق؟

بۇ ئۇنچە بەك قىيىن ئەمەس، لېكىن سىناقتىن ئۆتكەن كۆرۈنەرلىك پەرقكە ئېگە بولغان بەلەن ئامال. تۆۋەندە باسقۇچلارنى كۆرسەتكەن ئۇسۇل بويىچە بىر-بىرلەپ قىلىپ چىقايلى. ئادەتتە بۇنى مۇۋاپىقىيەتلىك توغرىلىغاندىن كىيىن iTunes تىن ئەپ چۈشۈرگەندە تورنىڭ ئەڭ يۇقىرى سۈرئېتىگە چىقىدۇ.

ئاۋال مۇلازىمېتىر سۈرئېتىنى ئۆلچەيدىغان بۇ دېتالنى چۈشۈرۈڭ. چۈشۈرۈپ يېشىپ ئىچىگە قارىسىڭىز PingInfoView.exe دېگەن ئىجرا ھۆججىتىنى كۆرىسىز. ئۇنى ئېچىڭ.

چىققان كۆزنەكتىن OK نى بېسىڭ. ئاندىن بۇ دېتال سىزنىڭ كومپىيۇتېرىڭىزدىكى تور مۇھىتىنى تەكشۈرۈپ ئالما مۇلازىمېتىرى بىلەن ئۇلىنىش ئەھۋالىنى تېپىپ چىقىدۇ. ئاندىن كۆزنەكنىڭ ئاستىدىكى ئوڭ-سولغا سۈرىدىغان جاينى ئوڭ تەرەپكە سۈرۈپ ئۈستىدىكى Average Ping Time دېگەن تىك رەتنى تېپىپ چىقىڭ. ئاندىن شۇ جاينى بېسىپ ساننى كىچىكتىن چوڭغا قارىتىپ تىزىڭ.

تىزغاندىن كىيىن ئەڭ ئۈستىدە Average Ping Time قىممىتى ئەڭ كىچىك بولغىنى تىزىلىدۇ. بۇنىڭ مەنىسى شۇكى، بۇ سانلىق قىممەت سىزنىڭ كومپىيۇتېرىڭىز بىلەن ئالمىنىڭ مۇلازىمېتىرى ئارىسىدىكى ئىنكاس قايتۇرۇش ۋاقتى بولۇپ، بۇ ۋاقىت قانچە كىچىك بولسا، سىزگە شۇنچە تېز ئۇلىشىدىغانلىقىنى بىلدۈرىدۇ. يەنى بۇ PING ۋاقتى. ئاندىن ئەڭ كىچىك بولغان شۇ مۇلازىمىتىرنى ئىككى قېتىم چەكسەك تەپسىلاتى چىقىدۇ.

ئاندىن بۇنىڭ IP ئادرېسىنى كۆچۈرىۋېلىڭ. ئادىن بۇ ھۆججەتنى چۈشۈرۈڭ hosts.rar . بۇنى چۈشۈرۈپ بولغاندىن كىيىن يېشىپ ئىچىگە قارىسىڭىز hosts ناملىق بىر ھۆججەتنى كۆرىسىز. ئۇنى 记事本 بىلەن ئېچىڭ. ئاندىن Ctrl+H نى بېسىپ، ياكى 编辑 دىن 替换 نى باسسىڭىز ئالماشتۇرىدىغان كۆزنەك چىقىدۇ. بۇ ئىقتىدارى ئارقىلىق ئىچىدىكى IP ئادرېسىنى بايا بىز كۆچۈرىۋالغان ئادرېسقا ئالماشتۇرىمىز. بۇنىڭ ئۇسۇلى بەكلا ئاددى. ئۈستىگە hosts ھۆججىتىنىڭ ئىچىدىكى ئادرېسنى ئاستىغا ھېلىقى دېتالدىن كۆچۈرىۋالغان ئادرېسنى چاپلاپ 替换全部 باسساق بولدى. رەسىمگە قاراڭ.

ئاندىن ئۇنىڭ ئىچىدىكى بارلىق ئادرېس بىز كۆچۈرىۋالغان ئادرېسقا ئالمىشىدۇ. ئاندىن بارلىق مەزمۇننى كۆچۈرۈپ ئېلىڭ. (Ctrl+A ئاندىن Ctrl+C ) كۆچۈرۈپ بولغاندىن كىيىن بۇ جاينى ئېچىڭ:

windows/system32/drivers/etc

بۇنىڭ ئىچىدە بايىقىغا ئوخشاشلا hosts دەيدىغان بىر ھۆججەتنى كۆرىسىز. ئەگەر سىز نەشىر تۆۋەنلەتكەن بولسىڭىز بۇ نەرسە بىلەن ھەپىلىشىپ باققانغۇ دەيمەن. بۇنى يەنە 记事本 بىلەن ئېچىڭ. ئاندىن ئەڭ ئاستىغا كېلىپ بايا كۆچۈرىۋالغان مەزمۇننىڭ ھەممىنى شۇ يەرگە چاپلاڭ.

ساقلاپ چېكىنىڭ (Win7 دە باشقۇرغۇچى سالاھىيىتىدە ئاچمىسىڭىز تەھرىرلىيەلمەسلىكىڭىز مۇمكىن). ئىش تامام. ئەمدى چۈشۈرۈپ بىر سىناپ بېقىڭ. مەن ئۆزۈم سىنىدىم. 500 كېلوبايتتىن يۇقىرى سۈرئەت بىلەن چۈشۈرىۋاتىدۇ.

ئەمەلىيەتتە بىز تۈرمىدىن قاچۇرغان بولساق، ئايفون ۋە ئايپەدتىكى چۈشۈرۈش سۈرئېتىنىمۇ مۇشۇ ئۇسۇل بويىچە تېزلەشتۈرەلەيمىز. ئۇسۇلى ئوخشاش. بۇ يەردە iOS ئۈچۈن تەييارلانغان hosts ھۆججىتىنى تەمىنلىدىم. بۇنى چۈشۈرىۋېلىڭ hosts-ios.rar . ئاندىن يېشىپ ئىچىدىكى ھۆججەتنى ئېچىپ بايىقى ئۇسۇل بويىچە ئادرېسنى بىزگە يېقىن مۇلازىمېتىرنىڭ ئادرېسىغا (بايا ھېلىقى دېتال ئارقىلىق تېپىپ كۆچۈرىۋالغان ئادرېسقا) ئالماشتۇرىمىز. (رەسىمنى چېكىپ چوڭايتىڭ)

ساقلاپ بولغاندىن كىيىن iFunbox ياكى iTools ئارقىلىق ئاساسى مۇندەرىجە ئاستىرىدىكى /etc دېگەن بۇ جاينى ئېچىڭ. ئىچىگە قارىسىڭىز hosts ھۆججىتىنى كۆرىسىز. (رەسىمنى چېكىپ چوڭايتىڭ)

بۇنى سىز بايا يېشىپ تەھرىرلىگەن ھۆججەتكە ئالماشتۇرىۋېتىڭ. كۆچۈرۈپ ئەكىلىپ قاپلىۋەتسىڭىز بولىدۇ.

ئەسكەرتىش: بۇنداق قىلىش بەلكى ئايفون ياكى ئايپەدنىڭ سېستىمىسىنى بۇزۇپ قويۇشى مۇمكىن. شۇڭا ئەڭ ياخشىسى ئەسلىدىكى hosts ھۆججىتىنى ئاۋال زاپاسلىۋېلىڭ. ناۋادا بۇزۇلۇپ كېتىپ قالسا ئەسلىدىكىسىنى قايتۇرۇپ قويسىڭىز بولىدۇ.

خوش، ئەمدى ئايفوننى قايتا قوزغىتىپ App Store دىن چوڭراق بىرەر نەرسە چۈشۈرۈپ سىناپ بېقىڭ. نورمالدىكىگە قارىغاندا تېز چۈشىۋاتامدۇ؟

كۆڭلىڭىزدىكىنى تاپايمۇ؟

ھەقسىز Apple ID ئىلتىماس قىلىش دەرسلىكى (فىلىملىك)

پاسىبان — Wed, 24 Aug 2011 00:45:57 +0000

ھەرقانداق بىر ئالما ئىشلەتكۈچىسىنىڭ ئۆزىگە خاس بولغان بىر دانە Apple ID (ئالما كىملىكى) بولىشى كېرەك. بۇ كىملىك بىلەن ئالمىنىڭ ھەرقانداق يېرىدىن ھەقسىز ۋە ھەقلىق بولغان نەرسىلەرنى سېتىۋالغىلى، ئالمىنىڭ ھەر خىل مۇلازىمەتلىرىدىن بەھرىمەن بولغىلى بولىدۇ. ئۇنداقتا بۇ كىملىكنى قانداق ئىلتىماس قىلىمىز؟

ئالما بىلەن ھەپىلىشىپ يۈرگەندىن بۇيان بەلكى سىلەرمۇ ھېس قىلغانسىلەر. ئالما ھەممە نەرسىلىرىنى توردا، يەنى iTunes Store دا ساتىدۇ. بۇنىڭ بەزىلىرى ھەقسىز. بەزىلىرى ھەقلىق. Windows نى كۆپ ئىشلىتىپ كۆنۈپ قالغان كىشى ئالمىغا كۆچكەندە بۇنچە كۆپ ھەقلىق نەرسىلەرنى كۆرۈپ تازا كۆنەلمەسلىكى مۇمكىن. چۈنكى بىز ئەرزىنىغا، بولۇپمۇ ھەقسىزىغا كۆنۈپ قالغان. مانا بۇ بىزدىكى يامان بىر ئادەت. بۇ ئادەت مەندىمۇ بار. لېكىن چەتئەللەردە 1 كومپىيۇتېرغا 1 دىن ئايرىم-ئايرىم سېستىما سېتىۋېلىپ قاچىلايدۇ. بىرەر تال مۇزىكا بولسىمۇ توردىن ھەقسىز چۈشۈرۈپ ئاڭلىمايدۇ. بەلكى پلاستىنكىسىنى سېتىۋېلىپ ئاڭلايدۇ. بۇ قىلمىش ئۇلارنىڭ ئېڭىغا سىڭىپ كەتكەن.

ئۆتكەندە چەتئەلدە ئوقۇيدىغان بىر دوستىمىز ئۆزىدىكى ئون نەچچە تال MP3 نى بىر ساۋاقدىشىغا دېسكىغا ئويۇپ بەر دەپ بېرىپتۇ. ئۇ ساۋاقدىشى ئۇنىڭغا يامان نەزىرى بىلەن بىر قارىۋېتىپ كايىپلا كېتىپتۇ. ئاغىنىمىزنى شۇنداق دېگىنىگە تويغۇزۇپ قويغانىكەن. چۈنكى بۇ ئىشنى ئۇلار نومۇسسىزلىق دەپ بىلىدىكەن.

گەپكە كەلسەك، ئالما مۇشۇنىڭغا ئوخشاش ھەرقانداق نەرسىلەرنى iTunes Store ئارقىلىق سېتىپ چىقىرىپ، چۈشۈرگەن ئەپ ئىچىگە سېتىۋالغۇچىنىڭ Apple ID سىنى يېزىۋېتىدۇ. بىز باشقىلارنىڭ كومپىيۇتېرىدىكى شۇ نەرسىلەرنى كۆچۈرۈپ ئەكىلىۋالغان بىلەنمۇ شۇلارنىڭ Apple ID سىنىڭ مەخپى نومۇرىنى بىلمىسەك يەنە ئوخشاشلا قاچىلىيالمايمىز. شۇڭا ئايفونغا باشقىلارنى ئويۇن قاچىلاپ بەر دەپ بەرگەن بىلەنمۇ بۇ ئويۇنلار سىزگە ۋاپا قىلمايدۇ. چۈنكى بۇ ئويۇنلارنى باشقىلارنىڭ كىملىكىگە ئالغان. قاچىلىغاندا ۋە يېڭىلىغاندا يەنە شۇلارنىڭ مەخپى نومۇرى لازىم بولىدىغان گەپ.

ئۇنداقتا بۇ كىملىكنى قانداق ئىلتىماس قىلىمىز؟ ئىلتىماس قىلىشتا ئۈستىدە ئېيتىپ ئۆتكەندەك ھەقلىق ئەپلەرنى سېتىۋېلىشقا ئېھتىياجلىق بولىدىغان «ئىناۋەتلىك كارتا» لازىم بولىدىغان گەپ. ئەگەر بىزدە ئىناۋەتلىك كارتا بولمىسىچۇ؟ بۇ كىملىكنى ئىناۋەتلىكى كارتىسى بولمىغانلارمۇ ئىلتىماس قىلالايدۇ، ئەلۋەتتە. بۇنىڭ ئۇسۇلىنى تۆۋەندىكى سىندىن كۆرۈڭ.

ئىلگىرى يوللىغان مۇناسىۋەتلىك يازما : /20101220255.html

كۆڭلىڭىزدىكىنى تاپايمۇ؟

iTunes ھەققىدە قىسقىچە ساۋات (فىلىملىك)

پاسىبان — Sat, 06 Aug 2011 09:27:21 +0000

نەچچە ۋاقىتتىن بۇيان ئالما مەھسۇلاتلىرىنى ئىشىلىتىپ كېلىۋاتقان بۇرادەرلەر iTunes تىن ئايرىلالمايدىغانلىقىنى چوڭقۇر ھېس قىلىپ يەتتىغۇ دەيمەن. شۇڭا بۇ جەرياندا ئاز بولمىغان قىيىنچىلىقلارغا يولۇققان ئوخشايدۇ. شۇڭا بۈگۈن ئۆزۈمنىڭ چۈشەنچەمگە ئاساسەن ئازراق تونۇشتۇرۇپ ئۆتتۈم.

گەرچە بالدۇرراق قىلىش ئويۇم بولسىمۇ بەزى سەۋەپلەر تۈپەيلى كېچىكىپ قالدى. مەنمۇ سىلەرگە ئوخشاشلا بىر ئىشلەتكۈچى بولۇش سۈپىتىم بىلەن ھەممىنى بىلىپ كەتمەيمەن. خاتا كەتكەن يېرى بولسا كۆرسىتىپ بەرگەيسىلەر. قېنى سىنغا مەرھەمەت

* ئاستىدىكى تەڭشەيدىغان جايدىن سۈزۈكلۈك دەرىجىسىنى تاللىيالايسىز. ئەگەر تور شارائىتىڭىز يار بەرسە سۈزۈك نۇسقىسىنى كۆرۈش ئۈچۈن 超清 نى تاللاڭ.

كۆڭلىڭىزدىكىنى تاپايمۇ؟

iOS نىڭ Google Android تىن ئارتۇق زادى نېمىسى بار؟

پاسىبان — Sun, 05 Jun 2011 01:57:32 +0000

ئەقىللىق تېلىفۇنلار ئىچىدە Google Android نۆۋەتتە دۇنيا مىقياسىدىكى ئىشلىتىش مىقدارى ئالمىنىڭ iOS ئۈسكۈنىلىرىدىن ئېشىپ كېتىپتۇدەك. لېكىن BusinessInsider تور بېكىتى ئورنىدىن دەس تۇرۇپ ئالما ئۈچۈن 2 ئېغىز لىللا گەپ قىلىش ئۈچۈن ئالمىنىڭ iOS سىنىڭ Google Android تىن زادى قانداق ئارتۇقچىلىقى بارلىقى توغرىسىدا تۆۋەندىكى 10 تۈرلۈك ئالاھېدىلىكنى تىزىپ چىقىپتۇدەك.

1. iTunes تىكى App Store دۇككىنى

ئالما بۇ دۇككان ئارقىلىق ئابونتلىرى ئۈچۈن ناھايىتى مول ۋە سەرخىل بولغان ئەپ بىلەن تەمىن ئېتەلەيدۇ. ئايفون ئارقىلىق سېتىۋالغان ئەپلەر ماسقەدەملىگۈچە كومپىيۇتېرغا زاپاسلىنىپ ماڭىدۇ. سېتىۋېلىش باسقۇچلىرى ۋە ئۇسۇللىرى ناھايىتىمۇ قولاي. بۇ Google Android قا قارىغان تولىمۇ، راستىنلا تولىمۇ قولاي.

2. تورلاشتۇرۇپ ھەمبەھرلىنىش (iOS لەر ئارا)

ئەگەر سىزنىڭ پەقەت بىرلا iPhone ىڭىز بولسا بەلكى بۇ ئىقتىدار تازا ئىشلەپ كەتمەسلىكى مۇمكىن. ئەگەر سىز بىر قانچە iOS نىڭ ئېگىسى بولسىڭىز، سىز بۇ ئىقتىدار ئارقىلىق ئۈسكۈنىلىرىڭىز ئارا تولىمۇ راۋان بولغان ئالاقە قۇرالايسىز. تولىمۇ ئەپسۇس، Google Android نىڭ بۇنداق ئارتۇقچىلىقى يوق.

3. iPhone ىمنى ئىزدەيمەن

بۇ ئىقتىدار iOS 4.0 دىن باشلاپ قوشۇلغان خاس ئىقتىدار بولۇپ، ھازىر بۇ ئىقتىدارى ھەقسىز تەمىنلىنىدۇ. iPhone ىڭىز يۈتۈپ كەتكەن تەقدىردە سىز بۇ ئىقتىدارىدىن پايدىلىنىپ يۈتكەن iPhone ىڭىزنىڭ تەخمىنىي ئورنىنى سۈنئىي ھەمراھتىن ئورۇن بەلگىلەش ئارقىلىق تاپالايسىز، iPhone ىڭىزغا يىراقتىن ھەقسىز ئۇچۇر يوللىيالايسىز (SIM كارتىسى بىلەن مۇناسىۋەتسىز ھالەتتە)، iPhone ىڭىزنى يىراقتىن قۇلۇپلىيالايسىز. تولىمۇ ئەپسۇس، Google Android نىڭ بۇنداق ئىقتىدارى يوق.

4. تېخنىكىلىق قوللاش

ئەگەر سىزنىڭ iPhone ىڭىزدىن ياكى باشقا ھەرقانداق iOS ئۈسكۈنىڭىزدىن چاتاق چىقىپ قالسا سىزگە ئەڭ يىقىن بولغان Apple Store (ئالما مەخسۇس سېتىش دۇككىنى) غا بېرىپ ئەڭ كەسپىي بولغان تېخنىكىلىق ياردەم ۋە رېمونتقا ئېرىشەلەيسىز. ئەمما Google Android تېلىفۇنىڭىز بۇزۇلسا ھەرخىل ھەرياڭزا بولغان رېمونتچىلارنى ئىزدەيسىز. تولىمۇ ئەپسۇس، Google Android تېلىفونى ئۈچۈن ئورتاق بولغان، Google Android ئۈچۈن مەخسۇس ئاجراتقان رېمونت مەركىزى يوق.

5. باتارىيە ۋە باشقۇرۇش ئىقتىدارى

نەچچە يىللاردىن بۇيان ئالما شىركىتى iPhone نىڭ باتارىيەسىنى ئەڭ چوڭ تۈر نىشانى قىلىپ تەتقىق قىلىپ كېلىۋاتىدۇ ۋە بارغانسىرى مۇكەممەللەشتۈرىۋاتىدۇ. iPhone 4 نى ئېلىپ ئېيتساق بۇرۇنقىغا قارىغاندا 2 ھەسسە كۈچەيدى. بەلكى 5-ئاۋلاد iPhone بۇنىڭدىنمۇ كۈچلۈك بولىشى مۇمكىن. iOS ئۈسكۈنىلىرى ئىچىدە iPad بولسا iOS نىڭ باتارىيەدىكى ئارتۇقچىلىقىغا ئەڭ ياخشى ۋەكىل بولالايدۇ. ھازىر ئەڭ يېڭى نەشىرىدىكى iOS قاچىلانغان iPhone نى تولۇق توك بىلەن پۈتۈن 1 كۈن ئوينىساق باتارىيەسى ئوبدانلا يېتىدۇ. تولىمۇ ئەپسۇس، Google Android نىڭ بۇنداق قىلالىشى ناتايىن.

6. iTunes ۋە ماسقەدەملەش ئىقتىدارى

iTunes بولسا ئالما مەھسۇلاتلىرىنى ئىشلەتكۈچىلەر چوقۇم قاچىلاشقا تېگىشلىك بولغان دېتال. ناھايىتى ئاددىي بولغان مەشغۇلات ئارقىلىقلا كومپىيۇتېر ۋە ئۈسكۈنە ئارىسىدا خالىغانچە ئالاقە قۇرۇپ زاپاسلاپ ماڭغىلى، ماتىرىياللارنى ئۆز-ئارا ئېۋەتىشكىلى بولىدۇ. گەرچە Google Android نىڭمۇ DoubleTwist غا ئوخشاش ماسقەدەملىگۈچىسى بولسىمۇ، تولىمۇ ئەپسۇس! iTunes تەك تولۇق ئىقتىدارلىق ۋە قولاي ئەمەس.

7. iOS تولا ئىشلەپ كەتمەيدىغان ئارتۇقچە نەرسىلەردىن خالىي

Google Android تېلىفۇنىنى ساتقۇچى (ئادەتتە ساتقۇچىلار كۆپىنچە تېلېگراف شىركەتلىرى بولىدۇ) ئالدىنئالا بىزگە ھېچقانداق ئىشلىتىش قىممىتى بولمىغان، ياكى ئىشلىتىلىشى بەكلا ئاز بولغان، بولسىمۇ، بولمىسىمۇ بولىدىغان دېتاللاردىن نەچچىنى قاچىلاپ قويغان بولىدۇ. دەسلەپ Google Android بىلەن ئۇچراشقۇچىغا بۇ بىرخىل قالايمىقان، مۇرەككەپ نەرسىدەك تۇيغۇ بېرىپ قويىدىكەن.

ئەڭ ئاددىيسى مەن ئۆزۈمنى ئېلىپ ئېيتسام شۇنچە زامانلاردىن بۇيان قولۇمغا چۈشكەن تېلىفۇنلارنى بۇنداق نەرسىلەرگە ئۆزۈم تولىمۇ ئامراق بولغانلىقتىن 1~2 كۈن ھەپىلىشىپ يۈرۈپ ئىچ-باغرىنى قېزىپ چىقاتتىم. 2 ئاي بۇرۇن جۇڭگو تېلېگرافىدىن تور ئەكىرگەنگە سوۋغا قىلغان Google Android نىڭ 2.2 نەشىرى قاچىلانغان بىر تېلىفۇن قولۇمغا چۈشتى، Android نىمۇ بىر ئىشلىتىپ كۆرەي دەپ ئىشلىتىپ كېلىۋاتىمەن، راستىنى ئېيتسام تا ھازىرغىچە كەلگەن ئۇرغان تېلىفۇنلارنى تېزدىن تېپىپ قاملاشتۇرۇپ ئۇرۇپ بولالمايۋاتىمەن. مەن ئۈچۈن بۇ سېستىما بەكلا قولايسىزكەن. ماڭا قويۇپ بەرسە بۇنى تاللىغۇچە Nokia نىڭ Symbian نى تاللايدىغان ئوخشايمەن.

8. تېخىمۇ كۆپ، تېخىمۇ قىزىقارلىق بولغان ئەپ ۋە ئويۇنلار

iOS پروگراممىرلىرى مۇشۇ سۇپا ئارقىلىق تېخىمۇ كۆپ پۇل تاپالايدۇ. گەرچە بۇ سۇپىدىن ئەپ چۈشۈرۈش ئۈچۈن ئازراق پۇل خەجلەشكە توغرا كەلگىنى بىلەن بۇنىڭ ئۆزىگە يارىشا ئالاھېدىلىكى بار. ھەقلىق ساتقان ئەپ ئۈچۈن پروگراممىر تېخىمۇ زېھنىنى قويۇپ لايىھەلەيدۇ. ئاخىرىدا ئاشۇ باھاغا يۈز كېلەلىگۈندەك ھالەتكە ئەكىلىشكە تىرىشىدۇ. ئەمما ھەقسىز، لېكىن ناھايىتى ياخشى ئەپلەرمۇ يوق ئەمەس، ئەلۋەتتە. گەرچە Google Android نىڭ كودى ئوچۇق، iOS قا قارىغاندا كۆپ ئەركىن بولغىنى بىلەن، نۆۋەتتە دۇنيا مىقياسىدا App Store ئۆزىدە ئەڭ مول ۋە ئەڭ تولۇق بولغان ئەپلىرى بىلەن كىشىلەرنى ئۆزىگە مەھلىيا قىلماقتا. بۇنىڭدىكى ئويۇن ۋە ئەپلەرنىڭ سانى بىز بىلىدىغان SONY نىڭ PS دىن، Microsoft نىڭ XBOX دىن، ۋە يەنە باشقا ئويۇن دېتاللىرىدىن خېلىلا، خېلىلا كۆپ. تولىمۇ ئەپسۇس، Google Android بۇ جەھەتتە يەنىلا iOS نىڭ ئارقىدا.

9. ئەڭ گۈزەل بولغان سىرتقى كۆرىنىش لايىھەسى

ھەممەيلەنگە مەلۇم، ئالما سىرتقى كۆرۈنۈش لايىھەسىگە ناھايىتى چوڭ قان-تەرىنى سىڭدۈرىدۇ. شۇنىڭ ئۈچۈن ئالمىنىڭ ھەرقانداق نەرسىسى بازاردىكى ئوخشاش تۈردىكى نەرسىدىن پەرقلىنىپ تۇرىدۇ. بۇ ھەقىقەت باھلىق ئىشلەتكۈچىلەرنىڭ ئورتاق ئېتىراپ قىلىشىغا ئېرىشكەن. بۇنىڭ لايىھەسى گۈزەل بولۇپلا قالماستىن قولايلاشتۇرۇش، چۈشىنىشلىك قىلىش ئەڭ بىرىنجى ئورۇنغا قويۇلغان. Google Android قا بولسا بىر ئاز ۋاقىت سەرپ قىلىپ ئاندىن سىڭىشىپ كېتەلەيسىز. ئەڭ ئاددىيسى 2~3 ياشلىق بالىسى بار iPhone داشلار قايسىڭلارنىڭ بالاڭلار iPhone ىڭلارنى ئويناشنى بىلمەيدۇ؟ مېنىڭچە خېلى ئوبدانلا ئوينايدىغۇ دەيمەن؟ مانا بۇ بۇ ئارتۇقچىلىقنىڭ جاۋابى.

10. بىردەكلىك

ھەرخىل iOS ئىچىدە ئازراق ئوخشىماسلىق بولسىمۇ، بۇ ئوخشىماسلىق كىچىك ۋە چوڭ ئېكراندىكى ئورۇنلاشتۇرۇشنىڭ ئوخشىماسلىقىدەك كىچىك ئوخشىماسلىق. iPhone ئىشىلىتپ كۆنگەنلەر iPad كە ئىشىنىمەنكى 1 كۈندىلا 98% كۆنۈپ بولىدۇ. لېكىن Google Android تېلىفۇنى بىلەن تاختا كومپىيۇتېرى ئارىسىدا بۇ پەرق زور. ئالمىنىڭ پەقەت iOS لىرىدىلا ئەمەس، بارلىق ئۈسكۈنىلىرىدە كۆپ قىسىم جايلىرىدا خاسلىق، بىردەكلىك ساقلانغان. بۇ بولسا iOS نىڭ، جۈملىدىن ئالمىنىڭ خاسلىقى، چوڭ ئالاھېدىلىكى!
ئۈستىدە ئېيتىلىپ ئۆتكەن بۇ پەرقلەرگە ئاساسەن Google Android ۋە iOS ئۈسكۈنىلىرى ئىچىدىكى پەرقنى دەسلەپكى قەدەمدە تونۇپ يەتتۇق. بۇلار پەقەت باشقىلارنىڭ سىزگە يەكۈنلەپ بەرگەن خۇلاسىسى. سىزنىڭ ئۆزىڭىزنىڭ قارىشى سىز ئۈچۈن ئەڭ مۇكەممەل ۋە ئەڭ قايىل قىلارلىق، ئەلۋەتتە!

كۆڭلىڭىزدىكىنى تاپايمۇ؟

ئايفون ۋە ئايپەد ئارقىلىق iBooks تا ئېلكىتاپ كۆرۈش ئۇسۇلى

پاسىبان — Mon, 27 Dec 2010 16:31:58 +0000

كۆرىۋاتقىنىمىزدەك ئايفون ۋە ئايپەدتىكى iBooks دېگەن بۇ دېتال ناھايىتى نەپس ئىشلەنگەن ياغاچتىن ياسالغان كىتاب جازىسى شەكلىدە. بۇنى ئاچقىنىمىزدا كۆز ئالدىمىزدا كۆرىنىدىغىنى كىتاب جازىسىغا تىزىلغان بىر قانچە ئېلكىتابلار. لېكىن بۇ PDF شەكلىدىكى كىتابلار بولماستىن AppStore نىڭ كىتاب بازىرىدىن سېتىۋالغان كىتابلاردۇر. ئايفون ۋە ئايپەدلەرنىڭ سېستىمىسىنىڭ يېڭىلىنىشى بىلەن iBooks نىڭ يېڭى نەشىرى PDF نى ئوقۇيالايدىغان بولدى. بۇنىڭ ئۈچۈن يەنە iTunes نى ئاۋارە قىلىشقا توغرا كېلىدۇ.

دېتالنىڭ كۆرۈنمە يۈزىدىكى 编辑 ۋە 书店 دېگەن ئىككى كونۇپكىنىڭ ئىقتىدارى ئايرىم–ئايرىم ھالدا كىتاب جازىسىغا تىزىلغان كىتابلارنى ئۆچۈرىۋېتىش ۋە كىتاب بازىرىدىن كىتاب سېتىۋىلىشتىن ئىبارەت.

بىز ئاۋال iTunes نى ئېچىۋالايلى. ئاساسى كۆزنىكى ھالىتىدە تۇرۇپ 文件 دېگەن تىزملىكتىن 将文件添加到资料库 دېگەن تۈرنى تاللايمىز. ياكى تىزلەتمە كونۇپكا «Ctrl+O» نى باسساقمۇ بولىدۇ. ئاندىن چىققان كۆزنەكتىن PDF ھۆججىتىنىڭ ئورنىنى تېپىپ قوشىدىغانلىرىمىزنى تاللاپ 打开 نى باسىمىز.

* رەزمىرى يوغان رەسىملەرنى چەكسىڭىز چوڭىيىدۇ.

بىز يېڭىدىن قوشقان ئېلكىتابلار يان تىزىملىكتىكى 图书 دېگەن يەردە پەيدا بولىدۇ.

كىيىنكى باسقۇچ ئويۇن قاچىلىغانغا ئوخشاپ كېتىدۇ. ئاۋال iTunes قا ئۇلانغان «ئالما» نى بېسىڭ. (بۇ يەردىكى ئالما – ئايفون، ئايتاچ ۋەياكى ئايپەدنى كۆرسىتىدۇ) ئاندىن ئوڭ تەرەپ تىزىملىكتىكى 图书 دىن 同步图书 نى توغرا قىلىڭ. ئەگەر iTunes ئامبىرىدىكى ھەممە ئېلكىتابلارنى قاچىلىماقچى بولسىڭىز ئاستىدىكى 所有图书 نى، تاللاپ قاچىلىماقچى بولسىڭىز 选定的图书 نى بېسىپ، ئاستىدىن قاچىلايدىغان ئېلكىتابلىرىڭىزنى تاللاڭ.

ئاندىن ئەڭ ئاستىدىكى 应用 نى ، ئاندىن 同步 نى باسسىڭىز ئايفون ياكى ئايپەدتىكى iBooks نىڭ ئىچىگە ئۇلارنى قاچىلىۋېتىدۇ.

قولىڭىزغا ئايفوننى ئېلىپ iBooks نى ئېچىپ قورقۇپ كەتمەڭ. بۇ دېتال قوزغالغاندا كۆڭۈلدىكى كۆرۈنمە يۈزى ئالما كىتاب بازىرىدىن سېتىۋالغان كىتابلار بېتى بولۇپ، ئۈستىدىكى 图书|PDF دېگەن جاينى بېسىش ئارقىلىق ئىككى خىل «كىتاب جازىسى» نى ئالماشتۇرالايسىز.

ئەمدى سىز بايا قاچىلىغان ئېلكىتابلاردىن خالىغانچە ھورۇزلىنىڭ.

ئېلكىتاب ھۆججىتىنى باسقاندىن كىيىن ئۈستىدە بىر قانچە كونۇپكىلار كۆرىنىدۇ. بۇنى قىسقىچە تونۇشتۇرىۋىتەي:

1. «كىتاپ جازىسى» غا قايتىش.

2. بەتلەرنى كىچىكلىتىپ بىر ئېكراندا 9 بەتتىن كۆرسىتىش.

3. ئېكران يورۇقلۇقىنى تەڭشەش.

4. مەزمۇندىن ئىزدەش.

5. خەتكۈچ

6. بەتنى تىز ئۆرۈش. ئاستىدىكى بۇ جايدا سىزنىڭ PDF ئېلكىتابىڭىزدا نەچچە بەت بولسا شۇنىڭ ھەممىسى كۆرىنىدۇ. قولىڭىز بىلەن سىيرىش ئارقىلىق تىز سۈرئەتتە دېگەن بەتكە بارالايسىز.

بۇلار ئايپەدتىكى iBooks كۆرۈنمە يۈزى.

باشقا جايدا ئېلان قىلماقچى بولسىڭىز مەنبەنى ئەسكەرتىڭ. يازما ئادرىسى:

/20101227398.html

كۆڭلىڭىزدىكىنى تاپايمۇ؟

ئايپەد، ئايفونلارغا iTunes ئارقىلىق ئويۇن قاچىلاش كۆرسەتمىسى (رەسىملىك)

پاسىبان — Mon, 27 Dec 2010 12:15:44 +0000

ئالما مەھسۇلاتلىرىنىڭ بىزنىڭ دىيارىمىزغا كېچىكىپرەك كېلىشى بىلەن ئوموملىشىشمۇ سەل كىيىنرەك بولىۋاتىدۇ. ئەلۋەتتە بۇنىڭدا يەنە ئىقتىسادى ئامىللارمۇ بار. بىر قىسىم ئالمىداشلارنىڭ iTunes ئارقىلىق چۈشۈرگەن ئويۇن، پروگراممىلارنى ئايفون ياكى ئايپەدلىرىگە قاچىلىيالمايۋاتقانلىقىنى ئېيتتى. بۇ توغرىسىدا ئۇيغۇر تىلىدا ئېنىق قىلىپ چۈشەندۈرۈلگەن بىرەر نەرسە بولمىغاچ ئازراق قىيىنچىلىققا يولۇقۇپتۇ. بۈگۈن بۇنى قانداق ئەمەلگە ئاشۇرۇشنى بىر-بىرلەپ رەسىملىك چۈشەندۈرۈپ ئۆتىمەن.

بۇنىڭ ئۈچۈن ئەڭ ئاۋال iTunes قا ئويۇن ياكى پروگرامما چۈشۈرىمىز. كۇلۇبىمىزدا نەچچە ۋاقىتتىن بېرى يوللىغان ۋاقىتلىق ھەقسىز ئويۇنلارنى چۈشۈرىۋالغان بولسىڭىز ئۇلارنى ئەمدى قاچىلىسىڭىز بولىدۇ. ئەگەر iTunes نى تېخى ئەمدى قاچىلىغان بولسىڭىز، ئەنسىرىمەڭ. ئاللاھ خالىسا بىز ھەر كۈنى دېگۈدەك ھەقسىز ئويۇن ياكى ياخشى پروگراممىلارنىڭ مەنبەسى بىلەن تەمىن ئېتىمىز.

iTunes نى ئاچقاندىن كىيىن چۈشۈرۈلگەن ئويۇنلار بۇ جايدىن كۆرىنىدۇ.

ئاۋال ئايفون ياكى ئايپەدنى كومپىيۇتېرغا ئۇلاڭ. ئۇلانغاندىن كىيىن سول تەرەپتىكى 设备 دېگەن جايدا سىزنىڭ «ئالما مەھسۇلاتىڭىز» كۆرىنىدۇ. ئۇنىڭ ئادەتتە ئىسمى «پالانچىنىڭ ئايفونى» ياكى «پوكونچىنىڭ ئايپەدى» دەپ بولىدۇ. شۇ جاينى بېسىڭ. ئاندىن ئوڭ تەرەپتىكى كۆزنەكنىڭ ئۈستىدىكى تىزىملىكتىن 应用程序 دېگەن جاينى بېسىڭ.

چىققان كۆزنەكتىن 同步应用程序 دېگەننىڭ ئالدىغان توغرا بەلگىسى قويۇپ بولۇپ ئاستىدىكى ئويۇنلار تىزىملىكىدىن سىز قاچىلىماقچى بولغان ئويۇننى تاللاڭ. (دىققەت: سىز بۇنداق قىلسىڭىز بۇرۇن ئايفوندا قاچىلانغان، لېكىن بۇ كومپىيۇتېرىڭىزنىڭ ئويۇن ئامبىرىدا يوق بولغان ئويۇنلار ئۆچۈپ كېتىدۇ)

تاللاپ بولۇپ ئاسىتىدىكى 应用 نى بېسىڭ. ئاندىن ئۇ خەت 同步 غا ئۆزگىرەيدۇ. 同步 نىمۇ بېسىڭ.

同步 – «ماسقەدەملەش» دېگەن مەنىدە. سىز تاللىغان ئويۇنلارنى ئايفونىڭىزغا iTunes تىكىدەك ماسلاشتۇرىدۇ دېگەن گەپ. شۇنىڭ بىلەن iTunes ئىشقا چۈشۈپ ئايفونىڭىزغا ئويۇن قاچىلاشقا باشلايدۇ. (ئەلۋەتتە، ھەر قېتىم ماسقەدەملىگەندە ئايفوننى زاپاسلاپ ماڭىدۇ.)

ھەممە مەشغۇلات تۈگەشتىن بۇرۇن ئايفونغا چېقىلماڭ. بولمىسا ئوتتۇرىدىلا توختاپ قېلىشى مۇمكىن. ماسقەدەملەش ئاياغلاشقاندىن كىيىن ھالەت بۇنىڭغا ئۆزگىرەيدۇ.

تامام. ئەمدى ئايفوننى ئېچىپ قاراپ بېقىڭ. iTunes تىكى ئويۇنلار قاچىلىنىپتىما؟ ئوڭۇشلۇق قاچىلىغان بولسىڭىز مۇبارەك بولسۇن. ئەگەر يەنە يولۇققان مەسىلىلەر بولسا ئوتتۇرىغا قويۇڭ. تەڭ ھەل قىلىمىز.

* كۇلۇبىمىزدىكى پۈتۈن يازمىلار ئۆز قولۇم بىلەن تەييارلىنىۋاتىدۇ. ئەمگىكىمىزگە ھۆرمەت قىلىشىڭىزنى سورايمەن. باشقا جايدا ئېلان قىلماڭچى بولسىڭىز مەنبەنى ئەسكەرتىشنى ئۇنۇتماڭ. يازما ئادرىسى:

/20101227437.html

كۆڭلىڭىزدىكىنى تاپايمۇ؟

iTunes ھىساۋاتىنى ھەقسىز تىزىملىتىش جەريانى

ئۇزبوي — Mon, 20 Dec 2010 11:40:41 +0000

ئېنىقلىما:
iTunes ھىساۋاتى(Apple ID) دىگىنىمىز- ئالما شىركىتىنىڭ iTunes يۇمشاق دىتالىدىكى ۋە iPhone, iPad لەردىكى iTunes Store, App Store, iBook Store (ناخشا مۇزىكا دۇكىنى،يۇمشاق دىتال دۇكىنى، كىتاب دۇكىنى) لاردىن ھەقسىز ۋە ھەقلىق نەرسىلەرنى سىتىۋالغاندا ئىشلىتىدىغان بىرلا كىشىگە تەۋە بولغان ھىساۋات نومۇرىدۇر.

تۆۋەندە بۇنى ھەقسىز(كرىدىت كارتا بولمىغان ئەھۋال ئاستىدا) تىزىملىتىش جەريانىنى چۈشەندۈرىمىز:

كومپيۇتىردا iTunes بولۇشى كىرەك. ئەگەر تېخى بۇ يۇمشاق دىتالنى قاچىلىمىغان بولسىڭىز بۇ يەردىن چۈشۈرۈڭ (ئەڭ يېڭى نۇسخىسىنى ئالما تور بېتىدىن چۈشۈرسىڭىزمۇ بولىدۇ):
http://www.duote.com/soft/2799.html

1. ئاۋال كومپيۇتىردا iTunes نى ئاچىمىز، ۋە سول تەرەپتىكى iTunes Store نى باسىمىز:

بەت ئېچىلغاندىن كىيىن بەتنىڭ ئەڭ ئاستىغا قارىساق دۆلەت تاللايدىغان جاينى كۆرىمىز.

بۇنىڭدىن بىز ئامېرىكىنى تاللايمىز. چۈنكى ئامېرىكىنىڭ دۇكانلىرىدا تۈرلەر ئىنتايىن تولۇق. ھەر بىر دۆلەتنىڭ دۇكىنىدا مەھسۇلاتلار ئوخشاش بولماسلىقى، بۇ يەردە بولسا ئۇ يەردە يوق بولىشى مۇمكىن. شۇڭا تولۇقراق مەنبەگە ئېرىشىش ئۈچۈن ئامېرىكىنى تاللاشنى تەۋسىيە قىلىمىز.

ئۇنى تاللاپ بولغاندىن كېيىن كۆزنەكتە ئامېرىكىنىڭ دۇكان بېتى ئېچىلىدۇ. ئاندىن كېيىنكى قەدەمدە App Store باسىمىز.

سەپ سېلىپ قارىسىڭىز سول تەرىپىڭىزدە Free Apps دېگەن بىر يەرنى كۆرىسىز. بۇ بېكارلىق نەرسە ساتىدىغان جاي. ئۇ يەردىن خالىغان بىر يۇمتالنى تاللاڭ (ياكى ئويۇن) .

بىكارلىق دېسە خوشلۇقىڭىزدا ئىتتىك باستىڭىز ھەقىچان، ئەمدى ئۇ ئويۇن ئېچىلغان بەتكە قارىسىڭىز باھاسى بار ئورۇندا Free ياكى Free App دەپ تۇرغانلىقىنى كۆرىسىز. ئۇنىڭدىن سىز Get App نى بېسىڭ.

بۇ چاغدا سىزگە ‌iTunes Store ، يەنى AppStore ھېساۋاتىنى كىرگۈزۈشنى تەلەپ قىلىدۇ. بۇ يەردىن «يېڭى ھېساۋات قۇرۇش» دېگەننى تاللاڭ.

ئاندىن مۇناسىۋەتلىك سانلىق مەلۇلاتلارنى توشقۇزۇپ بولۇپ، كېلىشىمنامىگە قوشۇلىمەن دېگەن يەرلەرنى تاللاشنى ئۇنۇتماڭ. ئاندىن يەنە داۋاملاشتۇرۇڭ.

پارول (مەخپى نومۇر) سالغاندا مۇرەككەپ سېلىش شەرت ئىكەن. ئەڭ تۆۋەن بولغاندا 8 خانە، ئۇنىڭ ئىچىدە چوقۇم 1 تال چوڭ يېزىلغان ھەرپ، 1 تال كىچىك يېزىلغان ھەرپ ۋە 1 تال رەقەملىك سان بولىشى كېرەك ئىكەن. مەسىلەن Abcd1234 دېگەندەك. شۇڭا مۇشۇ فورمات بويىچە پارول سېلىڭ.

ئاندىن سىزدىن «بانكىنىڭ كارتىسىدا پۇل بامۇيا؟» دەپ سورايدۇ. سىز «ياق، بىكالىق ئويۇن بولسا تەپسىلىي ئويناپ قويىمەن» دەپ «None» دېگەننى تاللايسىز. باشقا ئۇچۇرلىرىڭىزنى رەسىمدىكى چۈشەندۈرۈشكە قاراپ توشقۇزۇڭ.

تىزىملاش تامام. ئەمدى بايا يازغان ئېلخەت ئادرىسىڭىزغا بېرىپ تەستىق ئۇلانمىسىنى چېكىڭ. ئاندىن كۇلۇبىمىزغا قايتىپ كېلىپ، بىز تەمىنلەۋاتقان مەنبەلەردىكى ئويۇنلاردىن قانغۇچە ھوزۇرلىنىپ بەھر ئېلىڭ. بەھر ئېلىۋاتقاندا پاسىباننى ئۇنتۇپ قالماسسىز ھە! باھا يازىدىغان جاي ئاستىدا.:evil:

خېلى تەپسىلىي چۈشەندۈرۈلدى دەپ ئويلىدىم، لېكىن يەنە چۈشەنمىگەن بولسىڭىز تارتىنماي سوراڭ. ئېرىنمەي جاۋاپ بېرىمەن.

كۆڭلىڭىزدىكىنى تاپايمۇ؟

بۇ يازمىلارغىمۇ ئىشتاھايىڭىز بولىشى مۇمكىن
ماشىنا ئاتالغۇلىرىغا ئىزاھات – تولغىنىش مومېنتى	سىرىنى iPhone 4 كە سۆرەپ ئەكىرەيلىمۇ؟	iOS 5 نى نامۇكەممەلمۇ ئەمەس، مۇكەممەلمۇ ئەمەس بىر نېمە قىلىش	iOS 5 نى تۈرمىدىن قاچۇرۇشقا تەييارلىق – SHSH نى زاپاسلاش	iOS 5 نى نامۇكەممەل تۈرمىدىن قاچۇرۇش
无觅

بۇ يازمىلارغىمۇ ئىشتاھايىڭىز بولىشى مۇمكىن
iOS 5.0.1 ئېلان قىلىندى	ئايپەد، ئايفونلارغا iTunes ئارقىلىق ئويۇن قاچىلاش كۆرسەتمىسى (رەسىملىك)	iOS 5 نى نامۇكەممەل تۈرمىدىن قاچۇرۇش	ساياھەتكە چىققاندا ئەسقاتىدىغان iPhone ئەپ توپلىمى	iTunes چۈشۈرۈش سۈرئېتىنى چاقماقتەك تېزلەتكۈڭىز بارمۇ؟
无觅

بۇ يازمىلارغىمۇ ئىشتاھايىڭىز بولىشى مۇمكىن
iOS 5 كە تەييارلىق: iTunes 10.5 نى چۈشۈرۈڭ	App Store دىكى ئۇيغۇرچە ئەپلەر توپلىمى	ھېيتلىق لازىممۇ؟! مانا ئەمىسە!	ئايفون ۋە ئايپەد ئارقىلىق iBooks تا ئېلكىتاپ كۆرۈش ئۇسۇلى	تەۋسىيە : ئاجايىپ – غارايىپ ئەپ (5) Remix your life
无觅

بۇ يازمىلارغىمۇ ئىشتاھايىڭىز بولىشى مۇمكىن
App Store دىكى ئۇيغۇرچە ئەپلەر توپلىمى	دۆلىتىمىز ئىشلىگەن قىسقا فىلىم ئالما دەۋرى	iPhone 4S ئېلان قىلىش يىغىنىنىڭ خەنچە چۈشەندۈرىلىشى	تەۋسىيە: ئاجايىپ ئېسىل ئەپ – Orient	تەۋسىيە : ئاجايىپ – غارايىپ ئەپ (5) Remix your life
无觅

بۇ يازمىلارغىمۇ ئىشتاھايىڭىز بولىشى مۇمكىن
iTools, 同步推, 91 قاتارلىق چوماقچىلارنىڭ قوزغاتقۇچىسى	iTunes چۈشۈرۈش سۈرئېتىنى چاقماقتەك تېزلەتكۈڭىز بارمۇ؟	سىرىنى iPhone 4 كە سۆرەپ ئەكىرەيلىمۇ؟	iOS 5 نى نامۇكەممەلمۇ ئەمەس، مۇكەممەلمۇ ئەمەس بىر نېمە قىلىش	ھەقسىز Apple ID ئىلتىماس قىلىش دەرسلىكى (فىلىملىك)
无觅